2 KORINTUS 9 - Nanduk Ngget Tul Pidnak Wene

Yerusalem nap enmanggim tol ndok wiridnak wene 9:1-5

¹ Marak nap yongga undurak pem yu nggal-o luk an-nen engga mbal kundurag-e lag-o.

² It yongga undurak pem kit kenalen yili iri-ge naru me, an-e Makeronia nap inmbiri bem kit kentembel wanosolar-e: ”Akaya nap iri-ge olengen nanduk woraige bem-net yongga undurak lid lud tak puruk woraiga-o” luk yak ondosolakmu-ge, kit kenmawi kwindigep iri na karuk, ap kwarat inndi te rak pigeb-o.

³ An-e nennggamirak yu kendam inpil lobok yusu iri-ge, wene yu bem nit-nen kit kentembel kwarat wanige iri-ge we ebe lak mende ma-o luk inpil lobok yusu-o. Are, an-nen yak kindigi na nggal-et mondok lid lud tak puruk worabog-o luk-nen yigi-o.

⁴ Kit lid lud tak pigit lak worakmu-ge, Makeronia nap nde an nimin lobok yelep nggal-e, nir-e kit kentembel kwarat wanugwi me, nit ninnggiri kwarat kagolat, kit na kinnggiri kagolat yeleb-o.

⁵ Iri bem-e, nennggamirak yu-ge nandug-et kendam wirik onposolar-e, kit-nen ”Iri mende-t pul-o” luk urul pigep tol na nandug-et lid lud tak pobokluk kir-e nanduk mberer-o luk enmengen mbarigi-o. Nde, tol pugup iri-ge an-nen ”Iri nggal per-o” luk yak kindidnak pem pidnag-e lag-o. Are, kit kinndi konak iri bem-net pidnak tol irit ma-o.

Enalen min-et Mbal Pem Nagawan amanggim pogola-ge, imbiringgat wanuwa-o 9:6-15

⁶ Wene yu-ge kwara yebet ker-o: Uwi mariget nak yaguwa nab-e ebe mariget nak mbaruwa-o. Nde, uwi kwarat yaguwa nab-e ebe kwarat mbaruwa-o.

⁷ Iri ala-ge, ap enambik lombok-net Mbal Pem Nagawan amanggim pogolar-e, at indi-n peraruk-net puwag-o. At indi angin min-et nde nin nap-nen ”Iri nggal purag-o” luk yuwa bem nak-nen purag-e lag-o. Alen min-et poso nap iri perak nde, Mbal Pem Nagawan-nen-e abuwa kaso-o.

⁸ Yi mende ndi mende oboksa bem pempa ndak woraboklug-e, Mbal Pem Nagawan-nen-e at-nen we wok ondoso mende nggilara ndak yaga wok kundurag-e ndak-nen yusu-o. Iri-nen-o kit-nen yi kwatlik ndi kwatlik konak nak kwarogolar-e, kenarengge-ge ndinik nak wolma-o.

⁹ Mbal Pem Nagawan engga bem-nen yosolar-e: ”At arengge-ge we tembesa wok ondosolat, insilobulo lak nap tembesa wok ondosolat yoso nab-e at-nen lud tak nak kwaroso-ge pem-et wolma-o” luk yij-o.

¹⁰ Nde, uwi pil kaso nap amanggim uwi wok toso nap, mburu nujwakluk mak ondoso nap Mbal Pem Nagawan at na-nen-e kit-nen pil kudtak uwi pidsa na wok kunduwa-o. Iri luk, uwi iri pilanosolar-e, kit kinndi lubug-et pidnak pem-nen at-nen na engen utlud kwarat tak kunpuwa-o.

¹¹ At-nen silobulo winde rak konposola-ge, kir-e kinndi lubug-et yi mende ndi mende tomborogola karuk, nit nenpem ala, Mbal Pem Nagawan wa yak tugwi-o.

¹² Kit-nen lubug-et timbitli iri-ge marak nap inndi kabak yidnak mende na ndak tak unpurak pem nag-e lag-o. Are, Mbal Pem Nagawan wa yak togolar-e, mondok kwarat wiwa-o yak turak amanggim min-er-o.

¹³ Nde, kit-nen lubug-et tomborogolat-nen ndak tak pili mende iri bem yenggerak kunpuruk, ap kwarat-nen Mbal Pem Nagawan unu kek tak pogolar-e, kir-e mot mot nak Kerisut-nen idnak aid wene para yogolat, kinndi lubug-et it na ap pidsa na kinsilobulo tembesa wok ondogolat yili iri bem-net at unu kek tak puwa-o.

¹⁴ Nde, it-nen kit kenmanggim tepan yogolar-e, Mbal Pem Nagawan-nen we wok ondoso elem utlud kwarat tak kinpidnak me, it inndi kenpem woragolat-nen kenmanggim tepan yuwa-o.

¹⁵ Mbal Pem Nagawan-nen we wok ondoso mende wonarurak puk iri bem-e nir-e Mbal Pem Nagawan wa yak tuwog-o!