2 KORINTUS 4 - Nanduk Ngget Tul Pidnak Wene

Konak Indi arengge-ge nggweyak yimbe arem worasu wene 4:1-15

¹ Ap unpud kaso elem pem Mbal Pem Nagawan-nen-e yabu yu-ge nit nen-pem pamu me, nit ninndi nggwirik yusu bug-o.

² Kuruwaga kwarugwi innggiri rak poso mende iri-ge nit-nen keya bige-o. Nir-e ap onmbol pem lagolat, Mbal Pem Nagawan-nen yidnak wene lugud kagolat yili-ge lag-o. Are, ndemeret wene iri na nam-et yogolar-e, ap oboksa enarem-nen konak nak nenperagola, Mbal Pem Nagawan imbiri bem worali-o.

³ Nde, nit-nen yak indili aid wene iri-ge lumurak worala-ge, it lak yurak nap enambigir-e lumurak worasu-o.

⁴ It inndi angin tubu yili buk nap inndi erengen-e nggweyak ma yu tena woraso nagawan-nen ngguru rak pidnak me, it-nen-e Kerisut kek tak woraso wene aid wene eyaya na kudtag-e meya-o. Kerisut iri-ge Mbal Pem Nagawan abage worak-nen yusu-o.

⁵ Nde, nir-e nit nondomok nonowene yak kindili-ge lag-o. Nit-nen yak kondogolar-e: ”Yesus Kerisut iri-ge Nagawan Indo-nen yusu-o luk, Yesus ebem ala, nir-e kit ndegel kunpugwi nap-nen yili-o” luk yak kindili-o.

⁶ Mbal Pem Nagawan-nen yosolar-e: ”Ndamuk arem-nen yaya yuwag-o” luk yid Mbal Pem Nagawan at-net at eyaya-ge nit nenarem yaya rak pij-o. Iri yosolar-e, Mbal Pem Nagawan abinal-e Kerisut erare bem worasu abinal iri nenaru rak purak pem-nen iri yij-o.

⁷ Alat nde, onggo nggok mende iri na-ge ndangen nggweyak-nen konidnak yimbe nit nenarem worasu-o. Iri worasu iri-ge amawi kwarat lombok iri na-ge nit-nen idnak amawi-ge lag-o. Are, Mbal Pem Nagawan-nen idnak amawi-o luk nam makluk-nen yusu-o.

⁸ Yi mende ndi mende bem mangonokma rak ninpidnag-et nde, ngonok tak ninpigit lag-o. Nit ninndi kabak yidnag-et nde, ninndi lele yugwi bug-o.

⁹ Lel mberel ninpidnag-et nde, nenarik keya ninpigit lag-o. Nggwin yaga mberak ninpidnag-et nde, wat yigit lag-o.

¹⁰ Yesus uruk yidnag-e nit nenpe bem nam maklug-e, Yesus worogola wat yid iri na nggal nondogola wat momtak irit nenpem puruk waring kali-o.

¹¹ Yesus uruk yidnag-e luru koreyak nap nit nenpem nam maklug-e, nit nunluk woragolar-e, Yesus ebem ala, pempa wat yugwi elem inggem pidnak worali-o.

¹² Iri nggal kwarosolar-e, wat yugwi elem-e nit nenarem yabu wanusu-t nde, unluk woragwi elem iri-ge kit kenarem yabu wanusu-o.

¹³ Mbal Pem Nagawan engga bem-nen yosolar-e: ”An nindi angin tubu yidnak ala-nen wene yusu-o” luk yij-o. Nde, nit ninndi-ge wene iri yid nap indi nggal-et me, nit-nen na irit ninndi angin tubu yidnak pem-net wene yili-o.

¹⁴ Nagawan Indo Yesus uruk tak pid nap, Mbal Pem Nagawan-nen-e Yesus min nit totno nunluk tak posola-ge, nit min kit min at ondomok eram ninpil mburuwar-o luk nenaru nar-o.

¹⁵ Iri mende oboksa-ge kit kenmanggim kwat yusu-o. Nde, Mbal Pem Nagawan-nen we wok ondoso elem kwarat iri-ge ap nin endam wok lik, nin endam wok lik yosolar-e, it-nen-e Mbal Pem Nagawan wa kwarat yak togola-ge, Mbal Pem Nagawan unu kek tak pogolat wolma-o.

Wat yurak kenpem mbosola na, kinndi uwi ya-t wolmer-o 4:16–5:10

¹⁶ Iri bem-e nit ninndi lele yili bug-o. Nit nenaboro yu-ge piri yusu-t nde, nit ninndi yu-ge pelin na pelin na ngget tak nak pusu-o.

¹⁷ Nde, yawo luru nenpem mbusu andi bandi mende te iri-nen-e woralik nalik momtak kek tak mende terak minik irit kwarak nunpusu-o.

¹⁸ Nit nenlengen-nen kwara yik kagolar-e, enlengen-nen kagwi mende-ge kali bug-o. Are, kagwi buk mende irit yik kali-o. Enlengen-nen kagwi mende-ge luru wolmomtak-nen yusu-t nde, kagwi buk mende-ge woralik nalik momtak-nen yusu-o.