2 KORINTUS 2 - Nanduk Ngget Tul Pidnak Wene

¹ Iri ala, an nindi-nen perasolar-e, an-e tuguruk kit kendam-e nindi puru min lobok yimin-e lag-o luk peragi-o.

² An-nen nde kit kinndi puru rak pelepnggal-e, ta rak-nen an nalen tak peleb-o? An-nen inndi puru rak pidnak nap iri-nen perak nde nalen tak peleb-o.

³ Iri bem-e, engga mbal kindigi iri-ge yu yosolat-nen mbarigi-o: An-e kit kendam lobok yosola-ge, an nalen tak purak nab-et nde, an nindi puru pera rak puwa-o luk-nen yigi-o. An nindi-nen yebet keneyasolar-e, an nalen kasu yu ereb-et kit na kenalen kali-o luk yebet keneyasu-o.

⁴ Engga mbal kindigi iri-ge, an nindi kwarat puru luk, nindi andi min yip kwarat yosolat mbarigi-o. Alat nde, kit kinndi puru rak purak pem engga iri mbarigi-ge lag-o. Are, an-nen kit kenabuwa mondok kwarat kasu iri kenaru rak posolat-net mbarigi-o.

Ap erep meya yosoma, amberam tak purak wene 2:5-11

⁵ Alat nde, ap mbi-nen inndi puru pera rak pidnak nde ala-ge, an nak nindi puru pera rak pij-e lag-o. Nde, kit pidsa kinndi puru pera rak pigit lak. Nde, an-nen angin tak ibimin naru, kit erep nak kinndi puru pera rak pij-o luk yusu-o.

⁶ Kit kwarat-nen angin worak mende ap iri na ebem pigep iri-ge ndak kasu-o.

⁷ Yawo-nen perak nde, kit-nen-e at iri na kunlugom tak puruk, at indi abi-nen wat kurujwa naru, at indi yungunugup na-e.

⁸ Iri bem-e, kir-e ndemeret at abuwa kwarat kali aru rak pobokluk an-e yak kundusu-o.

⁹ Wene yu bem-nen engga iri mbal kindigi-o: yi mende ndi mende oboksa ndak ndak kwarugup, lak? luk kinndi ngarosolat-nen mbarigi-o.

¹⁰ Kit-nen nde ap misik-nen meya yidnak kenmberam tak pogola-ge, an-nen na nemberam tak pimin-o. Nde, an-nen nde ap meya yidnak nemberam tak posola ge, – an-e nemberam tak purak mbi mondok worala-ge – iri-ge kit kenpem ala Kerisut inmbiri bem-et nemberam tak pimin-o.

¹¹ Sere-nen nit urugwe nggwe rak nunpuwa naru-nen iri-ge kwatli-o. Sere indi-ge nenaru nar-o.

Teroas-nen Paulus indi kabak yidnak wene min Makeronia-nen Paulus alen kaidnak wene min 2:12-17

¹² Kerisut-nen idnak aid wene ap yak undurak pem o Teroas wok yiginggal-e, Nagawan Indo-nen at eyabu wanurak pem tu-ge kuwarak pidnak nde kagi-o.

¹³ Alat nde, nenggam Titus iri na kagit lak me, an nindi mondok kabak alar-e, o iri nap na an-e mburusu-o yak unduruk, Makeronia mbirigi-o.

¹⁴ Alat nde, nir-e Kerisut ebem ombol nggwe yurak tulabiyem at-nen pempa wok nunpuruk mburusu bem-e Mbal Pem Nagawan wa yak tuwog-o. Emben konak mende wigaril mboroso nggal, Kerisut enaru yurak emben konak iri-ge nit nenpem nggwe-nen nin me nan me wigaril mburusu-o.

¹⁵ Kerisut-nen idnak emben konak mende Mbal Pem Nagawan amanggim pidnag-e nit-nen yili me, emben iri-ge inmiri yurak nap min lak momtak nap min ennggendumu mburusu-o.

¹⁶ Nir-e lak momtak nap enabirumu-ge wat momtak emben meya kwat yusu-o. Nde, inmiri yurak nap enabirumu-ge unluk tak purak emben konak kwat yusu-o. Alat nde, yabu iri-ge ta nggal-nen nde ndak tak puwa-o?

¹⁷ Ap erep kwarat-nen-e Mbal Pem Nagawan-nen yidnak wene iri na bem-nen onggo lesa wanuwokluk wene iri yil waring kali nggal, nit-nen iri nggal kwatli-ge lag-o. Are, Mbal Pem Nagawan-nen wirik ninpidnak pem-e, nit-nen wene yogolar-e, Mbal Pem Nagawan imbiri bem yidnak nggal-et Kerisut ebem-nen wene mot mot nak yili-o.