2 KORINTUS 6 - Nanduk Ngget Tul Pidnak Wene

Paulus eyabu wanosolat-nen kwaridnak wene 6:1-10

¹ Nir-e Mbal Pem Nagawan imin yabu misiget erep wanugwi nap nit-nen nggomo kindili-o: Mbal Pem Nagawan-nen we wok ondoso elem wanigep iri na-ge ebe lak mende rak purak pug-o.

² Mbal Pem Nagawan-nen yosolar-e: ”An nalen yidnak tarem-e kit kenne kuligi-o. Kinmiri yurak tarem-nen-e an-e yongga kindigi-o” luk yij-o. Ndemerer-o! Mbal Pem Nagawan alen yidnak tarem-e yawor-o. Kinmiri yurak tarem-e yawor-o!

³ Nit neneyabu wanili na meya rak pul naru, nir-e yi mende ndi mende bem oboksa ap enare pili bug-o.

⁴ Are, yi mende ndi mende bem nir-e ndemeret Mbal Pem Nagawan ndegel ubugwi nap nenpage-t neneyujwaklug-e, andi bandi kagolat na, angin worak mende nenpem mbosola na, ninndi kabak ala na, nir-e ninndi kwara luruk puruk woragwi-o.

⁵ Linggamburok nondogola, o kubu me ninpil nggogolat, ap kwarat-nen nenpem mbud yogolat yiga-o. Nenpabok lak yosolat, nene yigit lak, nunluk nak woragolat, nere kagolat yige-o.

⁶ Nit-nen kwarugwi-ge yu nggal-o: Ninndi mbek tak pem na, nenaru yidnak pem na, ninndi mamak puruk woragwi bem na, ninndi lubug-et kwarugwi bem na, Konak Indi nit nenarem worasu bem na, ndemeret ap enabuwa kagwi bem na,

⁷ lud tak nak kwarugwi wene yak undugwi bem na, Mbal Pem Nagawan amawi bem na, irit kwarugwi-o. Nde, lud tak nak kwarugwi nensan-e ninnggi kigit nggwe, kware nggwe wanugwi-o.

⁸ Ap-nen-e nunnu kek tak pogola-nen na, nunnu mbilaro ngin tak pogola-nen na, ninnggiri worogola-nen na, nentembel wanogola-nen na, nenesiget yugwi nap nggal tak nonpogola-t nde, nir-e ndemeret wene nak yugwi-o.

⁹ Ap-nen-e nunnu lak nap nggal tak ninpili-t nde, ap oboksa-nen nir-e enaru-o. Nir-e wat yidnag-et nde, ndemeret nunluk worali iri ker-o. Andi bandi rak ninpidnag-et nde, wat yili bug-o.

¹⁰ Ninndi puru pera yili-t nde, nir-e pempa nenalin nenalen yili-o. Ninsilobulo na lak nab-et nde, nir-e ap kwarat insilobulo worak tak inpili-o. Nit nenarengge lag-et nde, nir-e yi mende ndi mende oboksa winde-nen yili-o.

Enlem nin nap-nen kwarugwi mende iri kwarurak pug-o yidnak wene 6:11–7:1

¹¹ Korintus woragwi nap wa-e. Nit ninndi-ge ebis-et kit kenpem puruk woragolar-e, wene nam-et nak yak kindige-o.

¹² Nit-nen-e kit wok kunpurag-e ndag-et nde, kit-nen-e nit wok nunpurag-e meya-o.

¹³ An wene yu yak kundusu yu-ge ineid-nen inlirak yak undugwi nggal irit yak kundusu-o: Nit-nen kit kenabuwa kali nggal, kit-nen na nit nenabuwa ker-o. Kit kinndi-ge ebis-et nit nenpem per-o.

¹⁴ Kir-e inndi angin tubu yigit lak nap inmin-e yabu ndak ndak wanurag-e ndag-e lak me, it inmin yabu wanurak pug-o. Lud tak nak kwarugwi elem-e meya nak kwarugwi elem min-e nggesa lambuksa wolma-o? Nde, yaya-ge nggesa-nen ndamuk min misiget luk wolma-o?

¹⁵ Kerisut min Sere min-e nggesa-nen inndi misiget ma-o? Nde, indi angin tubu yidnak nap min indi angin tubu yigit lak nap min-nen no mende lambuksa kwaruwa-o?

¹⁶ Mbal Pem Nagawan uwi min kugiwak min erep kundik wolma, lak? Nde, nir-e uruk nak woraso Mbal Pem Nagawan uwi-nen yili-o. Mbal Pem Nagawan-nen yosolar: ”An-e it inmin woralat, it ennggenggerak woralar-e, An-e it Enmbal Pem Nagawan kwat yosolat, Nde, ir-e an nelem nab-et kwat yogolat ma-o” luk yij-o.

¹⁷ Iri bem-e, Nagawan Indo-nen yosolar-e: ”Kir-e it ennggendumu-nen wurungsa mburugupndig-e it inmin lambuksa wolmomtak pug-o. Mbilaro ngin mende iri mondok keya bugup ala-ge, an-nen wok kinpimin-o.

¹⁸ An-e kit Kineid yosolat, nde, kir-e an nilirak li ap nde, li kwami nde tugub-o luk Amawi Kwarat worak Nagawan Indo-nen yij-o.”