2 NAGAWAN NAGAWAN-NEN KWARIDNAK WENE 4 - Nanduk Ngget Tul Pidnak Wene

Elisa-nen kwe togwe arengge lak misik yongga wiridnak wene 4:1-7

¹ Nde, misik tarem-e Mbal Pem Nagawan ene lomboksa yugwi nap ereba na ennggendumu ap misik ogwe togwe mbi-nen Elisa eram mberarik-nen yak tosolar-e: ”Nab-o. Kar-e karu-o. An nun-e Mbal Pem Nagawan aye worak nab-er-o. Nde, ar-e wat yamu-o. Nde, at-nen ap misik arengge namat wanidnak pem arengge ombo iri na lobok yarik, onggo-ge an nilirak mberen at ndegel uburak waneyekluk yusu-o” luk yak tij-o.

² Yosoloma, Elisa-nen kwe iri na yak tosolar-e: ”Niya-o. An-nen-e nggesa yongga kirimin-o?” yosoluk-nen kin wanosolar-e: ”Kat kama-ge karengge-ge no mende no mende worasu-o?” luk yak tosola, kwe iri na-nen yak tosolar-e: ”An narengge-ge mondok lag-o. Alat nde, saitun engen amburu nak perak embe marik arem marig-et nak worasu-o” luk yij-o.

³ Yosoloma, Elisa-nen yosolar-e: ”Kar-e mburugundik, kenggamirak keram worali ereba enpem amburu kenanggugwi ondoro owak ereba ’Luru wok nerer-o’ yak indi-o.

⁴ Wok korogola-ge, kat min kilirak min tu lesa ma nggogolar-e, amburu kenanggo iri na wanogolug-e, ondoro wanugun ereba na arem wonanggarosoma, kobong yosola-ge, lena arik tak pogolat kwaril lobok yer-o” luk yak tij-o.

⁵ Yak tosoloma, kwe togwe iri na ama mberarik, ilirak inmin ma tu lesa nggogolar-e, kwe iri na-nen-e embe marik saitun amburu kenanggo iri na wanosolug-e, ilirak-nen embe ereba inggem tak pogola, at-nen-e wonanggaril lobok yij-o.

⁶ Nde, embe ereba na oboksa kobong tak purug-e, kwe iri na-nen embe misik nggi yosoloma-ge, at ilirak ereba na ennggendumu at misik-nen yosolar-e: ”Embe abu lak yij-o” yosola ereya na-net amburu iri na-ge pok yij-o.

⁷ Iri luk, kwe iri na Elisa eram tuguruk mborosola, Elisa-nen yak tosolar-e: ”Amburu ereba-ge namat oboksa iri na uwi yagonok-nen onggo wani-o. Nde, namat mbatluk, uang minggirig-e kat kilirak inmin kunluk worabok-nen winde yer-o” luk yak tij-o.

Elisa min kwe arengge worak Sunem kwe min-nen kwaridnak wene 4:8-37

⁸ Nde, o Sunem iri me-ge kwe arengge worak mbi woragij-o. Nde, misik tarem-e Elisa iri na-ge Sunem mbirij-o. Mberarik pem-e kwe iri na-nen nunggwi mende at ama-nen norak yonggo ibij-o. Nde, iri tarem-nen tel korarig-e, Elisa iri na pempa Sunem wok yosolar-e, nunggwi mende-ge kwe iri na ama-nen nok tenak woragij-o.

⁹ Worala-ge, kwe iri na-nen un yak tosolar-e: ”An-nen-e ap yu me pempa wok yusu yu-ge ndemeret Mbal Pem Nagawan ndegel oboso nap-nen yusu-o luk eberasu-o.

¹⁰ Iri ala karug-e, nit nenma yu me silabaga ondoro marik misik kuri wosa wat turuk, arem-e nene yurak ondoro min engga mbarurak ondoro min koreyak wolmomtak ondoro min tal min kona pulmu, at nde pempa nendam lobok yosolar-e, iri me nene yosolat wolmag-o” luk yak tij-o.

¹¹ Nde, misik tarem-e Elisa iri na-ge Sunem lobok yarig-e, ondoro wat tiga iri na me ababok kwaril lagaij-o.

¹² At-nen at ndegel oboso nap Nggekasi iri na yak tosolar-e: ”Kwe iri na wene mbo ibi-o” yamu, wene mbo bamu wok yosola-ge,

¹³ Elisa-nen Nggekasi yak tosolar-e: ”Kat-nen kwe yu kin wanosolar-e: ’Nit nenmanggim kwarosolat kirigak mbid iri na-ge onggo-ge no nggal kwarimin-o? Erep-nen-e kat kindi-nen perasolar-e, an-e nagawan min san ombo onowe min endam mbutluk, at-nen ukwe mende amanggim wene mbarurak arem pidnak worasu, lak?’ luk kin wok ibi-o” luk yak tij-o. Yosoloma, kwe iri na-nen yosolar-e: ”An-e nowe nowot ennggendumu-t woralat me, an-e yi mende ndi mende ukwe lak irit worasu-o” luk yij-o.

¹⁴ Yosoloma, Elisa-nen Nggekasi kin wok obosolar-e: ”Iri ala-ge, an-e kwe iri-ge no mende kwat ibimin-o?” yij-o. Yosoloma, Nggekasi-nen onggo yosolar-e: ”Neij-o. Ar-e ela lak. Nde, un iri na indi worag-o” luk yak tij-o.

¹⁵ Yosoloma, Elisa-nen yosolar-e: ”Kwe iri wene mbo ibi-o” yamu, wene mbo ebamu-ge, kwe iri na-ge lobok yarik tu mende bem men yosola-ge,

¹⁶ Elisa-nen kwe iri na yak tosolar-e: ”Olengen abok yu bem-e yanem ya nggal pem-e liap misik kinggem nugun-o” yak tij-o. Yak tosoloma-ge, kwe iri na-nen yosolar-e: ”Nab-o. Kar-e Mbal Pem Nagawan ndegel oboso nap-net nde, kenesiget yak nurusu-ge meyog-o!” luk yak tij-o.

¹⁷ Alat nde, Elisa-nen yid iri na ndak ndag-et kwat yosolar-e, olengen misik iri na bem Elisa-nen yak tid iri na tarem ndak ndak nggal pem-et liap misik ndagij-o.

¹⁸ Nde, la iri na nggok pem-e nggandum mbarugwi tarem-e la iri na-ge mberarik, eid iri na nggandum mbarugwi nap inmin nggandum mbato yapmu worasoma, eram mbirij-o.

¹⁹ Mberarik worasoma-ge, mimo la iri na-nen: ”Nanggul-e! Nanggul-e!” luk ene nggoksa eid yak tosoloma-ge, eid iri na-nen ndegel oboso nap misik yak tosolar-e; ”La yu-ge ija eram waruk mbiri-o” yak tij-o.

²⁰ Yosoloma, la iri na ija eram pil mborosoma-ge, ija-nen-e la iri na-ge abem puruk worasoma-ge, lenggesilmu-ge la iri na-ge wat yij-o.

²¹ Wat yosoloma-ge, ija-nen-e la iri na-ge Elisa woraso sa o kuri worak teram iri na me waruk lagarik, Elisa nene yoso sa mbinggirik posolug-e, tu lerak puruk mbuwagij-o.

²² Wasolar-e, un eram ene pil mbirij-o. Pil mborosolar-e: ”Ndegel koboso nap misik kelerai wam misik waruk lobok yuwak-nen yak ti-o. An-e Mbal Pem Nagawan ene lomboksa yoso nap Elisa iri na eram mbirimindik, ndag-et nak lobok yuwom-o” luk yak tij-o.

²³ Yosoloma, un-nen kin wanosolar-e: ”Noluk-nen yawo-t mbururak yusu-o? Yawo-ge we woragwi tarem na lak, iri-nen waneya ngget arem nggogolat nggok sakwi tarem na lak, yu-t nde” luk yak tij-o. Yosoloma, kwe iri na-nen yosolar-e: ”Irit nde, mbirimin-o” luk yak tij-o.

²⁴ Kelerai wam iri na bem kore yurak ondoro iri na posolug-e, at-nen ndegel oboso nap iri na yak tosolar-e: ”Mondok ndag-et ndag-et mburuwakluk ndag-et ndumuluk mbururag-o. An-nen yak kirigit lak ma-ge kebeyo rak purak pug-o” luk yak tij-o.

²⁵ Yak tosolug-e, kwe iri na-ge Elisa woraso sa Karamel Ndobo bem mbirij-o. Mborosola-ge, Elisa-nen-e kwe iri na lobok yosola erepma ereba-t yik kil mbirij-o. Yik karuk, Elisa-nen Nggekasi yak tosolar-e: ”Kwe Sunem woraso iri na lobok yusu iri ki-o!

²⁶ Kar-e ndag-et nak mburugundik, eram wok luk, kin wok obosolar-e: ’Kat min kun min kambara min-e konag-et worali, lak?’ luk kin wani-o” yak tij-o. Nde, kin wanosoloma-ge, kwe iri na-nen Nggekasi yak tosolar-e: ”Nir-e konag-et worali-o” luk yij-o.

²⁷ Alat nde, kwe iri na Elisa eram lobok yosolar-e, Elisa owak tena buruk, erare nggwe tud yosola karuk, Nggekasi-nen-e kwe iri na langgara wirik peyekluk yij-et nde, Elisa-nen yosolar-e: ”Keya bi-o. Ar-e indi abi kalok yidnak-nen nggal kwarusu-o. Alat nde, Nagawan Indo-nen-e wene-ge marig-et tet yak nurusu bug-o” luk yak tij-o.

²⁸ Kwe iri na-nen yosolar-e: ”Nab-o. An-nen-e kat kimin-e la mbi wok niri-o luk kat kebem nggi yigit lag-o. An-nen na: ”Kar-e ebe lak wene yak nurusu-ge meyog-o’ luk yak kirigi nar-o” luk yak tij-o.

²⁹ Yosoloma, Elisa-nen nden kaga Nggekasi iri na yik karuk yak tosolar-e: ”Kar-e an nowangun iri wanuruk, nok mburugundik, kwe yu ama wok yosolar-e, la iri bem purag-o. Nde, tu ndumu ap-nen nde wa yak korogola-ge, onggo wa yak ondosolat ndag-et mburugun puk me, mondok wa yak undurak pug-o” luk yak tij-o.

³⁰ Nde, kwe iri na-nen yosolar-e: ”Nombo Elisa wa-e. Nagawan Indo uruk nak woraso min kat min kenarik konowag-o. An-e mondok keya kibimin pug-o” yosoloma-ge, Elisa na-ge kwe iri totno at ama mbiriga-o.

³¹ Nde, Nggekasi iri na-ge Elisa owangun iri na la iri na ebem purak pem nanduk mberarik, la iri na ebem wangun iri na pij-et nde, la iri na uruk ma-o luk yenggerak purak mende usune marig-et tet mbi yigit lag-o. Iri ala karuk, Nggekasi na-ge Elisa lobok yosoma, abuwok mberarik-nen yak tosolar-e: ”La iri na-ge mondok men yigit lak nak worasu-o” yak tij-o.

³² Nde, Elisa iri na kwe iri na ama wok yosolar-e, at arig-et nak at amanggim ondoro koniga iri na nggwidnggal-e, la lugwinik iri na-ge at nene yoso ondoroma lugwinik keyok tak worasoma kagaij-o.

³³ Karug-e, Elisa-nen-e tu lerak puruk, Nagawan Indo eram tepan yij-o.

³⁴ Iri lug-e, la iri na imid pem yebaksa mbiring yosolat, at emnde min erengen min inggi min-e la iri na emnde min erengen min inggi min ebem ndak ndaksa pij-o. Iri kwarosola-ge, la iri na-ge embem wok yij-o.

³⁵ Iri yosola, Elisa-ge pugak luk men yosolar-e, o ma iri na me lobok lik mbitlik kwatluk, tuguruk iri na nggal-et kwasa la iri na ebem yebaksa mbiring yij-o. Iri kwarosoma-ge, la iri na-ge siklag-e tuju bem-et yij-o. Iri lug-e, erengen pengge yij-o.

³⁶ Elisa-nen Nggekasi yak tosolar-e: ”La yu ija wene mbo ibi-o” yak tamu, wene mbo buruk, kwe iri na lobok yarig-e, ma nggwij-o. Nggosola, Elisa-nen yak tosolar-e: ”Kambara na-ge yu-o” yak tij-o.

³⁷ Yosoloma-ge, kwe iri na-ge Elisa eram tud yosolug-e, ambara iri na waruk mbirij-o.

Tuguruk kwiye worak mende mberen kwarid wene 4:38-44

³⁸ Nde, misik tarem-e yi wi ndi wi oboksa nogoro wok yij-o. Wok yosola-ge, Elisa iri na-ge tuguruk Nggil Nggal lobok yarik, Mbal Pem Nagawan ene lomboksa yugwi nap sekola mirik onposolar-e, at ndegel oboso nap iri na yak tosolar-e: ”Togolwak nggok wanugundik, enmanggim nunggwi mende sagi-o” yak tij-o.

³⁹ Nde, at-nen sekola mirik onposo nap misiget yapmu mberarik, nagamburu nggal erambet yak yoso mende misik karug-e, ebe kwarat mbatluk lobok yosolar-e, iri mende engen-o luk aru buk ereba-net engen iri na-ge mbarep parep togolwak iri na arem pil nggwij-o.

⁴⁰ Nde, sak yosoloma-ge, tembesa Mbal Pem Nagawan ene lomboksa yugwi nap ereba na wok indil lobok luk, nggeret enemndam pukmu ereya na-net yogolar-e: ”Elisa wa-e. Yu-ge mondok ninggis mende-o” lug-e, mondok ninggit lak keya biga-o.

⁴¹ Iri yogola karuk, Elisa-nen: ”Nggandum mbato yigirik siyak wok nerer-o” luk, nggandum mbato yigirik iri na togolwak arem pil nggosoluk-nen yosolar-e: ”Nunggwi mende ereba-ge tuguruk temberer-o” yamu, timbirigarik nunggukmu-ge, konak irit kaiga-o.

⁴² Nde, misik tarem-e ap misig-e o Mbaal-Salisa-nen lobok yosolar-e, nggandum mbato ngget mbarak min olengen iri arem-nen nggandum mbato nandug-et ngget mbara pidnak pem-nen woraidnak oroti dua pulu min irit Elisa wok til lobok yamu-ge, Elisa-nen-e: ”Mbal Pem Nagawan ene lomboksa yugwi nap ereba na tembet indi-o” luk ndegel oboso nap iri na yak tij-et nde,

⁴³ ndegel oboso nap iri na-nen yosolar-e: ”Ap seratus yu nggal-e ndak norag-e meya-o” luk yosoloma, Elisa-nen yosolar-e: ”Nagawan Indo-nen yosolar-e: ’Ir-e nujwa-t nde, minggirig-et keya buwa-o’ luk yidnak me, nujwakluk tembet nak indi-o” yak tij-o.

⁴⁴ Yosoloma, ndegel oboso nap iri na-nen-e it oboksa nunggwi mende iri na-ge tembet endamu, ningga-t nde, Nagawan Indo-nen yid iri na ndak ndag-et erep minggirik keya biga-o.