2 NAGAWAN NAGAWAN-NEN KWARIDNAK WENE 23 - Nanduk Ngget Tul Pidnak Wene

Yosia-nen kugwiwak erembel wanugwi ereba na lak tak pid wene 23:1-20

¹ Nagawan Yosia-nen-e Yewura nap min Yerusalem woragwi nap min ennggendumu-nen enne kulugwi nap ereba na wene mbo inpij-o.

^2-3 Wene mbo unpurug-e, ar-e totno lambuksa Nagawan Indo ama mbiriga-o. Mborogolar-e, tepan ombo min Mbal Pem Nagawan ene lomboksa yugwi nap min insilobulo worak nap-nen na irit, insilobulo lak nap-nen na irit oboksa inmin mbiriga-o. Mbirigarik, nagawan nak-nen mendak wolmakluk e sindidnak sa iri na me mendak woralat-nen Nagawan Yosia-nen ap ereba na oboksa inmbiri bem ”Iri nggal kwat kinpimin-o” luk urul yaga mbaridnak engga Nagawan Indo ama-nen kaidnak engga iri na arem mbarak worasu ereba na-ge Yosia-nen-e mondok ene nggoksa ap ereba-nen kuluwakluk wonarij-o. Iri luk, Nagawan Yosia-nen Nagawan Indo imin urul posolar-e: ”An-e kat-nen yidnak yidnak nak kwarosolat, ndemeret nindi min nebe min ebis-et kat-nen ’Iri nggal kwarurag-o’ luk nebem pidnak wene min kat-nen idnak imiri mbarak pidnak wene min mondok ndak ndag-et kwarimin-o” luk urul pij-o. Iri luk, Nagawan Yosia-nen tuguruk yosolar-e: ”Nagawan Indo kat-nen kat kilirak inmin urul pidnak wene engga iri arem mbarak worasu ereba na ndak ndag-et kwarul-o” luk urul pij-o. Iri yosola-ge, Isarael nap oboksa-nen-e: ”Kat-nen yidnak yidnak irit kwarul-o” luk urul piga-o.

⁴ Iri luk, Nagawan Yosia-nen tepan ombo kek tak Ilkia min at yongga wurugwi nap tepan ombo erep min Nagawan Indo uwi tumende bem yik karok woragwi nap ereba na min yak ondosolar-e: ”Kugwi Mbaal min Ndewi Asera min wonaru min erembel wanugwi mende Mbal Pem Nagawan ama worasu ereba na mondok oboksa pendaga pil wumer-o” luk yak endamu, pil wagola-ge, Nagawan Yosia-nen-e ereba na-ge oboksa o siri pak ombol nggwe Kitoron Mbirik ereba na me kan pij-o. Kan posola, mabe-ge Mbetel waruk mbiriga-o.

⁵ Iri rak purug-e, Yewura nggweyak pem o siri lombok-nen na irit, Yerusalem inggi inggi ereba me-nen na irit kugwiwak erembel wanogolat wolmakluk kugwiwak ombo Yewura nagawan nagawan-nen mendak inpil lobok yiga ereba na-ge Yosia-nen-e we rak inpij-o. Iri-nen kugwi Mbaal min mo min waneya min wonaru nggok o yu nggal min wonaru min amanggim wam wosa kan pugwi nap ereba oboksa-ge Yosia-nen-e we rak inpij-o.

⁶ Nde, kugwi Ndewi Asera ndak worak Mbal Pem Nagawan ama worasu iri na-ge waga mbepme pil waruk, o siri pak ombol nggwe Kitoron Mbirik ereba me kan puruk, kansik iri na-ge ndamera mabe nggal yigisa keya buruk, ap oboksa yapma unpugwimu ereba na liring kagaij-o.

⁷ Nagawan Indo uwi iri na me it-nen unkugwiwak erembel wanogolat, kweyap terak inmin nene yugwi ondoro ereba na-ge ndamera yigisa lak tak pij-o. (Ondoro iri me-ge kwami ereba-nen-e it unkugwiwak Ndewi Asera erembel wanogolat-nen kwarurak mururak sum yakolat woragwi-o.)

^8-9 Tepan ombo-net nde kugwiwak erembel wanugwi nap Yewura nggweyak pem o silmu ereba woragwi ereba na-ge Yosia-nen-e: ”Yerusalem lobok yer-o” yak unduruk, Yewura nggweyak pem min nin me nan me oboksa-nen kugwiwak ombo ereba na-nen kugwiwak amanggim kan pugwi ondoro ereba na-ge oboksa mijara meya rak pij-o. Iri luk, tepan ombo ereba na yak ondosolar-e: ”Mbal Pem Nagawan ama iri na me-ge yabu wanurak pug-o” yak ondosolar-et nde, it ennggamirak tepan ombo kugwiwak erembel wanugwi buk nap ereba na enmanggim oroti lomboroso mende pigit lak woraidnak oroti ereba na perak norak ob-o luk yak indij-o. Nde, pak tumende o siri iri me ngguberenot Yosua iri na unu bem para pak tumende eralu kugwiwak erembel wanogolat amanggim wam wosa kan pugwi ondoro ereba-ge Yosia-nen-e yigisa lak tak pij-o. O silmu nggugwi o pak tumende nggok iri na me-nen-e pak tumende Yosua iri-ge kware ambigir-o.

¹⁰ Ap-nen enmbararak ala na, enararak ala na wosa kugwi Molok amanggim kan puwa naru, Yosia-nen-e Inom Mbirikmu kugwiwak erembel wanugwi ondoro Topet iri na-ge ndamera keya bij-o.

¹¹ Yewura nap nagawan nagawan-nen mo erembel wanogolat-nen lenak pidnak kura wam ereba na-ge Yosia-nen mbo bosolat, nggweyak koma kugwi iri erembel wanogolat-nen kwarugwi ereba na-ge kan posolat kwarij-o. (Nde, nggweyak koma ereba na-ge o siri pak tumende eralu ap yabu ombo kek tak Natan Melek woraso sa eralu Nagawan Indo uwi mborom-et woragij-o.)

¹² Nagawan Agas woraso sa o kuri werep mberep iri na o ngguwa bem-e wam wosa kan purak ondoro Yewura nap nagawan nagawan-nen koniga ereba na-ge ndamera keya bij-o. Iri-nen Nagawan Manase-nen Nagawan Indo uwi mborom ponok ponok kugwiwak amanggim kan purak ondoro konid iri na min Yosia-nen-e yigisa keya buruk, Kitoron Mbirikmu ereba mbo bij-o.

¹³ Iri-nen o Yerusalem iri me-nen mo luwaso ambigit nggwe (timur) min abare ena nggwe (selatan) ambigit Ndobo Saitun iri na min Nagawan Salomo-nen kugwiwak emben torak mende Siron nap unkugwiwak Ndewi Asoret min Moap nap unkugwiwak Kamos min Amon nap unkugwiwak Milkom min ereba na erembel wanogolat amanggim wosa kan pugwi ondoro Salomo-nen konid ereba na min Yosia-nen-e ndamera keya bij-o.

¹⁴ It-nen erembel wanugwi kerep mot konidnak ereba na min kugwi Ndewi Asera ut memera konidnak ereba na min ereba na-ge langgona mbud tak pij-o. Iri rak puruk, kerep mot min kugwiwak ndak worak min woragid ondoro ereba me-ge Yosia-nen-e ap onowak nggilarak ereba na ligik puruk keya bij-o.

¹⁵ Nebat ambara Nagawan Yerobeam-nen Isarael nap meya kwarugwi rak onposolat wam wosa kan purak ondoro Mbetel iri me konid iri na-ge Yosia-nen-e ndamera keya bij-o. Wam wosa kan pugwi ondoro iri na min yenggana keya posoluk, kugwiwak Ndewi Asera ndak worak iri na min-et kan pij-o.

¹⁶ Iri rak puruk, Yosia-nen nden kaga yik kagaidnggal-e, ndobo bem iri me ap yapma inpidnak karug-e, ”Ap onowak ereba na yaler-o” luk ap yak endamu, yala yigarik, onowak ereba na-ge kugwiwak amanggim kan pugwi ondoro kan pamu, nasu iri na me kan pij-o. Iri nggal kwasa yarik, wam wosa kan pugwi ondoro iri na-ge emben to rak pij-o. Iri kwat yid iri-ge nanduk misik tarem nggok sakolat-nen Yerobeam na wam wosa kan pugwi ondoro eralu mendak worasoma, Mbal Pem Nagawan ene lomboksa yoso nap-nen urul yak tid iri na ndak ndag-et kwat yij-o. Iri rak puruk, Nagawan Yosia-nen yik kagaidnggal-e, ap yapma inpidnak misik karug-e,

¹⁷ at-nen kin wanosolar-e: ”Yu-ge ta yapma ibidnag-o?” luk kin wanij-o. Iri yosola, Mbetel nap-nen yogolar-e: ”Iri-ge Mbal Pem Nagawan ene lomboksa yoso nap yapma ibidnag-o. At iri-ge Yewura-nen lobok yarik, yawo kat-nen wam wosa kan pugwi ondoro lak tak pusu yeba-ge at-nen ’Iri kwaruwa-o’ luk urul pidnak ndak ndag-et kwarusu-o” luk yak tiga-o.

¹⁸ Yogoloma, Nagawan Yosia-nen yosolar-e: ”Owak iri-ge sil kudtak pug-o. Yala na nin me pil mbururak pug-o. Iri me-t wolmag-o” luk yij-o. Iri yosoloma-ge, Mbal Pem Nagawan ene lomboksa yoso nap iri na owag-e waga nin me pil mbirigit lak keya biga-o. Iri nggal-et Mbal Pem Nagawan ene lomboksa yoso nap Samaria-nen lobok yid iri na owak na keya-t piga-o.

¹⁹ Isarael nap woragwi sa o siri lombok oboksa-nen Isarael nap nagawan nagawan-nen kugwiwak erembel wanurak ondoro konil lobok yogola, ereba-nen ndowaga Mbal Pem Nagawan isilepma yid ereba na oboksa-ge Yosia-nen-e ndamera mbud tak pil lobok yij-o. Nagawan Yosia-nen-e Isarael nap woragwi sa oboksa-nen kugwiwak erembel wanugwi ondoro ereba na-ge ndamera yigisa lak tak puruk, Mbetel-nen kwarid ereba na nggal-et kwaril lobok yij-o.

²⁰ Nde, tepan ombo kugwiwak amanggim wam wosa kan pugwi ereba na-ge it-nen kugwiwak amanggim wam wosa kan pugwi ondoro ereba na bem-et Yosia-nen-e wosa inpil lobok yij-o. Iri rak purug-e, kugwiwak amanggim wam wosa kan pugwi ondoro ereba na me-ge ap onowak nggilarak ereba na kan pil lobok luk, Yosia iri na-ge tuguruk Yerusalem mbirij-o.

O Wot Kaidnak Tarem yebet kasolat Yosia-nen nggok sagid wene 23:21-23

²¹ Iri luk imbirig-e, Yosia-nen Isarael nap oboksa yak ondosolar-e: ” ’Irit kwarul-o’ luk Nagawan Indo imin urul pidnak engga yu arem mbarak worasu ndak ndag-et nir-e O Wot Kaidnak Tarem yebet kagolat nggok sagurag-o” luk yak unduruk, saiga-o. Iri nggal kwasa sakolar-e, Nagawan Indo Enmbal Pem Nagawan iri na kek tak piga-o.

²² Nde, nanduk wene mbenarugwi nap ereba na-nen Isarael nap tena unpuruk woragolat tarem-nen-e O Wot Kaidnak Tarem nggok iri nggal mbi-ge Isarael nap nagawan nagawan min Yewura nap nagawan nagawan min-nen-e mondok sakwi bug-o.

²³ Nde, Yosia-nen o tena woralat olengen delapan belas pem tak posolat, iri tarem nak-nen Nagawan Indo kek tak pogolar-e, O Wot Kaidnak Tarem iri na yebet kagolat, Yerusalem iri me-nen nggok saiga-o.

Yosia-nen erep nin tak pidnak wene 23:24-27

²⁴ ”Iri nggal kwarurag-o” luk mbaridnak wene tepan ombo kek tak Ilkia-nen Nagawan Indo ama-nen kagaid engga iri na arem ndak ndak kwaruwakluk, kugwi tu mbarugwi nde ”Iri nggal kwat ma-o” luk urul pugwi nde oboksa Yerusalem-nen na irit, Yewura nggweyak pem iri me oboksa-nen na irit worali ereba na-ge Nagawan Yosia-nen langgara wirik inpij-o. Iri-nen enmarak-nen erembel wanugwi kugwiwak min kugwiwak erep min it-nen kek tak pugwi mende kek tak pogolat-nen kwarugwi murugwi silobulo ereba na min-e oboksa Yosia-nen-e mbo bij-o.

²⁵ Nagawan Yosia-nen Nagawan Indo ndegel obosolat, indi misiget tak puruk ndegel ibid iri nggal-e nagawan nagawan erep-nen mbi ndegel ibigit lag-o. At-nen-e at abage bem-nen na at-nen kwaroso bem-nen na Musa-nen mbaridnak engga arem imiri mbarak pidnak wene ereba na oboksa ndak ndag-et kwarosolat woragij-o. Nde, Nagawan Yosia wat yidnak ombol nggwe-nen na mondok nagawan at nggal mbi misik woragit lag-o.

²⁶ Alat nde, Nagawan Manase-nen kwaridnak pem perak Nagawan Indo isilepma-ge Yewura nap enpem pij-o. Nde, isilepma enpem pid iri na-ge mondok nigirik purak puk irit woragij-o.

²⁷ Nde, Nagawan Indo-nen yosolar-e: ”An-nen Isarael nap kwat inpigi iri na nggal-et Yewura nap kwat inpimin-o. Nde, an-nen-e Yewura nab-e an-nen wok indigi o iri na me-net mbo inpimin-o. Nde, an-nen-e an-nen linigi Yerusalem siri min an nuwi an-nen yosolat: ’An nuwi yu-ge an nerembel wanugwi o irit wolmag-o’ yigi o yu-ge mondok keya bimin-o” luk yij-o.

Abok nggwe Yosia-nen tenagidnak wi iri na me-nen kwat yidnak wene 23:28-30

^28-30 Nde, Nagawan Yosia iri na-ge Mesira nagawan Neko iri na-nen Asiut nagawan yongga wururak at-nen idnak san ombo lit karuk Yi Eperat eyak pem lobok yusu iri na imin wim mbareyekluk mborosoma, o Megiro iri me-nen Nagawan Yosia iri na-ge wirikma, at eyabu wanugwi nap-nen-e nggweyak koma arem puruk, waruk Yerusalem mbirigarik, nagawan nagawan yapma unpugwi sa yapma ibiga-o. Yapma burug-e, Yewura nap oboksa-nen ondolma at ambara Yoaas iri na nagawan mendak piga-o. Nagawan Yosia-nen kwaridnak ereb-e Yewura nap nagawan nagawan-nen kwarugwi engga arem mbarak worasu-o. 23:31–24:7 Ayat ayat ereba arem-e Yewura nagawan Yoaas min at ondolma men yid nagawan Yoyakim min-nen o tena woragolat-nen kwaridnak wene mbarak worasu-o.