2 NAGAWAN NAGAWAN-NEN KWARIDNAK WENE 1 - Nanduk Ngget Tul Pidnak Wene

2 Nagawan Nagawan-nen Kwaridnak Wene Elia min Nagawan Agasia min-nen kwaridnak wene 1:1-18

¹ Nde, Isarael nap Nagawan Akap iri na wat yosola-ge, it Moap nap-nen-e Isarael nap inmin wim mbariga-o.

² Nde, misik tarem-e at woraso sa Samaria iri na me-nen-e Nagawan Agasia iri na-ge o panggo silabaga iri na me-nen kapsa nggweyakma wosa lobok yosolar-e, mondok ndamera mbosolar-e, angin irit mbud yij-o. Iri kwasa woralar-e, at-nen-e: ”An-e ki yimin, lak? Are, wat yimin-a?” yosoluk, kugwi tu mbal tuwaklug-e, ab-e Pilisin iri me o siri Ekoron woragwi nap unkugwi Mbaal Sebup iri na kin wil mburuwakluk wirik inpij-o.

³ Alat nde, Mbal Pem Nagawan ene lomboksa yoso nap Tismbe nap Elia iri na Nagawan Indo-nen idnak nap aid nap iri na-nen yak tosolar-e: ”Kar-e mburugundik, Nagawan Agasia-nen wirik inpid nap ereba endam mbiri-o. Mburugundik-nen yak ondosolar-e: ’Kir-e Isarael iri me-ge Mbal Pem Nagawan-e lak ala karuk-nen tu mbal kunduwakluk o Ekoron siri iri me-nen erembel wanugwi kugwi Mbaal Sebup iri na yak til mbitli-a?’ luk yak indi-o.

⁴ Kat-nen Nagawan Agasia yak tosolar-e: ’Kar-e ki yugun pug-o. Wat yugun-o luk Nagawan Indo-nen yak kirij-o’ yak ti-o” luk yak tij-o. Iri yamu Elia na-ge Nagawan Indo-nen ebem pid iri na kwasa yak ondosola-ge,

⁵ nagawan-nen kugwi tu mbaril wirik inpid ereba na-ge tuguruk nagawan eram lobok yiga-o. Lobok yogola, Nagawan Agasia-nen kin wok onposolar-e: ”Kir-e noluk-nen tuguruk lobok yili-o?” luk yak indij-o.

⁶ Yosoloma, it-nen yogolar-e: ”Ap misik nit nendam lobok yosolat-nen yak nondosolar-e: ’Nagawan Indo-nen Nagawan Agasia imin yosolar-e: ”Isarael iri me-ge Mbal Pem Nagawan-e lak ala karuk-nen kar-e kugwi Mbaal Sebup o Ekoron siri iri me-nen erembel wanugwi kugwi iri na eram kin wanurak ap inpil lobok yigen-a? Kar-e ki yugun-e lag-o. Mondok wat yugun-o” yij-o luk yak til mberer-o’ yamu-nen lobok yige-o” luk yak tiga-o.

⁷ Yogoloma, nagawan iri na-nen yosolar-e: ”Ap iri-ge abage-ge nunggwirik nggal-o?” luk yak indij-o.

⁸ Yosoloma, it-nen yogolar-e: ”Usum leyok sum min ubugulwak ngonoksa yirik kere min iri-ge wam aboro-nen konidnak kaige-o” luk yak tiga-o. Yogoloma, nagawan-nen yosolar-e: ”O! Iri-ge Elia kagi-o!” luk yij-o.

⁹ Yosolug-e, at-nen-e ap san ombo wari misik owosirak lima pulu (50) inmin-e Elia tenaguwakluk wirik pamu, san ombo wari iri na mbiridnggal-e, Elia iri na-ge ndobo misik pem koreyak worasoma, eram wok yosolat-nen yosolar-e: ”Mbal Pem Nagawan ndegel oboso nap wa-e. Nagawan-nen yosolar-e: ’Mbuwasug-o’ yak kirij-o” yak tij-o.

¹⁰ Yosoloma, Elia-nen onggo yosolar-e: ”An nde ndemeret Mbal Pem Nagawan ndegel oboso nap ala-ge, kandug-e aid arem-nen mbuwasolat, kat min kat kowosirak ereya inmin-e kanduk-nen nuruk lak tak kunpuwag-o” luk yak tosola ereya na-net kanduk aid arem-nen mbuwasolar-e, san ombo wari iri na owosirak lima pulu ereya na inmin-e kanduk-nen nuruk lak tak inpij-o.

¹¹ Iri luk imbirik na nagawan-nen-e san ombo wari misik owosirak lima pulu inmin wirik pamu, mberarik, Elia yak tosolar-e: ”Mbal Pem Nagawan ndegel oboso nap wa-e. Nagawan-nen yak korosolar-e: ’Yanem-et mbuwasug-o!’ yak kirij-o” yak tij-o.

¹² Yosoloma, Elia-nen onggo yosolar-e: ”An nde ndemeret Mbal Pem Nagawan ndegel oboso nap ala-ge, kandug-e aid arem-nen mbuwasolat, kat kowosirak inmin-e kanduk-nen nuruk lak tak kunpuwag-o” yosola ereya na-net Mbal Pem Nagawan-nen kanduk mberak posolar-e, san ombo wari iri na-ge owosirak inmin-e kanduk-nen nuruk lak tak inpij-o.

¹³ Iri rak inpij-et nde, tugurug-et nagawan iri na-nen-e ap san ombo wari misik owosirak enpe lima pulu inmin wirik pamu, ndobo bem lagarig-e, Elia eram wok yosolar-e, endaru yunggusa kore yosolat-nen yosolar-e: ”Mbal Pem Nagawan ndegel oboso nap wa-e. An nowosirak inmin yu-ge nenabuwa kasolat-nen ninmiri yi-o!

¹⁴ San ombo wari mberen onowosirak inmin kanduk aid arem-nen mbuwasolat lak tak inpid iri nggal-et lak tak nunpurak pug-o. Alat nde, nenabuwa ki-o luk kemengen mbarusu-o” luk yak tij-o.

¹⁵ Iri yak tosola ereya na-net Nagawan Indo-nen idnak aid nap-nen-e Elia yak tosolar-e: ”Kar-e kwiye lag-et ndobo yu bem-nen at imin mburag-o!” yosola karug-e, Elia na-ge wim wari iri na imin nagawan eram mberarik,

¹⁶ Elia-nen nagawan iri na yak tosolar-e: ”Nagawan Indo-nen nagawan kat yak korosolar-e: ’Kar-e Isarael yu me-ge kin wanurak Mbal Pem Nagawan iri na-ge lak nggal tak puruk, kar-e o siri Ekoron iri-nen erembel wanugwi kugwi Mbaal Sebup iri na eram kugwi tu mbal kururak ab-e wirik inpigen-o. Iri kwarigen pem-e kar-e mondok ki yugun pug-o. Wat yugun-o’ yak kirij-o” luk yak tij-o.

¹⁷ Nde, Nagawan Agasia iri na-ge Nagawan Indo-nen Elia emndam tak posola yid iri na ndak ndag-et wat yij-o. Wat yosoloma-ge, at ambara-ge lak ala karuk, at eyabi minggirik Yoram iri na nde ondolma-ge nagawan men yij-o. Iri kwarij-e Yosapat ambara Yewura Nagawan Yeoram iri na men yarik o tena woralat olengen mberen pem tak posoma-nen men yij-o.

¹⁸ Nde, Nagawan Agasia-nen kwaridnak wene ereb-e Isarael nap nagawan nagawan-nen kwaridnak wene mbarak engga iri na arem mbaridnak worasu-o.