2 NAGAWAN NAGAWAN-NEN KWARIDNAK WENE 6 - Nanduk Ngget Tul Pidnak Wene

Ije woroksa mbidnak tuguruk nam yidnak wene 6:1-7

¹ Nde, misik tarem-e Mbal Pem Nagawan ene lomboksa yugwi nap Elisa-nen mul ondoso ereba na-nen Elisa yak togolar-e: ”Nit worali o-ge mondok maktag-o.

² Nir-e mburulndik, Yi Yareren eyak pem e ereba yunuruk lobok yulndik wururag-e nunggwirig-o?” luk yak togoloma-ge, Elisa-nen yak ondosolar-e: ”Ob-er-o yak indij-o.

³ Iri yosoloma-ge, it ennggendumu ap misik-nen-e Elisa-ge totno-t mburul-o luk emengen mbarosola-ge, Elisa-nen-e: ”Ob-er-o” yosolug-e,

⁴ lambuksa it inmin mbirigarik, Yi Yareren eyak pem wok yogolar-e, e ereba na yunuwokluk ndaril lobok yukmu-ge,

⁵ it ennggendumu ap misik e ndarosoma mimo ije-ge woroksa yi ma nggwij-o. Nggosola, ene nggoksa Elisa yak tosolar-e: ”Ije! Nombo wa-e! Yu-ge ap inije luru wanidnak me nde yi ma nggwij-o!” luk yak tij-o.

⁶ Yosoloma, Elisa-nen yosolar-e: ”Ije-ge ngge me mbij-o?” luk yak tosoloma-ge, ap iri na-nen-e ije mbid sa iri na me mirik ibij-o. Mirik obosoloma-ge, Elisa-nen-e e mbet marik mbi toboksa ije mbid iri na me mberak pil mbosola, ije iri na-ge yi ombolwak pem laringsa luwagij-o.

⁷ Luwasola-ge, Elisa-nen yosolar-e: ”Wani-o” yosoloma-ge, ap iri na-nen inggi mberak parik, ije iri na-ge wanij-o.

Siria nap san ombo urugwe nggwe rak inpidnak wene 6:8-23

⁸ Nde, misik tarem-e Siria nap nagawan iri na-nen Isarael nap inmin wim mbarij-o. Mbarosolar-e, san ombo ereba na inmin wene mbarogolar-e, wim nggogolat-nen wolmomtak sa o sare lit kil lobok yurak irit wene mbariga-o.

⁹ Alat nde, Elisa-nen Isarael nagawan iri na amanggim wene wosa pil mborosolar-e: ”Tula iri nggwe-ge Siria nap-nen pak tak worali me, tu iri nggwe-ge mbururak pug-o” luk aru rak pij-o.

¹⁰ Iri yamu-ge Isarael nagawan iri na-nen-e tula iri na nggwe korok korok woragwi nab-e kwara kwil kwalsa wolmakluk enaru rak inpij-o. Nde, Elisa-nen-e iri nggal kwasa Isarael nap nagawan iri na yak tosolat woragij-o.

¹¹ Iri kwarosola-ge, Siria nagawan iri na-ge isilepma pegera mbosolat woragij-o. Iri kwarosolar-e, Siria nagawan iri na-nen-e at-nen idnak san ombo wari ereba na wene mbo unpuruk-nen kin wok onposolar-e: ”Nit nennggendumu-ge ngarak koro mbi worali, lak? Iri-ge ta-nen it enambigit mbitli-o? Nam-et nak yak nururag-o!” luk yij-o.

¹² Iri luk kin wanosola, ap wim wari ereba na ennggendumu ap misik-nen onggo yosolar-e: ”Nagawan wa-e. Ap misiger-o luk mbi-nen iri kwatli bug-o. Are, Mbal Pem Nagawan ene lomboksa yoso nap Elisa iri na-nen-e kat nene yoso sa-nen wene kuraga yusu-t nde, oboksa Isarael nap nagawan iri na yak tosola-nen aru yusu-o” luk yij-o.

¹³ Yosoloma, nagawan iri na-nen wene wirik posolar-e: ”Kir-e at iri worasu sa iri-ge kwara mbenarer-o. Mondok tenagimin-o” luk yij-o. Yosoloma, ap-nen yak togolar-e: ”Elisa iri-ge o Ndotan worasu-o” luk yak tiga-o.

¹⁴ Iri yogola karuk, Siria nagawan iri na-nen iri na me ap inpil mborosolar-e, san ombo kere nggok misik kura wam ombolwak pem min nggweyak koma bem min-et inpil mbirij-o. Inpil mberamu, kubu iri na-t o iri na me wok yogolar-e, o siri iri na leget waniga-o.

¹⁵ Nde, kub-e kubu kabu Elisa ndegel oboso nap iri na wurungsa mbiridnggal-e, Siria nap san ombo-nen o siri iri na-ge lop lop worak worakmu, eneyagaij-o. Nde, it ereba na-ge ab-e kura wam ombolwak pem min nggweyak koma arem min mondok lid lud tak worakmu eneyagaij-o. Eneyarug-e, Elisa eram mborosolar-e: ”Nombo-o. Nir-e yawo-net mondok mena-o! Mondok ngge kwarul-o?” luk yak tij-o.

¹⁶ Yosoloma, Elisa-nen onggo yosolar-e: ”Kwiye kasu-ge meyog-o. Nit nenambigit yidnag-e kwarat worali-o. Nde, it enambigir-e marig-et nak-nen yusu-o” luk yak tij-o.

¹⁷ Yosoluk, Elisa-nen tepan yosolar-e: ”Nagawan Indo wa-e. Kat-nen an ndegel noboso nap yu-nen kwara kujwakluk erengen tu kuwarak pi-o” yosoloma, Nagawan Indo-nen Elisa ene kulurug-e, erengen tu kuwarak posoloma, Elisa ndegel oboso nap iri na-nen yik kagaidnggal-e, ndobo iri na bem-e kura wam kan mare nggal min nggweyak koma kan mare nggal min-nen mak yarik, Elisa lop lop worak woragola, eneyagaij-o.

¹⁸ Nde, Siria nap ereba na-nen enpem kore yogola, Elisa-nen tepan yosolar-e: ”Nagawan Indo wa-e. Ap yeba-ge enlengen ndamuk tak pi-o!” yosoloma, Nagawan Indo-nen Elisa-nen tepan yid iri na kulurug-e, ap ereba na-ge enlengen ndamuk tak pil lobok yij-o.

¹⁹ Enlengen ndamuk yil lobok yamu, Elisa na endam mborosolat-nen yak ondosolar-e: ”Kir-e kabak yili-o. O yu-ge kit-nen unu mbatluk lobok yigep iri na-ge lag-o. Kit-nen ogore lobok yigep nap iri eram an-nen ndemel kunpuruk mbereyeg-o. An nimbirik nak lobok yer-o” yak undurug-e, Elisa-nen-e lit unpuruk Samaria mbirij-o.

²⁰ Mbirigarik, Samaria siri iri na me-t nggogolar-e, Elisa-nen tepan yosolar-e: ”Nagawan Indo wa-e. It-nen kwara kujwakluk enlengen tu kuwarak pi-o” yosoloma, Nagawan Indo-nen Elisa-nen tepan yid iri na kulurug-e, ap yeba na enlengen tu kuwarak posoloma-nen nde yik kaiganggal-e, Samaria nde worakmu karug-e, wendet yiga-o.

²¹ Nde, Isarael nap nagawan iri na-nen Siria nap ereba na eneyaruk-nen Elisa kin wok obosolar-e: ”Nab-o. Ap yeba-ge mondok indimin, lak?” luk yak tij-o.

²² Yosoloma, Elisa-nen onggo yosolar-e: ”Wim nggogolat-nen kat-nen kugun pem wok inpidnak ereba-ge kesan min keyalawi bem ondoso-a? Iri ala, it yeba na undurak pug-o. Are, yi min nunggwi mende min mak unduruk, keya unpugunmu, tuguruk it-nen idnak nagawan eram mburuwag-o” luk yij-o.

²³ Yosoloma, Isarael nap nagawan iri na-nen nunggwi mende nggok saga mak unduruk, it-nen idnak nagawan eram wirik inpij-o. Nde, iri kwarid kuri-nen Siria nap-nen Isarael nap inmin wim mbatli iri na-ge larok yiga-o.

Samaria leget wanuruk woraiga wene 6:24–7:2

²⁴ Siyak woraruk misik tarem-e Siria nagawan Mbenarat iri na-nen-e Isarael nap undurak san ombo oboksa inmin lobok yarik, Samaria siri iri na leget waniga-o.

²⁵ Leget wa woragola-ge, iri-nen ndowaga o silmu-ge mondok nere kwarat woragolar-e, kelerai wam anggulwak mbarak misiget pem-e perak tol-e delapan pulu (80) pogolat, nde, towe merepati al ndok worak marig-et nak pem-et nde onggo-ge perak tol-e lima pogolat kwat tenak woraiga-o.

²⁶ Iri kwat tenak woragolar-e, misik tarem-e Isarael nap nagawan iri na o siri pak kerep iri na anggul pem waring kasoma-ge, kwe misik-nen yosolar-e: ”Nagawan wa-e. Yongga niri-o” luk ene nggoksa yij-o.

²⁷ Yosoloma, nagawan iri na-nen onggo yosolar-e: ”Nagawan Indo-net nde yongga kirigit lak yusu yu-ge an-nen-e nggesa-nen yongga kirimin-o? An-e nenggandum mbato na lak, nengen anggut amburu na mondok lak-nen yusu-o.

²⁸ No yongga kururak min yusu-o?” luk yak tij-o. Yosoloma, kwe iri na-nen yosolar-e: ”Lag-o. Kwe nanggam misik-nen-e: ’Kat kambara iri-ge yawo saguwog-o. Nde, kub-e an nambara yu sagul-o’ luk nemengen mbarosoloma,

²⁹ an nambara iri na-ge saga nurug-e, kub-e an-nen-e: ’Kat kambara iri na saguwog-o’ luk yak tigi-t nde, at ambara-ge kura bamu-o!” luk yak tij-o.

³⁰ Wene iri na kolosolug-e, indi abi kala mbosolar-e, nagawan iri na-ge usum ndela bela keya bij-o. Ndela keya bosola-ge, ap kerep pak eralu mendak woraiga ereba na-nen yik kagolar-e, abare sum arem nggwe-ge karung sum yirik kaiga-o.

³¹ Nde, nagawan iri na-nen ene nggoksa yosolar-e: ”Elisa-ge mondok yawo-t anggul mbarimin-o! Nde, lak nde ala-ge, Mbal Pem Nagawan-nen angin worak mondok kwiye worak nebem mberak puwag-o!” luk yij-o.

³² Iri yosoluk, nagawan iri na-nen-e ap misik ar-e abok tak posolat, nanduk Elisa eram wirik pil mbirij-o. Nde, iri tarem-e Elisa ama-ge o iri me-nen enne kulugwi nap ereba na nggwigarik woraiga-o. Nde, nagawan-nen nanduk ndimirik pil lobok yid iri na awo wok yigit lak ma-ge, Elisa-nen ap at eram nggwigarik worali ereba na yak ondosolar-e: ”Kenaru wolmer-o. Ap woroso nap iri na-nen an nurusu mbarurak wirik pidnak lobok yusu-o. Ap iri nde yanem lobok yosola-ge, ngguma naru mondok tu lerak purag-o. Nde, imbirig-e nagawan iri na lobok yuwa-o” luk yak indij-o.

³³ Nde, wene iri na yak ondosoma-ge, nagawan iri na pi iri me wok yosolat-nen yosolar-e: ”Anggun panggun yu-ge Nagawan Indo-nen nenpem pidnak kagit, no amanggim-nen at-nen yongga nunduwa-o luk at ebem