2 KORINTUS 11 - Nanduk Ngget Tul Pidnak Wene

¹ Nap tag-o. An-e siyak wid-nen yugwi nggal yosola-ge, kir-e kondok puruk wolmer-o. Kir-e ndemeret an nimin kondok puruk woragwi-o.

² Ap misiget nak wanobokluk ebem panggarak kinpigirik me, kir-e imin nene yugwi buk kwe ndugum nggal Kerisut wok kunpuwakluk-nen Mbal Pem Nagawan-nen kit kenpem ala erengen ale yusu nggal, an-nen na kit kenpem ala nerengen ale yusu-o.

³ Alat nde, waro indi nggat nggat worak iri bem-nen Awa na ombol pem lagaid nggal, iri nggal kit kinndi kabak tak pogola, kir-e kinndi misiget nak luk Kerisut ariget abuwa kali iri keya bugup naru numud kwarat kasu-o.

⁴ Nde, ap-nen kit kendam lobok luk, nit-nen yak kindidnak Yesus-e lak, nin Yesus mbi owene yak kondogola na, nit-nen wok kindidnak Indi-ge lak, nin indi mbi wok kondogola na, nit-nen yak kindidnak aid wene-ge lak, nin aid wene yak kondogola na, iri-ge kit kenalen min-et wanili nag-o.

⁵ Wirik inpidnak nap ereba-ge ija lombog-et nde, an nindi-nen perasolar-e, an na it inmin ndak ndak-nen yusu-o.

⁶ An-e wene yoso bem-e nil kil tag-et nde, enaru yugwi mende bem-e mondok kwarat naru me, nir-e pempa yi mende ndi mende oboksa bem-nen an naru yidnak iri-ge nam-et mirik konpogolat woraige-o.

Paulus na at ondomok ambigit nggwe marik tak poso wene 11:7-33

⁷ An-e Mbal Pem Nagawan-nen idnak aid wene yak kondosolar-e, onggo mbi wanigit lak yigi-o. Nde, kit kek tak kenpeyekluk, an nondomok tebe yigi iri-ge meya nde kwarigi, lak?

⁸ Kit yongga kendeyeklug-e, lambuk tak inpidnak nap erep-nen wok niridnak tol-e ininggem-nen mengga wanigi-o.

⁹ Nde, an kit kinmin woralat norol lak woralar-e, ap misiget ter-o luk kenpem tol nggi yigit lag-o. An-nen ukwe yidnak mende oboksa-ge nenggamirak Makeronia-nen lobok yidnak nap iri-nen wok niriga-o. Kit kenpem angin pimin naru, yi mende ndi mende bem an nindi-n luruk puruk worakmu, nde, abok na iri nggal-et kwarosolat woramin-o.

¹⁰ Kerisut ndemeret wene iri-ge an narem worasu bem an-nen wene yu urul pusu-o. An-nen nggi yoso buk pem nindi kek tak poso yu-ge Akaya uwi oboksa-nen mondok lak tak puwa bug-o.

¹¹ An-nen kit kenabuwa kagit lak yosolat-nen yigi-a? Lag-o. An-nen kenabuwa kaso iri-ge Mbal Pem Nagawan aru-o.

¹² It na it-nen wirik inpidnak nap nggal kwatli nap iri-nen it unnu kek tak pogolar-e, nit-nen yabu wanili nggal it-nen na yabu iri nggal-et wanili-o luk yuwa naru, an-nen yawo kwarusu nggal iri nggal-et kwat tenak woramin-o.

¹³ Iri kwatli nap iri-ge ennesiget wirik inpidnak nap nggal kwatluk, yabu enesiget siget wanogolar-e, Kerisut-nen wirik inpidnak nap nggal luk kwatli-o.

¹⁴ Iri kwatli iri bem-e wi yurak pug-o. Sere-nen na eyaya worak aid nap nggal kwat yoso-o.

¹⁵ Iri bem-e, Ser ndegel ubugwi nab-e lud tak nak kwaroso ndegel ubugwi nap nggal kwat yogola, wi yurak pug-o. Nde, woroksiyem-nen-e it-nen kwaruwa iri na onggo ndak ndag-et wanuwa-o.

¹⁶ Tuguruk yak kendeyeg-o. Ap mbi-nen-e an wid nggal tak nuburak pug-o. Alat nde, kit-nen wid nggal tak nobogola-ge, mariget kek tak peyeknen wid nggal-et wok neber-o.

¹⁷ An-nen yawo yusu wene yu-ge, Nagawan Indo-nen ”Iri yi-o” yosola-nen yusu-ge lag-o. Alat nde, ap wid-nen kwiye lag-et at indi kek tak pusu iri nggal-et yusu-o.

¹⁸ Ap kwarat-nen nggweyak ma mende bem it inndi kek tak pugwi me, an-nen na iri nggal-et yimin-o.

¹⁹ Kit perak nde kinndi nggat nggat worak me, ap wid inmin-e kinndingen min-et kinndi luruk puruk woragwi-o.

²⁰ Nde, ap-nen unlugwe nggwe rak konpogola-t nde, kenarengge mberek togola-t nde, yemen kunpuruk woragola-t nde, tebek tak konpogola-t nde, ininggi nggambu kentare lel kagola-t nde, kit-nen iri kwat kunpugwi nap inmin-e kinndi luruk puruk worali-o.

²¹ An-e ninggiri min-et wene yu yak kundusu-o: Nit-nen iri nggal kwat kunpurag-e mondok kwiye-o. Alat nde, ap mbi-nen yi mende ndi mende bem kwiye lag-et at indi kek tak posola-ge, (An-e wid-nen yugwi nggal-et yusu-o) an-nen na kwiye lag-et nindi kek tak pimin-o.

²² Ir-e Iberani nap-nen yili-a? An na Iberani nap-nen yusu-o. Ir-e Isarael nap-nen yili-a? An na Isarael nap-net yusu-o. Ir-e Abaram-nen wigarak-nen yili-a? An na Abaram-nen wigarak-net yusu-o.

²³ Ir-e Kerisut ndegel ubugwi nap-nen yili-a? Ap indi wawa-nen yugwi nggal yimin-et nde, it na ndegel ubugwi-t nde, an-e terak menna ndegel oboso-o. It yabu-ge mariget waniga-t nde, an perak nde yabu kwarat wanigi-o. Ir-e siyag-et linggamburok undugwi-t nde, an perak kwarat pem linggamburok nurugwi-o. Ir-e misik tarem nggal-et o kubu me inpil nggugwi-t nde, an-e kwarat pem o kubu me nibil nggugwi-o. An-e kwarat pem wat yugwi tu nggambut mu wok yukmu-o.

²⁴ Lima bem-e Yawuri nap-nen-e tigapulu sembilan (39) pem linggamburok niriga-o.

²⁵ Kenan pem-e nggambu bem niriga-o. Misik pem-e kerep pem niriga-o. Kenan pem-e an-e yi koma ombolwak pem mborosoma, e koma min yi-nen tebel nibij-o. Nde, misik tarem-e kubu-nen lengge-nen yi ombokwak pem laring laring wok nuburuk waring kagaij-o.

²⁶ An-nen tu pempa waring kasola-ge, yi ebe-nen wok nuburak nggal yilik, yariya wanugwi nap-nen nururak nggal yilik, an nelem Yawuri nap-nen na, enlem nin nap-nen na, an nururak nggal yilik, o siri nggulok ma-nen na, karu me-nen na, yi koma bem-nen na, wat yurak nggal yilik, ennesiger-et nanggamirak nggal yidnak nap-nen nururak nggal yilik, kwat nobogola nigi-o.

²⁷ An yabu kwarat wanosolar-e, nababok lak yoso-o. Kwarat pem nene yigit lak, nuruk nak woragi-o. Mburu nere yilik, yi nere yilik yoso-o. Kwarat pem-e nunggwi mende lak yilik, toro yilik, nusum lak we woralik yoso-o.

²⁸ Nde, nebem mbidnak mende ereb-e kwarat worasola-t nde, yak kindigit lak yusu-o. An-nen pempa numud kaso iri-ge lambuk tak inpidnak nap oboksa numud eneyaso-o.

²⁹ Ap misik-nen nde ndeyak ala-ge, an na ndeyag-et yoso-o. Ap misik-nen nde oro-nen mbud luk, meya yosola-ge, an na nindi puru kwarat yoso-o.

³⁰ An nde mondok nindi kek tak purak ala-ge, an ndeyak yidnak pem-net nindi kek tak pimin-o.

³¹ An-nen yusu wene yu-ge nenesiget yusu-ge lag-o. Nagawan Indo Yesus Eid Mbal Pem Nagawan-e aru-o. At unu-ge kek tak irit woralik nalik wolmag-o.

³² An Ndamsik worala, Nagawan Aretas-nen o yik karok woragwi nap iri na an tena nubuwakluk wirik enpamu, o pak tumende bem emende mbarak puruk woraiga-o.

³³ Alat nde, mul sum arem yarak nuburuk, papalo uru nggwe-nen pak ombol nggwe nibil mbogola, at inggem-nen mengga mbirigi-o.