2 NAGAWAN NAGAWAN-NEN KWARIDNAK WENE 2 - Nanduk Ngget Tul Pidnak Wene

Elia aid arem kud turuk laidnak wene 2:1-18

¹ Nde, Nagawan Indo-nen Elia iri na o wija bem kud turuk aid arem ludtak tarem-e panggo yij-o. Panggo yosola-ge, Elia min Elisa min-e Nggil Nggal-nen mborogolar-e,

² tu ndumu-nen-e Elia-nen Elisa yak tosolar-e: ”Kar-e yu me wolmin-o. Nde, an-e Nagawan Indo-nen Mbetel mbiri-o yamu-nen mburusu-o” yak tij-o. Alat nde, Elisa-nen yosolar-e: ”Nagawan Indo uruk nak woraso min kat min kenarik konowag-o. An-e mondok nombo kar-e keya kibimin pug-o” yosoloma-ge, it enmbereg-e mbirigarig-e Mbetel wok yiga-o.

³ Mbetel wok yukmu-ge, Mbal Pem Nagawan ene lomboksa yugwi nap lambuksa iri me woragwi ereba na-nen-e Elisa abuwok lobok yogolat-nen Elisa kin wok obogolar-e: ”Kat kombo iri-ge Nagawan Indo-nen kud turuk lasolat, yawo kat keya kubuwa iri na-ge kar-e karu worasu, lak?” luk kin wok ibiga-o. Yak togoloma, at-nen yosolar-e: ”Iri-ge narur-o. Iri wene-ge keya buwog-o” luk yak indij-o.

⁴ Iri luk Elia-nen Elisa yak tosolar-e: ”Kar-e yu me wolmin-o. Nde, an-e Nagawan Indo-nen Yeriko wirik nobosola, Yeriko mburusu-o” luk yak tij-o. Alat nde, Elisa-nen onggo yosolar-e: ”Nagawan Indo uruk nak woraso min kat min kenarik konowag-o. An-e mondok keya kibimin pug-o” yosoloma, it enmbereg-e mbirigarik Yeriko wok yiga-o.

⁵ Wok yukmu, Mbal Pem Nagawan ene lomboksa yugwi nap lambuksa iri me woragwi ereba na-nen-e Elisa abuwok lobok yogolat-nen kin wok obogolar-e: ”Kar-e Nagawan Indo-nen kombo iri-ge kud turuk lasolat kat nak keya kubuwa iri na-ge kar-e karu worasu, lak?” luk kin wok ibiga-o. Yogola, Elisa-nen yosolar-e: ”Iri-ge narur-o. Iri wene-ge keya buwog-o” luk yak indij-o.

⁶ Iri luk Elia-nen Elisa yak tosolar-e: ”Kar-e yu me wolmin-o. Nde, an-e Nagawan Indo-nen Yi Yareren arem mbiri-o yamu-nen mburusu-o” yak tij-o. Alat nde, Elisa-nen onggo yosolar-e: ”Nagawan Indo uruk nak woraso min nombo kat min kenarik konowag-o. An-e mondok nombo kar-e keya kibimin pug-o” yosoloma, enmberek irit mbiriga-o.

⁷ Mbirigarig-e, Yi Yareren arem wok yil mborogola-ge, Mbal Pem Nagawan ene lomboksa yugwi nap enpe lima pulu iri-ge inmbirik mbiriga-o. Mborogola, it mberen iri na-ge Yi Yareren eyak pem ndong yiga-o. Nde, it ap enpe lima pulu (50) ereya na-ge erepma-nen yik eneyarok mendak woraiga-o.

⁸ Eneyarok woragola-ge, Elia-nen-e usum iri na yonggora keya buruk, linggisa keya buruk, yi iri na ombolwak pem lel kagaij-o. Iri yosola-ge, yi iri na-ge enggendumu poksa pirisa labuk yosola-ge, at min Elisa min-e ogorak nggwe ndil laiga-o.

⁹ Ndil laigarik, eyak ele bem woklug-e, Elia-nen Elisa yak tosolar-e: ”Nagawan Indo-nen an nimin luk lagit lak ma-net kat-nen kindi bidnak mende-ge nebem nggi yurag-o” yak tij-o. Yosoloma, Elisa-nen onggo yosolar-e: ”An-e kat kondolma kwat yek-nen kat-nen idnak kamawi wok niri-o” yak tij-o.

¹⁰ Yosoloma-ge, Elia-nen yosolar-e: ”Nab-o. Iri-ge wok kururag-e mondok nggesa nggal-o? Meya-o. Alat nde, Nagawan Indo-nen wok nuburuk lasola, kat-nen yik neyarok worasola, iri-nen perak nde kat-nen nggi yigen iri-ge kwat ma-o. Alat nde, Nagawan Indo-nen an wok nuburuk lasola, yik neyarok woragun pem-e kat-nen nggi yigen iri-ge kene kuluwa-o. Nde, yik neyarok woragit lak yugun pem-e iri-ge kene kuluwa bug-o” luk yak tij-o.

¹¹ It mberen iri na wene ndiril ndiril mburukmu-ge mimo nggweyak koma kan mare worak iri na kura wam kan mare worak iri na-nen lit karuk lobok yosolar-e, it mberen yu na-ge enariktak tak unpuruk, o wija nggok puk kil lobok yosolar-e, Elia iri na-ge kud turuk aid arem lagaij-o.

¹² Lasola, Elisa-nen yik karok woralat-nen yosolar-e: ”Neid Elia wa-e! Neid Elia wa-e! Isarael nap inmiri yoso kamawi worak nap wa-e! Neid kar-e yawo-ge kondoro nak keya bigen-o!” yosolat-nen yik karok worala ereya na-t Elia na-ge lak yij-o. Iri yosolar-e, Elisa na-ge usum iri na-ge orowak wosa mberen tak pij-o.

¹³ Iri lug-e, Elia usum yonggora mberak pid iri na wanosolug-e, tuguruk mberarik, Yi Yareren eyak pem mendak woragij-o.

¹⁴ Iri yosolar-e, Elia usum iri na bem yi iri na lel kasolat-nen yosolar-e: ”Nagawan Indo Elia Embal Pem Nagawan iri na-ge ngge me worasu-o?” yosolat-nen yi iri na lel kagaidnggal-e, yi iri na-ge poksa piri yosola, ogorak nggilarak nggwe ndil lagaij-o.

¹⁵ Nde, Mbal Pem Nagawan ene lomboksa yugwi nap enpe lima pulu Yeriko woragwi ereya na-nen Elisa karuk-nen yogolar-e: ”Elia amawi iri na-ge yawo-ge Elisa ebem mbij-o!” yogolug-e, Elisa eram mborogolar-e, Elisa eram yud tud mbogolat-nen

¹⁶ yogolar-e; ”Nit nenpe lima pulu yu-ge nenmawi worak nak worali-o. Iri ala-ge, kat keid Elia iri-ge ogwere yil mburuwog-o. Erep-nen-e Nagawan Indo Indi-nen waruk mberarik, ndobo bem, lak? Are, mbirikmu, lak? ereba me nde mberak pidnak worasu nde kwat ma-o” luk yak tiga-o. Alat nde, Elia-nen yosolar-e; ”Mbururag-e lag-o” luk yak indij-et nde,

¹⁷ it-nen emengen mbarogolat lembe yogola-ge, ”Iri ala-ge ob-o. Mberer-o” yak endamu, mbiriga-o. Mbirigarik kenan pem-et ogwere yiga-t nde, mondok kagit lak yiga-o.

¹⁸ Nde, it na mbirikma-ge, Elisa iri na-ge ontowarak Yeriko iri me-t worasoma, eram lobok yiga-o. Lobok yogola, Elisa-nen it yak ondosolar-e: ”An-nen yak kondosolar-e: ’Mbururak pug-o’ yak kindigi-t nde, mbirigep iri na-ge irir-o” yak indij-o.

Kagwi buk mende Elisa-nen kwat tenak woragid wene 2:19-25

¹⁹ Nde, Yeriko nap siyak Elisa eram lobok yogolat-nen Elisa yak togolar-e: ”Nonmbo-o. Kat kerengen-nen nam-et kasu yur-o. O siri yu-ge konag-et nde, yi-ge meya-o. Yi-nen ndowaga kwami-ge li-ge tisik nak pogolat worali-o” luk yak tiga-o.

²⁰ Yogoloma, Elisa-nen yak ondosolar-e: ”Embe marik ngget misik arem mayu siyak yarak puruk, wok niril lobok yer-o” yosoloma-ge, at-nen yak indid iri na ndak ndag-et yarak puruk, wok til lobok yogolikma-ge,

²¹ Elisa na-ge yi ulusu pilana pil waso sa mberarig-e, mayu iri na yi ma mberak pil nggosolat-nen yosolar-e: ”Nagawan Indo-nen-e yu nggal yusu-o: ’Mondok yi yu-nen ndowaga wat yogolat, li tisik pogolat kwatli iri lak makluk, yi yu-ge an-nen marak yi rak pusu-o’ luk yij-o” yij-o.

²² Iri tarem-nen tel korosolar-e, Elisa-nen yid iri na ndak ndag-et yi iri na-ge mondok konak irit woragij-o.

²³ Iri rak purug-e, Elisa iri na-ge Yeriko-nen Mbetel mbirij-o. Mborosoma-ge, tu ndumu li marik marik siyak o silmu nggwe-nen wagolar-e, at pesel pogolat-nen yogolar-e: ”Kanggul mimi kar-e o yu me-ge lag-o. Mbiri-o!” luk enne nggoksa yak tiga-o.

²⁴ Iri yogola, Elisa na-ge nden kaga yik eneyarok woralat-nen Nagawan Indo unu bem imbiri lamut tak onposola, ereya na-net mberuang ndakngge kowak mberen enggama-nen lobok yosolar-e, li marik ereba na ennggendumu-nen enpe empat pulu dua (42) irit lebena nuruk lak tak inpij-o.

²⁵ Elisa na-ge nok Karamel Ndobo bem mberarik, iri me woraruk, tuguruk Samaria lobok yij-o.