2 NAGAWAN NAGAWAN-NEN KWARIDNAK WENE 7 - Nanduk Ngget Tul Pidnak Wene

¹ Yosoloma, Elisa-nen onggo yosolar-e: ”Nagawan Indo-nen yid wene yu kuli-o! Kub-e yanem nggal-e perak tol misiget pem-et nde, ap-nen-e nggandum mbato mondok konak angin-e tiga kilo min nggandum mbato nin mende angin-e enam kilo min irit onggo puwa-o” luk yak tij-o.

² Yak tosola-ge, nagawan iri yongga woroso nap iri-nen onggo yosolar-e: ”Mondok Nagawan Indo at-nen yanem-et mbal tu kuwarak puwa-t nde, kat-nen yigen iri nggal-e mondok kwat ma bug-o” yij-o. Nde, Elisa-nen onggo yosolar-e: ”Kar-e kerengen-nen kagun-et nde, nunggwi mende ereba-ge kat-nen-e mariget tet mondok nunggun pug-o” luk yak tij-o.

Siria nap san ombo kwiye mbiridnak wene 7:3-20

³ Marugot ndigiril laso enpem yidnak nap enpe empat iri-ge Samaria iri me o pak tumende ombol nggwe iri me woraiga-o. It-nen it nak wene mbarogolar-e: ”No amanggim-nen nir-e yu me koreyak nak wat momtak yik karok worali-o?

⁴ Nit-nen o silmu nggwe mburul na nere-net wat mul-o. Yu me nak wulmul iri na war-et mul-o. Iri ala-ge, nir-e Siria nap-nen pak tak worali sa nde mburuwog-o. It-nen nde nondogola-ge, wat mul-o. Nde, keya nonpogola-ge, nunlug-et wulmul-o” yogolug-e,

⁵ o ndamuk yosola-ge, it na-ge Siria nap pak tak worali sa mbirigarik, wok yiganggal-e, iri me-ge ap misiger-o luk mbi mondok eneyagit lag-o.

⁶ Nde, iri na-ge Nagawan Indo-nen kwarak posolar-e, Siria nap eneyanggoma-ge ap kere nggok misik kura wam ombol pem koreluk mborogolat min wim pem mborogolat nggweyak koma min ene mbirip nggal kulurug-e, it-nen peragolar-e: ”Yu-ge Isarael nap nagawan-nen Et nap nagawan min Mesira nap nagawan min onggo wok endamu-nen it-nen idnak san ombo-ge nenpem kore yil lobok yili-o” peragolug-e,

⁷ kubu iri na-t Siria nap ereba na-ge kwiye mborogolar-e, unuwi lije min unkura wam min enkelerai wam min oboksa-ge it woraiga sa olo olosa mbilang karuk mbiriga-o.

⁸ Nde, ap empat marugot ndigiril laso enpem yidnak ereya na mbirigarik, Siria nap pak tak worali sa inggi nggwe wok yiga-o. Wok yogolar-e, o lije misik arem nggwigarik, nunggwi mende min yi min nonggolat, iri-nen emas min perak min yurugwi sum min ereba na wanuruk, kura bil mbiriga-o. Kura bil mbutluk, tuguruk lobok yogolar-e, o lije misik nggogolat na iri na nggal nag-et kwaril niga-o.

⁹ Iri kwarogolat-nen it nak wene mbarogolar-e: ”Nanggarag-o. Nit-nen kwatli yu-ge meya-t kwatli-o. Wene yu-ge konak wene-t me, mondok it yak unduwog-o. Nde, nit-nen nde yak indigit lag-et nene-t yulndig-e, mondok angin worak nenpem puwa-o. Iri ala-ge, wene yu-ge nagawan woraso sa yak indil mburuwog-o!” luk wene mbarak purug-e,

¹⁰ it na-ge tuguruk Samaria mbirigarik, o siri pak tumende yik karok woragwi ereba na enne mbo mbo bem yak ondogolar-e: ”Nir-e Siria nap pak tak woraiga sa mbirige-t nde, enpe-ge lak eneyaige-o. Kura wam min kelerai wam min ereba na-ge yilik iniksa nak keya buruk mborogolat, unuwi lije na worak iniksa nag-et keya buruk mbirikma kaige-o” luk yak indiga-o.

¹¹ Iri yogola, ap o pak tumende yik karok woragwi ereba na-nen wene iri na-ge enne nggoksa iri nggal-o yogola-ge, ap erep-nen-e erep konda nagawan woraso sa yak indiga-o.

¹² Iri tarem-e kubu-t nde, nagawan iri na-ge menluk, at nene yoso sa-nen mberarik, at eyabu wanugwi nap ereba na yak ondosolar-e: ”Kwara koler-o. Siria nap-nen kwarurak wene mbariga wene-ge an-e naru-o. Nit yu me nere worali iri-ge ir-e enaru-o. Enaru me, it iri-ge enpe-net nde, nit nunggwi mende kore pak ombol nggwe mborogola, nundurak puruk enpe-net walma kurak yil mbirigarik worali-o. Nit mborogola-ge, tena nunpuruk, nunuwi siri winde yuwokluk-nen yili-o” luk yak indij-o.

¹³ Yak ondosoloma-ge, nagawan eyabu wanoso nap misik-nen nagawan iri na yak tosolar-e: ”Nagawan wa-e. Nit o silmu worali yu-ge nunluk wulmul-e lag-o. Ap erep wat yiga ereba nggal-et wat mul-nen yusu-o. Iri bem-e nit-nen ap ereb-e kura wam worasu yeba enggendumu kura lima bem koreluk iri me kil mburuwak-nen wirik unpuwog-o” luk yak tij-o.

¹⁴ Iri lug-e, it-nen-e ap lenak inpikma, nagawan-nen-e ap ereya na-ge wim koma mberen arem mberer-o luk wirik onposolar-e, Siria nap san ombo ereba na-ge ngge nggal kwatli? enaru wolmakluk wirik inpij-o.

¹⁵ It na mbirigarig-e, Yi Yareren arem-et wok yil mbiriga-o. Nde, mborogolat-nen kagolar-e, tula tula ereba-ge Siria nap ereba na kwiye-nen mborogolar-e, yurugwi sum min yi mende ndi mende min tula tula ereba-ge mbo bogolat liring kil mbirikma karuk, it na tuguruk mborogolar-e, wene iri na-ge nagawan iri na yak tiga-o.

¹⁶ Iri yogola-ge, Samaria siri iri na me woragwi nab-e an meya kat meya pong kil mborogolar-e, Siria nap-nen pak tak woraiga sa ereba na-ge wirimikmik winde yiga-o. Nde, iri kwariga iri-ge Nagawan Indo-nen yosolar-e: ”Nggandum mbato konak nak angin-e tiga kilo min nggandum nin mende angin-e enam kilo min onggo-ge perak tol misiget nak puwag-o” yid iri na ndak ndag-et kwariga-o.

¹⁷ Nde, iri na tarem-e Isarael nap nagawan iri-nen-e at yongga woroso nap iri-ge o pak tumende yik karok wolmakluk ebem pamu, o pak tumende yik karok worasoma-ge, ap pong kil nggilaluk mborogolar-e, yemen karuk mburugwi komo mborogolar-e, ap yu na-ge unuwok-nen al tebara worak piga-o. Nde, iri kwat yid iri-ge nagawan iri Elisa eram mberamu, Elisa-nen yak tid iri na ndak ndag-et kwat yij-o.

¹⁸ Nde, iri-ge Elisa-nen nagawan iri na yak tosolar-e: ”Kub-e yanem nggal nggandum mbato konak angin-e tiga kilo min nggandum nin mende angin-e enam kilo min Samaria yu me-nen onggo-ge perak tol misiget nak wanuwa-o” yak tosola,

¹⁹ nagawan yongga woroso nap iri na-nen yosolar-e: ”Mondok Nagawan Indo at-nen yanem-et mbal tu kuwarak puwa-t nde, kat-nen yigen iri nggal-e mondok kwat ma bug-o” luk yosola, Elisa-nen onggo yosolar-e: ”Nunggwi mende ereba-ge kat kerengen-nen kagun-et nde, kar-e mondok mariget tet nunggun pug-o” luk yak tij-o.

²⁰ Iri na ndak ndag-et kwat yosolar-e, ap iri na-ge unuwok-nen yemen karuk mborogolar-e, o siri pak tumende bem iri me-t worak piga-o.