2 NAGAWAN NAGAWAN-NEN KWARIDNAK WENE 20 - Nanduk Ngget Tul Pidnak Wene

Nagawan Isikia wat yurak kugwi wirij-et nde, ki yidnak wene 20:1-11

¹ Nde, ereya tarem-e Nagawan Isikia iri na-ge kimbi mondok kwiye worak misik ebem yarik, mondok wat yekluk irit yij-o. Iri yosola-ge, Mbal Pem Nagawan ene lomboksa yoso nap Amos ambara Yesaya iri na-ge Isikia kil lobok yarik-nen yosolar-e: ”Nagawan Indo-nen yak korosolar-e: ’Nagawan kar-e ki yugun-e lag-o. Wat yugun me, kat-nen kwarurak mende-ge yanem-et ndegera keya burag-o’ yak kirij-o” luk yak tij-o.

² Wene iri na kulurug-e, Isikia iri na-ge nden yaga erare kebet ambigit tak puruk tepan yosolar-e:

³ ”Nagawan Indo wa-e. An-e nondomok nindi-net kat kerembel tugup lak wanosolat, pempa kat-nen nebem pidnak nak kwarurak namawi kondoso-o” luk tepan yosolar-e, Isikia iri na-ge yip kondok lud mbij-o.

⁴ Nde, Yesaya iri na-ge iri yak turuk yarik, eram-nen mborosolar-e, awo omborom-et mborosoma-ge, Nagawan Indo-nen-e Yesaya yak tosolar-e:

⁵ ”Nagawan Indo an nilirak-nen idnak Nagawan Isikia iri eram mburugundik, wene yu yak ti-o: ’Nagawan Indo Kembal Pem Nagawan kombo Ndaut-nen kek tak poso Mbal Pem Nagawan an-nen-e kat-nen yip tigen kasolat, tepan yigen na kolosolat yusu-o. Nde, kar-e ki rak kibimin-o. Iri yumu, kup woraruk, kup iri-ge an nama mburugun-o.

⁶ An-nen-e kat kuruk wolmomtag-e tuguruk olengen lima belas tak kubusu-o. Kat min o Yerusalem siri yu min-e Asiut nagawan inggiyapma-nen kinmiri yimin-o. Nde, o siri yu-ge an-nen kek tak woraso bem-nen na irit, an ndegel noboso nap Ndaut urul yak tigi ereba na bem-nen na irit, mondok imiri yimin-o’ yij-o” luk yak tij-o.

⁷ Nde, Yesaya-nen yosolar-e: ”E ara engen wanugupndik, yigisa keya buruk amburu mbela ud ambut makluk amburu-ge kimbi bem per-o” luk ap yak indij-o.

⁸ Nde, Nagawan Isikia-nen kin wanosolar-e: ”An ki yosoluk, kup woraruk kup iri-ge Nagawan Indo ama mburugun-o yid iri-ge ndemeret irit kwarimin-o lug-e no bem-nen yenggerak pimin-o?” luk yij-o.

⁹ Yosoloma, Yesaya-nen onggo yosolar-e: ”Nagawan Indo-nen kat-nen yenggerak purak mende mirik kobosolar-e, at-nen urul pidnak ndak ndag-et kwaruwa-o. Nde, yenggerak purak pem kat-nen-e no mende mirik kuburak perasu-o? Nagawan Agas-nen kwaridnak mo amorok ndak wurugwi iri na bem-nen mo amorok kasolar-e, obo sepulu nggal kwid turuk mbururak perasu, lak? Are, tuguruk nden karuk obo sepulu nggal mbururak perasu-a?” luk kin wanij-o.

¹⁰ Yosoloma, Isikia-nen yosolar-e: ”Mo amorok obo sepulu kwid turuk mbururak iri-ge mboroso me, te-nen yusu-o. Alat nde, tuguruk nden karuk obo sepulu kwid turuk mbururak iri perak nde mirik nuburag-o” luk yak tij-o.

¹¹ Yosoloma, Yesaya-nen Nagawan Indo eram tepan yosoloma-ge, Nagawan Indo-nen kwarosolar-e, mo amorok ndak wurugwi iri na bem-e mo amorog-e tuguruk nden karuk obo sepulu kwid turuk mbirij-o.

Ap o Mbabilonia-nen inpil lobok yidnak wene 20:12-19

¹² Nde, ereya tarem-e Mbabilonia Nagawan Mbalaran ambara Merondak-Mbalaran iri na-nen kulidnggal-e, Nagawan Isikia iri na-ge nggeret ki yarik worasu-o yidnak wene irit kulij-o. Kulurug-e, at-nen-e engga mbarak min Isikia amanggim silobulo pidnak min waruk ab-e Isikia eram wirik inpij-o.

¹³ Isikia-nen-e ap ereba na-ge kona-t imin tak unpuruk, at-nen-e at isilobulo pidsa emas min perak min undu rak pugwi mende ereba na min enpem ndarugwi emben konak amburu min wim pugwi mende oboksa mirik inpij-o. Iri-nen at woraso sa woraso mende min at-nen tenagidnak wi-ge oboksa misiger-o luk mbi mirik inpigit lag-e lag-o. Mondok oboksa mirik inpij-o.

¹⁴ Iri yamu, Mbal Pem Nagawan ene lomboksa yoso nap Yesaya iri na Isikia eram lobok yarik-nen kin wok obosolar-e: ”Ap ereba-ge ngge me-nen lobok yidnak nab-o? Ap ereba-nen-e wene-ge no yiga-o?” luk kin wanosoloma, Isikia-nen yosolar-e: ”It iri-ge erepma Mbabel-nen lobok yidnak nab-o” luk yak tij-o.

¹⁵ Yosoloma, Yesaya-nen kin wok obosolar-e: ”Kat woraso sa-nen-e it-nen-e no mende kaiga-o?” luk yosoloma, Isikia-nen onggo yosolar-e: ”Yi mende ndi mende oboksa kaiga-o. An woraso sa woraso mende misiger-o luk mbi kagit lag-e lag-o. Oboksa-t mirik inpigi-o” luk yij-o.

¹⁶ Yosoloma, Yesaya-nen Isikia yak tosolar-e: ”Nagawan Indo-nen yosolar-e:

¹⁷ ’Kat kisilobulo kat woraso sa worasu min komborak-nen ndok wosa pidnak yawo worasu ereba min ereba oboksa punduguruk Mbabilonia mbururak tarem-e awo wok ma-o. Misiger-o luk mbi mondok keya buwa bug-o.

¹⁸ Kat-nen wigarak lolo ereb-e Mbabilonia nagawan iri na eyabu wanugwi nap irit kwat luk mumnggupmanggi at woraso sa wolma-o’ yij-o” luk yak tij-o.

¹⁹ Yosoloma, Nagawan Isikia-nen onggo yosolar-e: ”Nagawan Indo-nen yidnak wene yak nirigen iri-ge ob-er-o” luk yij-o. Nde, iri yid iri-ge at-nen yebet kasolar-e: ”Mbigija-ge an worala tarem ya iri kwarigit lak yamuksa woramin irit nggog-o” luk-nen yij-o. 20:20–21:26 Ereya arem-e Isikia iri na wat yidnak wene min Yewura nap nagawan Manase min Amon min woragolat-nen it-nen kwarogolat woraiga wene min mbarak worasu-o.