2 NAGAWAN NAGAWAN-NEN KWARIDNAK WENE 13 - Nanduk Ngget Tul Pidnak Wene

Elisa wat yidnak wene 13:14-21

¹⁴ Nde, misik tarem-e Mbal Pem Nagawan ene lomboksa yoso nap Elisa iri na-ge kugwi angin worak irit wirij-o. Woramu worala-ge, Nagawan Yoas iri na-ge kil lobok yij-o. Nde, nagawan iri na-nen kagaidnggal-e Elisa na-ge mondok wat momtak irit karuk-nen yip tosolat-nen yosolar-e: ”Isarael nap ninmiri yoso kek tak nombo wa-e! Nombo wa-e!” luk yij-o.

¹⁵ Yosoloma-ge, Elisa-nen Nagawan Yoas iri na yak tosolar-e: ”Kar-e san min mingin mare min wani-o” yosoloma, Yoas-nen-e iri nggal-et kwasa wanij-o.

¹⁶ Wanosoloma-ge, Elisa-nen yak tosolar-e: ”Wanuruk, mbising kudtak kunari-o” yak tosoloma-ge, nagawan iri na-ge mingin mare wanarik, mbising kudtak kunarosola-ge, Elisa inggi-ge nagawan iri na inggi bem pij-o.

¹⁷ Iri rak purug-e, Mbal Pem Nagawan ene lomboksa yoso nap iri na-nen yidnak ndak ndag-et nagawan iri na-nen-e Siria ambigit nggwe papalo tu kuwarak posola-ge, Elisa-nen yosolar-e: ”Mare mbising ki-o” yosoloma, nagawan iri na-nen-e mare na-ge mbising kil mborosola-ge, ereya na-net Elisa-nen ene nggoksa yosolar-e: ”Kar-e Nagawan Indo amare-nen yusu-o. Mare kat kebem-net Nagawan Indo-nen-e Siria nab-e urugwe nggwe rak unpuwa-o. Kat-nen-e o Apek iri me Siria nap iri inmin wim mbal tenak irit worasoma, abu urugwe nggwe rak unpugun-o” luk yij-o.

¹⁸ Iri luk, Elisa-nen Nagawan Yoas yak tosolar-e: ”Mingin mare erep wanugundik, nggweyak lel ki-o” yosoloma, nagawan iri na-nen-e kenan pem nggweyak lel karuk, ndong yosoloma-ge,

¹⁹ Elisa iri na isilepma luk-nen yak tosolar-e: ”Lel tenak woralar-e, lima bem nggal enam pem nggal lel kudtag-et nde, iri kwarosolar-e, Siria nap iri-ge mondok yigisa abapno rak unpurag-et nde, kenan pem nak lel kaigen iri-ge we kenan pem nak Siria nap iri-ge urugwe nggwe rak unpugun-o” luk yak tij-o.

²⁰ Marig-et nak worarug-e, Elisa na-ge wat yamu, yapma ibiga-o. Nde, ereya tarem-e ap nden unpugwi nap Moap nab-e olengen misik arem-e misik pem nak Isarael nap enpem kore yil lobok yogolat kwat tenak woraiga-o.

²¹ Iri kwarugwi me-ge misik tarem-e ap misik wat yamu, ap erep-nen ap lugwinik iri na yapma obogolat-nen yik kaiganggal-e, Moap nap ap nden unpugwi ereba na lobok yogola yik eneyarug-e, ap lugwinik iri na-ge Elisa yapma ibidnak sa iri na arem mbo bil ngguruk, kwiye mbiriga-o. Nde, ap lugwinik iri na-ge Elisa owak nggilarak ereba na ebem yosolar-e, ap lugwinik iri na-ge uruk luk men yij-o.

Isarael nap min Siria nap min wim mbariga wene 13:22-25

²² Nde, Yoas Isarael nap ennggendumu nagawan worala tarem-e Siria nagawan Asael-nen Isarael nab-e anggun panggun tak onposolat woragij-o.

²³ Alat nde, Nagawan Indo-nen-e at ilirak enabuwa karuk, it-nen meya kwarugwi-ge amberam tak posolat woragij-o. Ar-e ilirak lak tak unpuwakluk keya unpurak iri-ge imbit-nen yongga-t ondosolat woragij-o. Iri yid iri-ge Abarakam min Isak min Yakup min ”Irit kwat kinpimin-o” luk urul yak indid iri na bem-net kwarij-o. Yawo-nen na at ilirag-e meme rak unpusu bug-er-o.

²⁴ Nde, Asael Siria nagawan iri na-ge wat yosoloma-ge, ondolma-ge ambara Mbenarat iri na-t nagawan men yij-o.

²⁵ Men yosola-ge, Isarael nap nagawan Yoas-nen-e Mbenarat iri na-ge kenan pem-et urugwe nggwe rak uburug-e, Yoas eid Yoaas worala tarem-nen Mbenarat-nen o siri mengga wanid ereba na-ge tuguruk mengga wanij-o.