2 NAGAWAN NAGAWAN-NEN KWARIDNAK WENE 24 - Nanduk Ngget Tul Pidnak Wene

Yoyakin iri na Yewura nagawan men yidnak wene 24:8-17

⁸ Yoyakin na-ge olengen delapan belas pem-e Yewura nap ennggendumu nagawan menluk, Yerusalem tena woralar-e, waneya kenan woragij-o. Ija unu-ge Neusta. Nde, Neusta iri-ge Yerusalem nap Elnatan ara-o.

⁹ Yoyakin iri na-ge eid-nen kwaroso nggal-et Nagawan Indo imin meya kwarosolat woragij-o.

¹⁰ Nde, Yoyakin-nen o tena worala tarem-e Nagawan Nebukatnesat-nen idnak san ombo wari ereba na-nen Mbabilonia san ombo anggul tak puruk lobok yogolar-e, o Yerusalem siri iri na ebem kore yogolat, leget wanuruk woraiga-o.

¹¹ Nde, o Yerusalem siri iri lop lop worak worakmu-ge, Nebukatnesat ar-et Yerusalem iri me lobok yij-o.

¹² Lobok yosolar-e, Nagawan Yoyakin min ija min ilirak min at-nen idnak san ombo wari ereba na inmin at woraso sa yabu wanugwi nap min ereba na-ge Nebukatnesat eram kegera lobok yiga-o. Iri yogola-ge, Yoyakin iri na-ge ininggiyapma puruk woraiga-o. Iri kwariga iri-ge Nebukatnesat-nen nagawan menluk olengen delapan pem tak posolat tarem-nen kwariga-o.

¹³ Nagawan Indo uwi iri na arem woraso mende Salomo-nen emas pem konil lobok yidnak ereba na oboksa-ge Nebukatnesat nggosolar-e, ndamera ligik pil lobok yurug-e, silobulo onggo nggok pugwi Nagawan Indo ama iri na me woraso min nagawan woraso sa woraso min ereba na-ge oboksa punduguruk Mbabilonia waruk mbirij-o. Nde, iri kwarid iri-ge iri nggal kwat yigit lak ma abuwokma-nen Nagawan Indo-nen urul yid iri na ndak ndag-et kwarij-o.

^14-16 Iri kwarosolar-e, Nebukatnesat-nen-e Nagawan Yoyakin min ija min ogwerak min at eyabu wanugwi nap min Yewura nap ennggendumu-nen enne kulugwi nap min ap enmawi worak oboksa enpe tuju ribu (7.000) irit kamat unpuruk, mberena Mbabilonia wok unpuruk mbirij-o. Iri-nen ap yabu wanugwi enaru nap min mbesi konugwi enaru nap min enpe-ge seribu irit wok unpuruk mbirij-o. Nde, it ereba na oboksa enmawi worak, san wari nak irit inmin mbirij-o. Iri-nen nagawan-nen wigarak nap min ap unu worak nap min oboksa enpe sepulu ribu (10.000) irit ap mbo inpil mburugwi sa Mbabilonia iri me inpil mbirij-o. Nde, Yerusalem woragwi nab-e oboksa pendega wok unpuruk mborogolat, enpe ap insilobulo lak nap ereba na nak keya inpij-o.

¹⁷ Nde, abok nggwe Nebukatnesat-nen-e Yoyakin ereb-et Matanya Yoyakin ondolma Yewura nap enanggul pem nagawan mendak posolat, unu-ge Sendekia yarij-o.

Sendekia iri-ge Yewura nap nagawan woragid wene 24:18-20

¹⁸ Sendekia iri-ge olengen dua pulu satu (21) worarug-e, ar-e Yewura nap ennggendumu nagawan menluk, Yerusalem iri me o tena woralar-e, olengen sebelas irit woragij-o. Nde, ija unu-ge Amutal. Nde, Amutal iri-ge o Lipna nap Yeremia ara-o.

¹⁹ Nde, Nagawan Sendekia iri na-ge Nagawan Yoyakim-nen kwaroso nggal-et Nagawan Indo imin meya nak kwarosolat woragij-o.

²⁰ Iri kwarosola-ge, Nagawan Indo-ge Yerusalem woragwi nap min Yewura nap min ereba na enpem isilepma puruk, mondok yongga indigit lak keya inpij-o.