2 NAGAWAN NAGAWAN-NEN KWARIDNAK WENE 5 - Nanduk Ngget Tul Pidnak Wene

Naman ki rak pidnak wene 5:1-27

¹ Siria nap san ombo onowe nggok Naman ebem-nen Nagawan Indo-nen-e Siria nap san ombo-ge ombol nggwe rak inpidnak me, Siria nagawan iri na-nen-e Naman imin indi kundik irit woragij-o. Naman iri-ge wim wari mondok kwiye lak woraso-t nde, at ebem-e mondok marugot ndigiril laso kwiye worak iri ebem yilij-o.

² Nde, misik tarem-e Siria nap-nen Isarael nap enpem kore yogolar-e, Isarael ligwami misig-e wim pem waruk mbirigarik, Naman ogwe iri na ndegel obosolat woragij-o.

³ Nde, misik tarem-e Isarael ligwami iri na-nen kwe at-nen ndegel oboso Naman ogwe iri na yak tosolar-e: ”Kwe yu-ge wa-e. Naman nde Samaria mburuwarik nggal-nen-e mondok Mbal Pem Nagawan ene lomboksa yoso nap iri me worasu iri-nen-e ki rak ebeleb-o” luk yak tij-o.

⁴ Nde, Naman-nen wene iri na kulurug-e, Siria nagawan iri na eram mberarik, lagwe iri na-nen yid iri na yak tij-o.

⁵ Yosoloma, nagawan iri na-nen yosolar-e: ”Ob-o. Isarael nap nagawan iri eram mbiri-o. At amanggim-e an-nen engga mbarimin-o” yak tij-o. Yak tosoloma, Naman iri na mborosolar-e, perak tol tiga pulu ribu (30.000) min emas tol enam ribu (6.000) min yurugwi sum konak nak ondok min lombok sepulu min irit waruk mbirij-o.

⁶ Nde, engga mbarid iri-ge wene-ge yu nggal mbarij-o: ”Engga mbarak yu bem-nen an-nen idnak san ombo onowe Naman yu mirik kubusu-o. Kat-nen karuk, at ebem mbidnak marugot ndigiril laso iri-ge kat-nen ki rak obonokluk mirik kubusu-o” luk mbarij-o.

⁷ Isarael nagawan iri na-nen engga iri na wonatlug-e, indi wendet yosolat, usum ndela keya bosolat-nen yosolar-e: ”Mondok meya-o! Noluk-nen Siria nagawan iri-ge an-nen ap yu ki rak purak yak nirij-o? An-e Mbal Pem Nagawan nggal unluk tak posolat, lak tak onposolat kwaroso iri na nggal namawi worak ala-nen yij-a? Siria nagawan iri-ge an nimin yurak tu kore yosolat-nen yid kagi-o” luk yij-o.

⁸ At-nen wene yid iri na kuluruk, Mbal Pem Nagawan ene lomboksa yoso nap Elisa iri na-nen Isarael nap nagawan iri na eram wene pil mborosolar-e: ”Kar-e noluk kindi wendet yusu-o? Ap iri-nen-e Isarael yu me-ge Mbal Pem Nagawan ene lomboksa yoso nap mbi worasu-o luk aru makluk, ap iri-ge an neram pil lobok yi-o” luk wene pil mbirij-o.

⁹ Iri yosoloma-ge, Naman iri na-ge onggweyak koma iri na arem ngguruk, kura wam-nen lit karuk, Elisa ama mbirij-o. Mberarik, tu mende bem ndong yij-o.

¹⁰ Nde, Elisa-nen at ndegel oboso nap misik yak tosolar-e: ”Naman iri-ge yu nggal yak ti-o: ’Nab-o. Kar-e Yi Yareren arem-et mburugundik, tuju bem-et yi ma nggurag-o. Iri kwarosola-ge, ud ereba-ge mondok lak ma-o’ yak ti-o” luk yak tij-o.

¹¹ Yak tosola kulurug-e, Naman iri na mondok isilepma yosolat-nen yosolar-e: ”An nindi-nen yebet kasolar-e, Elisa ar-et neram wasolat, Nagawan Indo Embal Pem Nagawan eram tepan yosolat, an nebem ud yeba ambigit inggi puwa-o luk peragi-o.

¹² Nde, an-nen yi ma nggosola, ud ambut yurag-e yi-ge Ndamsik yi Abana min Patpat min-nen perak mondok konag-o. Nde, Isarael yu me-ge yi oboksa meya nak-nen yusu-o!” luk yij-o.

¹³ Alat nde, at ndegel ubugwi nap ereba na at eram panggo yogolat-nen yak togolar-e: ”Nab-o. Kat nde kwarurak meya nggesa nggal-et kebem pelepnggal-nen-e kar-e kwatleb-et irir-o. Nde, yu-ge we yi ma nak nggugun pem ki yurak nde yak kirij-o, nab-o” luk yak tiga-o.

¹⁴ Iri yak togola karug-e, Naman iri na Yi Yareren arem mberarik, yi ma yubuk luk men luk kwarosolar-e, Elisa-nen yak tid iri na ndak ndag-et tuju bem-et kwarij-o. Iri kwarosoma-ge, ud yeba na-ge oboksa lak yosolat, aboro-ge li marik enaboro nggal konak irit kwat yij-o.

¹⁵ Iri kwat yurug-e, at min at nduguluk nugwi nap oboksa inmin-e Elisa eram lobok yogolar-e, Naman-nen Elisa yak tosolar-e: ”Yi wi ndi wi oboksa-nen Mbal Pem Nagawan-e Isarael nap-nen erembel wanugwi misiget yu nak worasu-o. Iri bem-e an-nen we wok kirimin mende-ge mondok wanurag-o, nab-o” yak tij-o.

¹⁶ Yosoloma, Elisa-nen onggo yosolar-e: ”Nagawan Indo uruk nak woraso an-nen ndegel oboso iri na owag-o. Nde, an-e kat-nen wok nurugun mende-ge mondok mariget tet wanimin pug-o” luk yak tij-o. Nde, Naman-nen-e wanuwakluk mondok watsa emengen mbarij-et nde, Elisa-nen-e lembesa keya bij-o.

¹⁷ Keya bosoloma, Naman-nen Elisa yak tosolar-e: ”Nab-o. Kat-nen nde an-nen wok kirigi mende keya bosola-ge, an-nen-e o ya-nen tel korosolar-e, kugwiwak amanggim wam wosa pigit lak, Nagawan Indo amanggim nak peyek-nen kelerai wam mberen-nen nggweyak waruk mboroso ndak ndak nggweyak mbi waruk mbururag-e nunggwirig-o?

¹⁸ Nde, an nde an-nen idnak nagawan imin lambuksa Siria nap-nen erembel wanugwi kugwiwak Irimon uwi iri na me kugwiwak erembel wanurak nggosola-ge, Nagawan Indo-nen-e an-nen kwarimin iri-ge amberam tak puwag-o!” luk yij-o.

¹⁹ Yosoloma, Elisa-nen yosolar-e: ”Kar-e kalen min-et mbiri-o” yak tosoloma-ge, Naman iri na-ge mbirij-o. Nde, Naman iri na nggeret mberamu, marig-et worarug-e,

²⁰ Elisa ndegel oboso nap Nggekasi iri na-nen yebet kasolar-e: ”Noluk-nen Naman iri-ge onggo pigit lak keya nak ebamu mbirij-o? An neid Elisa-ge Siria nap iri-nen wok tidnak silobulo-ge wanurag-et nde, keya bij-a? Iri ala-ge, Nagawan Indo uruk nak woraso nggal-o, mondok imbirik muk kamindik, silobulo mbi-ge mondok wog-et nuruwag-o” perasolug-e,

²¹ Nggekasi iri na-ge Naman iri na imbirik muk kasola-ge, Naman-nen yik kagaidnggal-e ap mbi imbirik lobok yogola yik kagaij-o. Yik karuk, Naman iri na-ge nggweyak koma bem-nen mbosolar-e; ”Kar-e noluk lobok yigen-o?” luk kin wanij-o.

²² Yosoloma, Nggekasi-nen onggo yosolar-e: ”Nab-o. Mbal Pem Nagawan ene lomboksa yugwi nap mberen o ndobo worak Eperaim nggwe-nen nggeret lobok yogola karuk, an nombo Elisa-nen it wok undurak pem perak tol tiga ribu (3.000) min yurugwi sum konak ondok min mberen min wok noronok-nen nibil lobok yosola-nen lobok yigi-o” luk yij-o.

²³ Yosoloma, Naman-nen yosolar-e: ”Ob-er-o. Nde, perak tol enam ribu (6.000) irit wani-o” luk watsa yak turuk, Naman-nen-e perak tol-e ondoro mberen arem nggetla yarak puruk, yurugwi sum konak nak ondok min mberen wanuruk, at ndegel ubugwi nap mberen ereya na endam posolar-e: ”Ndak amanggim nanduk waga ibil mberer-o” yak endamu, waruk mbiriga-o.

²⁴ Waruk mbirigarik, Elisa woraso sa ndobo bem wok yogolar-e, Nggekasi-nen-e Naman ndegel ubugwi nap ereya na ininggem-nen perak tol min yurugwi sum min ereya na-ge wanij-o. Waga ama ndok worak purug-e, Naman ndegel ubugwi nap ereya na-ge wirik inpij-o.

²⁵ Wirik unpuruk, Nggekasi na-ge tuguruk o ma nggosoma-ge, Elisa-nen kin wok obosolar-e: ”Kar-e ngge me-nen lobok yusu-o?” yosoloma, at-nen onggo yosolar-e: ”Nombo-o. An-e yeba waring kagit lak, ma yeba-t worasu-o” luk yij-o.

²⁶ Alat nde, Elisa-nen yosolar-e: ”Naman-nen kat kimin lambuk yurak nggweyak koma bem-nen kapsa mbosola-ge, an nindi-ge iri me-t woragij-o. Nde, yu tarem-e sum min uang min wanuruk, saitun yabu onggo pogolat, anggut yabu onggo pogolat, lomba min sapi min onggo pogolat, ndegel unpurak nap onnggo pogolat kwarurak tarem-e lag-o!

²⁷ Kat-nen silobulo iri wanigen pem-e Naman ebem yid marugot ndigiril laso iri na min-et wanugun-o. Marugot ndigiril laso iri-ge lak yigit lak, pem irit kat-nen wigarak lolo-ge kenpem yosolat wolma-o” luk yak tij-o. Yosoloma, Nggekasi iri na iri me-nen mbiridnggal-e, mondok marugot ndigiril laso ebem lenggek yidnak me, aboro-ge loro mbereng tak irit mbirij-o.