1 YOANES 4 - Nanduk Ngget Tul Pidnak Wene

Ndemeret Konak Indi min enesiget indi min wene 4:1-6

¹ Nanggamirak kenabuwa worak wa-e. ”Konak Indi-ge nit nenarem worasu-o” luk yugwi nap pidsa enpem kinndi angin tubu yurak pug-o. Enesiget Mbal Pem Nagawan ene lomboksa yugwi nap kwarar-e yi wi ndi wi waring kali me, it enpem worasu indi-ge Mbal Pem Nagawan eram-nen lobok yid, lak? luk, kwara lombot purag-o.

² Mbal Pem Nagawan-nen idnak Konak Indi-nen yusu-o luk yu bem-nen yenggerak pugub-o. ”Yesus Kerisut iri-ge ki nap nggal luk lobok yij-o” luk yuwa nap pidsa-ge Mbal Pem Nagawan-nen idnak Konak Indi-ge at arem worasu-o luk yenggerak pugub-o.

³ Alat nde, ”Yesus Kerisut iri-ge ki nap nggal luk lobok yij-o” luk yusu buk nab-e Mbal Pem Nagawan-nen idnak Konak Indi-ge at arem worasu-ge lag-o. Nde, at arem-e Kerisut uwim nap indi worasu-o. Nde, iri yidnak indi lobok yuwa-o luk kuligep na-ge yawo nggweyak ma yu me wok yarik worasu-o.

⁴ Alat nde, nilirak wa-e. Kir-e Mbal Pem Nagawan ilirak me, enesiget Mbal Pem Nagawan ene lomboksa yugwi nap iri-ge kit-nen urugwe nggwe rak inpigeb-o. Nggweyak ma nap enarem worasu indi iri-ge ndeyak-nen yusu-t nde, kit kenarem worasu Konak Indi-ge amawi worak terak minik-nen yusu-o.

⁵ Enesiget Mbal Pem Nagawan ene lomboksa yugwi nap iri-ge nggweyak ma nap me, ir-e nggweyak ma wene na yogola-ge, nggweyak ma nap-nen-e it-nen yidnak wene iri kulili-o.

⁶ Alat nde, nir-e Mbal Pem Nagawan ilirak-nen yili-o. Mbal Pem Nagawan enaru nap-nen-e nit nenne kulili-o. Nde, Mbal Pem Nagawan ilirak kwat yigit lak nap-nen-e nit nenne kulili bug-o. Iri kwatli iri bem-nen ndemeret Konak Indi min kabak tak onposo indi min-e yenggerak pili-o.

Mbal Pem Nagawan iri-ge enabuwa kaso-nen yusu-o 4:7-21

⁷ Nanggamirak kenabuwa worak wa-e, Enabuwa kagwi elem-e Mbal Pem Nagawan eram-nen lobok yusu me, nabuwa kabuwa yogolat wolmog-o. Enabuwa kagwi nab-e Mbal Pem Nagawan ilirak, Mbal Pem Nagawan enaru nap-nen yili-o.

⁸ Mbal Pem Nagawan-e enabuwa kagwi elem-nen yusu me, enabuwa kaso buk nab-e Mbal Pem Nagawan aru buk nap-nen yusu-o.

⁹ Mbal Pem Nagawan-nen nit nenabuwa kaso na nam tak posolar-e, nir-e at Ambara ebem-nen nunlug-et wolmaklug-e, Mbal Pem Nagawan-nen-e at Ambara misiget nderak na nggweyak ma yu me pil mbuwagaij-o.

¹⁰ Enabuwa kagwi elem-e yur-o. Nit nanduk-nen Mbal Pem Nagawan abuwa kaige-ge lag-o. Are, at-nen nit nenabuwa karuk, nit meya yidnak amberam tak puwakluk at Ambara pil mbuwagaij-o.

¹¹ Nanggamirak kenabuwa worak wa-e. Mbal Pem Nagawan-nen nit nenabuwa iri nggal kaidnak pem, nit na nit-net nabuwa kabuwa wolmomtag-o.

¹² Ap misiger-o luk tet Mbal Pem Nagawan mondok kagwi bug-o. Nde, Nit-nen nde nabuwa kabuwa yogola-ge, Mbal Pem Nagawan-e nit nenarem woralat, nit nenarem-e at-nen enabuwa kaso elem na-ge iminep mbarak irit wolma-o.

¹³ Mbal Pem Nagawan-nen at Indi-ge nit wok nindidnak me, nir-e Mbal Pem Nagawan arem woragolat, nde, ar-e nit nenarem worasu-o luk nenaru yili-o.

¹⁴ Mbal Pem Nagawan Ambara na nit nenlengen karuk, nit-nen ap erep yak ondogolar-e: ”At Ambara na-ge nggweyak ma nap inmiri yuwak-luk Eid-nen Ambara na pil mbuwagaij-o” luk yak indili-o.

¹⁵ ”Yesus-e Mbal Pem Nagawan Ambara-nen yusu-o” luk para yuwa nab-e, Mbal Pem Nagawan-e iri yidnak nap na arem woralat, nde, at na Mbal Pem Nagawan arem worasu-o.

¹⁶ Mbal Pem Nagawan-e nit nenabuwa kaso na-ge nir-e nenaru yogolat, ebem ninndi angin tubu yogolat yili-o. Mbal Pem Nagawan-e enabuwa kaso elem-nen yusu-o. Ta-nen nde ap erep enabuwa kererenak woraso ala-ge, ar-e Mbal Pem Nagawan arem woralat, nde, Mbal Pem Nagawan na at arem worasu-o.

¹⁷ Nir-e nggweyak ma yu me woragolar-et nde, Kerisut abage nggal worali me, nit nenpem wene mbarurak tarem wok yosola, kwiye lag-et wolmakluk, iri bem-nen enabuwa kagwi elem na nit nenarem iminep mbal yusu-o.

¹⁸ Enabuwa kagwi elem iminep mbarak iri-nen-e kwiye kagwi elem na lak tak poso me, enabuwa kagwi elem pem woragolar-e, kwiye lag-et woragwi-o. Ta-nen nde kwiye kasola-ge, Mbal Pem Nagawan-nen enabuwa kaso elem iminep mbarak na-ge at arem-e lak me, an meya yidnak pem nebem wene mbaruwa-o luk kwiye kaso-o.

¹⁹ Mbal Pem Nagawan nanduk-nen nit nenabuwa kaidnak pem, nit-nen na enabuwa kagwi-o.

²⁰ Nde, ap misik-nen-e: ”An-e Mbal Pem Nagawan abuwa kaso-o” luk yosolar-et nde, at anggam mbi isili rak poso ala-ge, iri yoso nab-e enesiget wene yoso-nen yusu-o. At anggam na at erengen-nen nam kaso-net nde, abuwa kaso buk-nen-e at erengen-nen kaso buk Mbal Pem Nagawan na abuwa kujwa bug-er-o.

²¹ Iri bem-e, Kerisut-nen ”Iri kwarer-o” luk yak nindidnak wene-ge yu-o: Ta-nen nde Mbal Pem Nagawan abuwa kasolar-e, at anggam na mondok abuwa-t kudtag-o.