2 NAGAWAN NAGAWAN-NEN KWARIDNAK WENE 19 - Nanduk Ngget Tul Pidnak Wene

Yesaya-nen indi uwi yaguwakluk Isikia-nen yonggo ibid wene 19:1-7

¹ Nde, Nagawan Isikia-nen-e kenan nap ereya na-nen wene waruk lobok yiga wene ereba na kulurug-e, indi abi kalok luk, usum ndela keya buruk, usum-e karung sum yutluk yarig-e, Nagawan Indo ama mbirij-o.

² Iri lug-e, nagawan woraso sa-nen ene kulugwi nap Elyakim min Isikia-nen idnak engga mbaroso nap Sepna iri na min tepan ombo indi worak ereba na min Amos ambara Yesaya eram wirik inpij-o. Nde, it iri na min-et karung sum yirik mbiriga-o.

³ Isikia-nen Yesaya amanggim wene wosa enpem posolar-e: ”Yawo-ge nit angin worak nenpem pogolat, enlengenma nggal tak nonpogolat yogola, ninndi puru bera yili-o. Nde, nir-e kweyap-nen li ndaguwokluk yane witli nde, ndakit lak yane nak wat tenak enmawi lak yili iri na nggal-nen yusu-o.

⁴ Nde, Asiut nagawan iri na-nen-e Mbal Pem Nagawan uruk nak woraso iri na pesel ubuwakluk at-nen idnak san ombo onowe misik ibil lobok yij-o. Iri yamu, erep-nen-e Nagawan Indo Kembal Pem Nagawan-e at pesel ibiga iri-ge kulidnak me, at pesel obogolat wene wirik pidnak nab-e enpem angin worak mberak puwag-o. Iri ala-ge, nit nap unluk worali enmanggim tepan nak yi-o” luk yak tij-o.

⁵ Nagawan Isikia-nen wene wosa pil mbirid iri na Yesaya-nen kulurug-e,

⁶ ap at eram wirik inpidnak nap ereba na Yesaya-nen yak ondosolar-e, wene onggo-ge yu nggal yak indij-o: ”Nagawan Indo-nen yosolar-e: ’Nagawan Isikia iri-ge Asiut nagawan eyabu wanugwi nap-nen an pesel nobogolat, Nagawan Indo nggal-nen kit kinmiri yurag-e meya-o luk yiga ereba kulurug-e, mondok kwiye yurak pug-o.

⁷ Nagawan Indo an-nen-e Asiut nagawan iri na kwat obosolar-e, yu nggal kwat ibimin-o: at iri-ge wene misik kolosolug-e, tuguruk ama mburuwarik pem ama-nen-e mondok wuruwa-o’ yij-o luk yak turag-o” luk yak indij-o.

Asiut nap-nen Isarael nap kwat unpurak wene misik pil lobok yidnak wene 19:8-19

⁸ Asiut nagawan iri-nen idnak san ombo onowe iri na-nen kulidnggal-e, at-nen idnak nagawan iri na-ge o Lais keya buruk yarik, o iri me koroga o siri Lipna iri na inmin wim mbarusu-o yogola kuluruk yarig-e, san ombo onowe iri na-ge at-nen idnak nagawan iri na eram mbirij-o.

⁹ Nde, Asiut nagawan iri na-nen kulidnggal-e, Sundan nagawan Tiriaka iri na-nen Mesira nap san ombo lit karuk, it undurak lobok yusu-o yogola kulurug-e, Asiut nagawan iri na-nen engga mbara Yewura Nagawan Isikia eram pil mbirij-o.

¹⁰ Engga iri-ge wene-ge yu nggal mbara pil mbirij-o: ”Kar-e Kembal Pem Nagawan-nen urul pidnak iri na bem kindi wat tak puruk woralat, Asiut nagawan iri-nen-e yemndak nubuwa bug-o luk kindi yebet kagun-o! Mondok lag-o.

¹¹ O siri oboksa Asiut nagawan-nen enpem kore yidnak iri-ge oboksa lak tak onposo iri obog-e kar-e koloso iri nar-o. Kat kindi arem-nen yebet kasolar-e: ’An-e mbela mbirimin-o’ luk yebet kudtak pug-o.

¹² Nanduk nomborak-nen o Nggosan siri min Aran min o Eresep min Eren nap o Telasa woragwi nap min ondogola-ge, it unkugwiwak ereba enggendumu misiget-nen-o luk-nen mbi it inmiri yigit lag-o.

¹³ Nde, yawo-ge o Amat min Arapat min Separawaim min Ena min Iwa min-nen idnak nagawan nagawan ereba na-ge ngge me worali-o?” luk yij-o.

¹⁴ Nde, iri yidnak engga iri na-ge at eram inpil lobok yiga ereba na-nen wok tikma, Nagawan Isikia-nen engga iri na wonatluk, Nagawan Indo ama mberarig-e, engga iri na-ge Nagawan Indo imbiri bem panggara keya buruk,

¹⁵ tepan yosolat-nen yosolar-e: ”Nagawan Indo Isarael nap Enmbal Pem Nagawan kerup aid nap ebem koreyak woraso wa-e. Nggweyakma wi o tena worali nagawan oboksa enanggul pem o tena woraso Mbal Pem Nagawan-e kat nak-nen yusu-o. Kat nak-nen mbal min nggweyak min-e ndak worak pigenma-o.

¹⁶ Nagawan Indo wa-e. Yawo nit nenpem kwat yusu mende yeba-ge kwara yebet niniyi-o. Mbal Pem Nagawan kuruk nak woraso wa-e. Sanegirip-nen pesel kubusu ereba-ge kwara kuli-o.

¹⁷ Nagawan Indo wa-e. Asiut nagawan nagawan ereba-nen-e ap enlem kwarat min unuwi siri min lak tak unpugwi iri-ge nir-e nenaru-o.

¹⁸ Nde, it unkugwiwag-e mondok amawi lak, kerep min e min pem ininggi-nen ndak wiridnak mende me, unkugwiwak min-et ndamera kan pogolat kwarugwi-o.

¹⁹ Nenmbal Pem Nagawan, Nagawan Indo wa-e. Asiut nap yu ininggiyapma-nen ninmiri yi-o. Kat karig-et nak Mbal Pem Nagawan worasu-o luk nggweyakma woragwi nap oboksa-nen enaru makluk, mengga keya ninpi-o” luk tepan yij-o.

Yesaya-nen Nagawan Isikia indi uwi yagidnak wene 19:20-37

²⁰ Yosoloma-ge, Yesaya-nen Nagawan Isikia amanggim wene wosa posolar-e: ”Kat-nen tepan yigen iri na Nagawan Indo-nen erep nggarosolat-nen

²¹ yosolar-e: ’Yerusalem siri-nen-e Sanegirip kar-e nda korosolat, nggweyel kobosolat yusu-o.

²² Kar-e ta nde meya wene yak tosolat, pesel ubusu-o? An-e Isarael nap Enmbal Pem Nagawan mondok marak iri na-nen yusu-o. Kat kabage iri-ge an nimin-e kar-e mondok kek yusu-o.

²³ Kat-nen ap inpil lobok yigenma ene amburu ndakolar-e, kat-nen idnak wim koma kwarat ereba na bem-nen Libanon ndobo yat mat ereba na-ge yemndak posolat, kindi-nen kek yosolar-e: ”E ndobo bem woraso libe yot mot mondok konak ereba na-ge o wal ereba oboksa e wosa ligik puruk keya bigi-o” luk yigen-o.

²⁴ Iri-nen kindi-nen kek yosolat-nen yosolar-e: ”Yi kenanggurak ondoro yaligirik, yi-ge o nin sa ereba me woraso yi nde nasolat, an-nen idnak san ombo-nen-e Yi Nil-et nde, yemen kerenak mbot eberek yij-o” luk yigen-o.

²⁵ Iri kwarurak iri-ge o nanduk-net iri nggal-et kwat ma-o luk abu urul pigi iri na-ge kar-e koloso buk, lak? Urul pigi iri na-ge yawo-ge kwarusu irir-o. O siri kerep leget-nen wiridnak ereba tud tak puruk, owak nak nggilara keya burak amawi-ge an-net kinggem pukmu-o.

²⁶ Nde, ap ereba me woraiga nab-e enmawi-ge kundigit lag-o. It ereba-ge wendet luk, kwiye yiga-o. It ereba-ge tusuangge min tusuangge o ngguwa bem yak yidnak min o wija embem worak mo luwaso nggwe-nen puk kil lobok yosolar-e, terabet luk umbuk yoso na nggal kwat yiga-o.

²⁷ Kat woraso-ge an-e oboksa naru-o. Kat-nen kwaroso min kat-nen noso min-e mondok naru-o.

²⁸ Kat-nen mondok kisilepma an nebem pusu iri-ge an-e naru-o. Kat-nen kek yusu wene iri-ge an-e kuligi-o. Nde, yawo-ge yilik kuburuk, kat lobok yigen nggwe tuguruk kibil mbereyek-nen tari kerabit pem yilik kibimin-o’ yij-o” luk wene wosa bij-o.

²⁹ Iri yosolar-e, Yesaya-nen-e Isikia eram wene wosa pil mborosolar-e: ”Kat-nen yenggerak wolmomtag-e yu-o: Olengen yawo yu min imbirik iri min arem-e nggandum mbato-ge we ondomok tup yidnak ereba na nunggub-o. Nde, abog-e kondomok-nen nggandum mbato min anggut min yakupndik, engen-et mbara nunggub-o.

³⁰ Nde, Yewura nap erep keya inpidnak nab-e yakwi mende nggal enmengen kundik worasolat engen poso nggal yi mende ndi mende bem-e ndak irit wolma-o.

³¹ Nagawan Indo-nen-e ’Iri nggal kwat ma-o’ luk urul pidnak me, Yerusalem min Sion ndobo bem min-e inmiri yidnak nab-e wolmar-o.

³² Nde, Nagawan Indo-nen Asiut nagawan iri na obog-e yu nggal yij-o: ’At Asiut nagawan iri-ge Yerusalem na ngguma buk. Amare na Yerusalem ambigit na mondok mbisingsa pil lobok yuwa buk-nen yusu-o. It san ombo-nen na ndumno yarak-net nde, o siri iri eram panggosa lobok yuwa bug-o. Nde, o siri pak anggul pem lorak unuwok mbera na mondok wuruwa bug-o.

³³ Nde, Asiut nagawan iri-ge o silmu yu me ngguwagit lak, tuguruk lobok yid nggwe-t tuguruk ama mburuwa-o. Wene yu-ge Nagawan Indo an-net yusu-o.

³⁴ An-nen kek tak woraso bem-nen na irit, an-nen Ndaut urul yak tigi bem-nen na irit, o Yerusalem siri yu-ge an-nen imiri yosolat, nggetlel puruk woramin-o’ luk yij-o” luk wene wosa pil mbirij-o.

³⁵ Nde, kubu iri na tarem-et Nagawan Indo-nen idnak aid nap lobok yosolar-e, Asiut nap san ombo woragwi sa wok yosolat, san ombo seratus delapan pulu lima ribu (185.000) irit indij-o. Endamu, kub-e werep mberep liring tak irit eneyaiga-o.

³⁶ Iri ala karug-e, Asiut nagawan Sanegirip iri na-ge tuguruk lit karuk Niniwe nggwe mbirij-o.

³⁷ Nde, misik tarem-e Sanegirip iri na-ge at ugugwiwak Nisorok erembel wanugwi o iri na me nggwarik, erembel wanosoma, at ambik ambararak Andaramelek min Sareset min-nen kabo bem wiriga-o. Wutlug-e, it mberen-e o Ararat uwi kwiye mbiriga-o. Mbirikma-ge, at ambara misik Esarandon iri na-ge at ondolma nagawan men yij-o.