2 NAGAWAN NAGAWAN-NEN KWARIDNAK WENE 25 - Nanduk Ngget Tul Pidnak Wene

O Yerusalem wim nap ininggem mbidnak wene 25:1-7

¹ Nde, Nagawan Sendekia na-nen-e Mbabilonia Nagawan Nebukatnesat iri na imin eyak worosola karug-e, waneya sepulu tanggal na sepulu bem-et Sendekia nagawan woralat olengen sembilan arem worasoma-ge, Nagawan Nebukatnesat iri na-ge at-nen idnak san ombo oboksa inmin lobok yosolar-e, O Yerusalem ebem kore yij-o. Iri kwarogolar-e, o siri pak ombol nggwe unuwi lije wiril lobok yogoluk, kerep pak leget waga kut worak unpuruk, woraiga-o.

² Leget wa unpuruk irit woragola-ge, Sendekia-nen o tena woralar-e, olengen sebelas irit yij-o.

³ Nde, olengen sebelas iri arem waneya empat tak posolat tanggal sembilan iri bem-e nogoro nggok irit mbud yosolat, mondok ap oboksa-nen nunggwi mende abu lak yidnak iri na tarem-e

⁴ o siri pak iri na-ge wim nap-nen ndamiriga-o. Nde, kubu iri na-t Mbabilonia nap-nen lop lop worak woragola-t nde, Yewura nap san ombo oboksa-ge Yareren mbirik iri na ambigit kwiye mborogolar-e, tu-ge nagawan woraso sa iri na me-nen kudtak amanggim e wi kere wi yagidnak iri na nggwe mbirigarik, kerep pak leget ponok ponok erep kundidnak sa tumende iri na nggwe mbiriga-o.

⁵ Alat nde, Mbabilonia nap san ombo-nen-e Sendekia iri na-ge muk kaigarik, Yeriko mbirikmu-nen tenakola-ge, at-nen idnak san ombo pidsa at keya uburuk, ndibi ndi yiga-o.

⁶ Nde, Nagawan Sendekia iri na-ge tenaguruk, Nagawan Nebukatnesat eram o Iripla waruk mbirikma, angin worak ebem posolat, andi bandi rak ibij-o.

⁷ Nde, at ambararag-e at erengen pem iri-net indiga-o. Iri rak purug-e, Sendekia iri na-ge erengen kela keya buruk, posid kere bem kamatluk, Mbabilonia waruk mbiriga-o.

Nagawan Indo uwi mijaridnak wene 25:8-17

⁸ Mbabilonia nap Nagawan Nebukatnesat-nen o tena woralat olengen sembilan belas waneya lima tanggal tuju iri bem-e ap misik unu-ge Nebusarandan iri-ge Yerusalem lobok yij-o. At iri-ge nagawan indi tenagoso nap, Nebukatnesat-nen idnak san ombo ereba na enanggul pem san ombo onowe nggog-o.

⁹ Nebusarandan iri na-nen-e Nagawan Indo uwi iri na min o nagawan woraso sa iri na min Yerusalem woragwi ap yok nggok unuwi ereba na min oboksa kan pij-o.

¹⁰ Nde, at owosirak-nen-e o siri iri pak leget ereba na-ge ndamera ngguru rek piga-o.

¹¹ Iri rak purug-e, yabu wanugwi enaru nap Yerusalem iri me erep keya inpidnak ereba na min insilobulo lak nap min it Mbabilonia nap enambigit yidnak nap ereba na min oboksa Nebusarandan-nen-e Mbabilonia inmin mbirij-o.

¹² Alat nde, ap mondok enlengenma lak ereba na-ge Yewura iri me keya unpuruk, anggut yabu min yabu erep min wanogolat wolmakluk enpem pij-o.

¹³ Nde, Nagawan Indo ama woraso tembaga-nen konidnak o owak ereba na min nggweyak koma min tembaga-nen konidnak yi kenanggo woraso ondoro nggok min oboksa Mbabilonia nap-nen ndamera keya bogolat, tembaga ereba na-ge it enma Mbabilonia mburunuruk mbiriga-o.

¹⁴ Iri-nen silobulo erep nggweyak tege min wam wosa kan pugwi mabe ndok wosa pugwi ondoro min Mbal Pem Nagawan ama tal pakwi mende min Mbal Pem Nagawan amanggim wam wosa pogolat wam eyabi kenangga pugwi ondoro embe min emben konak mende kan pugwi yarak woraso ondoro embe min iri-nen tembaga-nen konidnak Mbal Pem Nagawan ama iri me yabu wanogolat-nen kwarugwi murugwi silobulo erep min-et oboksa mberena waruk mbiriga-o.

¹⁵ Emas min perak min-nen konidnak silobulo yi kenanggugwi embe marik min kan ngen ndamugwi piring min ereba na-ge at Nebusarandan-nen wanij-o.

¹⁶ Nde, Nagawan Indo uwi wiridnak Nagawan Salomo-nen tembaga-nen konid o owak mberen min nggweyak koma ereba na min yi kenanggo woraso ondoro nggok min ereba na-ge angin worak me, angin ndak wururag-e meya yij-o.

¹⁷ Nde, tembaga-nen konidnak o owak mberen ereya na-ge mor-e 8 meter-o. Nde, owak ereya eraret pem-e tembaga bem anggulwak ndak worak pidnak ereya na mor-e 1,3 meter-o. Nde, anggulwak ndak worak piga ereya na bem-e tembaga bem kere lara mendaga puruk, engen ndelima ndak wosa piga-o. Nde, o owak mberen ereya na-ge mondok ndak ndak nag-o.

Yewura nap mberena o Mbabilonia inmin mbiridnak wene 25:18-21

^18-19 Nde, Nebusarandan iri-nen erep kwarij-e, tepan ombo kek tak Seraya min at indipma tepan ombo Sepania min Nagawan Indo uwi tumende yik karok pak tak woragwi nap kenan min nagawan indi tenakwi nap enpe lima min san ombo onowe iri na min san ombo onowe iri na indipma san ombo nggurak pem ap wok onposo iri na min iri-nen ap nggok nak enpe enam pulu (60) erep min-et oboksa tena inpij-o.

²⁰ Nde, Nebusarandan iri na-nen-e ap ereba oboksa-ge Mbabilonia Nagawan Nebukatnesat eram o Iripla silmu wok unpuruk mbirij-o.

²¹ Nde, o Iripla iri-ge Amat nggweyak pem woragij-o. Ereba me-nen-e andi bandi rak unpuruk, indiga-o. Iri nggal kwasa Yewura nab-e enma-nen pendega wok unpuruk mbirigarik, ap enma ereba mbo inpil mbiriga-o.

Ap Nggendalya Yewura iri me Ngguberenot men yidnak wene 25:22-26

²² Iri rak unpuruk ombol nggwe-ge Mbabilonia nagawan Nebukatnesat-nen-e Yewura nap erep keya inpidnak ereba na enanggul pem Sapan ambara Aikam-nen ndagid Nggendalya iri na-ge it tena unpuruk wolmakluk Ngguberenot mendak pij-o.

²³ Iri rak pamu, Yewura nap san ombo onowe min san ombo erep Mbabilonia nap enambigit yigit lak nap ereba na-nen kolel kaiganggal-e, Nggendalya iri na Ngguberenot mendak pidnak wene kulurug-e, Nggendalya iri na eram o Mispa lobok yiga-o. Nde, it lobok yiga-ge, Netania ambara Ismael min Karea ambara Yoanan min o Netapa nap Tagumet ambara Seraya min Maka nap Yasania min irit lobok yogola,

²⁴ Nggendalya-nen it oboksa yak ondosolar-e: ”Kir-e Mbabilonia nap o tena woragwi nap ereba-ge enaye-ge kudtak pug-o. Kit kinmiri yurak iri-ge an nebem worasu-o. Kir-e yeba-t woragolat, Mbabilonia nagawan nak ndegel ubugwi nap kwatluk wolmomtag-o” luk yak indij-o.

²⁵ Alat nde, olengen iri arem-et waneya tuju iri bem-e nagawan-nen wigarak Elisama ambara Natania-nen ndagid Ismael iri na-ge ap sepulu inmin o Mispa mbirij-o. Mberarig-e, Nggendalya min Yewura nap min Mbabilonia nap min Nggendalya imin worali ereba na enpem mbud yogolat, mondok indiga-o.

²⁶ Indikma-ge, Yewura nap insilobulo worak nap-nen insilobulo lak nap-nen oboksa-ge san ombo wari ereba na min Mbabilonia nap enaye-nen kwiye Mesira mbiriga-o.

Yoyakin o kubu me-nen wirik pidnak wene 25:27-30

²⁷ Yewura nap nagawan Yoyakin iri na kamatluk mbirigarik, ombol nggwe olengen tiga pulu tuju (37) iri arem waneya duabelas tanggal dua pulu tuju (27) iri bem-e ap Ewil-Merondak irit Mbabilonia iri me nagawan men yij-o. Olengen iri arem-net Nagawan Yoyakin iri na-ge at-nen-e abuwa karuk, o kubu me-nen lerak keya bij-o.

²⁸ Ewil-Merondak iri na-nen-e Yoyakin iri na-ge konag-et kwat obosolat, nagawan nagawan erep Mbabilonia iri me mbo inpil mbiridnak nab-e kek tak inpigit lak yosolar-et nde, Yoyakin iri na-ge abuwa nggok irit kasolar-e, kek tak ibij-o.

^29-30 Nde, Yoyakin iri-ge usum-e o kubu me woragolat-nen yurugwi sum-e yirigit lak, nunggwi mende na nagawan woraso sa iri me-nen nasolat, at-nen ukwe yidnak onggo purak na tol-e wog-et tosolat irit woragij-o.