2 KORINTUS 10 - Nanduk Ngget Tul Pidnak Wene

Paulus abage lud tak kwaroso wene 10:1-11

¹ Paulus an-net yanggonak pem-et nggomo kundusu-o. Kinmbiri bem-nen-e namawi min nggomo kondoso bug-o luk nobok pili-t nde, erepma woralat-nen-e kwiye lag-et yak kondoso an-e Kerisut yemnak indi luruk puruk woraso bem-net wene yu yak kundusu-o.

² An-nen kenmengen mbarusu-o: Nanggarag-o. ”Ar-e nit nendam lobok yosolar-e, amawi min-et lobok yuwag-o” luk yurak pug-o. Nit ninmin yogolar-e: ”Ir-e ki nap-nen kwarugwi nggal kwatli-o” luk nenperagwi nap na inmin-e an namawi min-et kwat unpu-ge ndag-o luk perasu-o.

³ Nir-e ndemeret nggweyak ma yu me worali-t nde, nggweyak ma nap-nen wim tumburugwi nggal wim timbitli bug-o.

⁴ Nit wim tumburuwokluk nensan wanili iri-ge, nggweyak ma nap-nen wim pugwi san nggal-e lag-o. Are, kerep pak ndamoroso san-e Mbal Pem Nagawan amawi-net yusu-o.

⁵ Ap enmberam lagwi wene iri-ge lak tak pogolat, Mbal Pem Nagawan enaru mul naru inndi kek tak pem wiridnak kerep pak ndamarak pogolat yili-o. Nit ninndi-nen peragwi oboksa yemendak puruk Kerisut-nen yidnak yidnak nak kwaruwakluk indipma rak pili-o.

⁶ Kir-e nit-nen yidnak nak kwarugwi nde iminep mbal yosola-ge, lugud tak kwarugwi nap na anggun worak mende enpem purag-e lid lud tak puruk worali-o.

⁷ Kit-nen ap eneyagolar-e, entare nak kali-o. Ap misik-nen nde at indi yebet kasolar-e: ”An-e ndemeret Kerisut arengge-nen yusu-o” luk perasolar-e, at iri-ge tuguruk yebet kujwag-o. At iri-ge Kerisut arengge-nen yusu nggal, nit-nen na iri nggal-et Kerisut arengge-nen yili-o.

⁸ Nde, kit mberak kunpurak pem-e lag-o. Are, kit mendak kunpurak pem Nagawan Indo-nen amawi wok nindidnak iri bem an nindi kwarat kek yusu iri bem an-e ninggiri kamin pug-o.

⁹ Alat nde, kit kenlengen pem-e an-nen kit kwiye rak kenpeyekluk-nen engga mbarigi-ge lag-o.

¹⁰ Ap misik-nen yosolar-e: ”Paulus-nen engga mbaridnag-e kwiye worak, andi le worak mbaroso-t nde, nit nendam-nen-e abage-ge ndeyak, ene na ebe lak wene yoso-o” luk yusu-o.

¹¹ Iri nggal yusu nab-e yu nde yebet kujwag-o: An erepma-nen engga bem mbarigi wene na kit kendam woralat-nen yimin wene na misiget-nen yusu-o.

Paulus-nen at ambik owene yebet kaidnak wene 10:12–11:6

¹² Nir-e enambik entembel wanugwi nap inmin misiget luk nde it inmin ndak ndak yurag-e kwiye-o. It na it-nen enambik inmin ndak wat koragolat, it na it-net enambikpebe-net irit irit tak pogolat yili-o. It iri-ge wid inndi worak ijar-o!

¹³ Alat nde, nit perak nde nit nentembel wanogolar-e, kuri pidnak kuruksa terak menna nentembel wanul pug-o. Mbal Pem Nagawan-nen nit yabu wanurak nenmanggim kuri wosa posolar-e, kuri-ge kit worali mu na irir-o.

¹⁴ Nde, kir-e nit neneyabu kuri bid iri na arem nggwe worali me, nir-e Kerisut owene aid wene iri yak kindil wok yogolar-e, kuri bid iri na kwidsa mbirigit lak yige-o.

¹⁵ Nit, neneyabu kuri pidnak sa ombol nggwe nin nap-nen wanili yabu iri bem nit ninndi kek tak pili bug-o. Are, nit-nen peragolar-e, kit kinndi angin tubu yidnak kwarat yosola-ge, kit kenpem ala nir-e kek tak nunpuwa-o luk perali-o. Nde iri-ge neneyabu kuri mbal nindidnak iri na me-t wanul-o.

¹⁶ Nde, nir-e kit kunuwi ombol nggwe wandak ereya aid wene yak indil mburulndik na nin nap-nen lid lud tak pidnak yabu iri bem-nen nit nunnu kek tak pul-e lag-o.

¹⁷ Alat nde, Mbal Pem Nagawan engga bem-nen yosolar-e: ”Ta-nen nde indi kek tak posolar-e, Nagawan Indo ebem-nen indi kek tak puwag-o” yij-o.

¹⁸ At ondomok erembel wanusu nap iri-ge ndag-e lag-o. Are, Nagawan Indo-nen erembel wanusu nap iri perak nde mondok ndak-nen yusu-o.