1 YOANES 3 - Nanduk Ngget Tul Pidnak Wene

Mbal Pem Nagawan ilirak 3:1-10

¹ Nineid-nen nit nenabuwa kwarat kaidnak pem ap-nen nit ninmin-e ”Mbal Pem Nagawan ilirag-o” luk yak nindili bem wir-o! Nde, nir-e ndemeret at ilirak-net yili-o. Iri bem-nen nggweyak ma nap-nen-e nit Nineid enaru buk woragwi me, nit na yenggerak ninpili bug-o.

² Nanggamirak kenabuwa worak wa-e. Yawo-ge nir-e Mbal Pem Nagawan ilirak-nen yili-t nde, abok-nen kwat nunpurag-e nam tak pigit lak me, ngge nggal kwat mul-o? Alat nde, wene yu nak nenaru yili-o: Kerisut lobok yuwa tarem-e ar-e ndemeret ebe nenlengen kul me, at woraso nggal-et kwat mul-o.

³ Iri kwat mul-o luk, iri bem indi mbung mbung tak worasu nab-e Kerisut na mbek tag-et woraso nggal, ap iri na at na at-net mbek tag-et wolmomtag-o.

⁴ Meya elem iri-ge Mbal Pem Nagawan imiri mbarak pidnak wene kuruk toso-nen yusu me, ap-nen nde meya kwarogolar-e, Mbal Pem Nagawan imiri mbarak pidnak wene irit kuruk tili-o.

⁵ Nde, Kerisut lobok yid iri-ge ap-nen meya yidnak korak peyekluk lobok yij-o luk kenaru nar-o. Nde, ar-e mondok meya mbi kwaroso bug-o.

⁶ Iri bem-e, Kerisut arem worali nab-e meya kwat tenak worali bug-o. Nde, meya nak kwat tenak worali nab-e Kerisut na eyagit lak, enaru bug-et worali-o.

⁷ Nilirak wa-e. Ap-nen konmbol pem lujwakluk nggeyok nak yurak pug-o. Kerisut-e lud tak nak kwaroso me, ta-nen nde lud tak kwaroso-lar-e, Kerisut nggal mot mot-net yusu-o.

⁸ Nde, Sere na-ge nanduk nanduk-net meya nak kwat tenak woraso me, meya nak kwat tenak woragwi nab-e Sere ilirak-net yili-o. Nde, Sere-nen kwaroso iri na lak tak peyekluk Mbal Pem Nagawan Ambara na nggweyak ma yu me lobok yij-o.

⁹ Mbal Pem Nagawan ambara kwat yidnak nab-e at arem-e Mbal Pem Nagawan abage-t worasu me, meya kwat tenak worasu bug-o. Nde, Mbal Pem Nagawan iri-ge at Eid me, at-nen-e meya kwat tenak wolmomtag-e meya-o.

¹⁰ Yu-ge Mbal Pem Nagawan ilirak-nen yili-o luk yenggerak pogolat, yu-ge Sere ilirak-nen yili-o luk yenggerak pogolat yurag-e yu bem-nen yenggerak purag-o. Ta-nen nde lud tak nak kwarigit lak, anggamirak enabuwa kaso buk ala-ge, iri-ge Mbal Pem Nagawan ambara-ge lag-o luk yenggerak purag-o.

Nabuwa kabuwa wolmomtak wene 3:11-18

¹¹ Nanduk nandug-et kuligep wene-ge yu-o: Nit na nit-net mondok nabuwa kabuwa yogolat wolmomtag-o.

¹² Kain-nen kwarid nggal nit-nen kwarurag-e meya-o. At iri-ge Meya Kwaroso ambara me, at ambik owot wirij-o. Noluk-nen at owot wirij-o? At Kain-nen kwaroso mende-ge meya nak kwaroso-t nde, at owot-nen kwaroso-ge konak nak kwaroso ala karuk-nen wirij-o.

¹³ Nanggamirak wa-e. Iri bem-e, nggweyak ma nap-nen insili rak konpogola-ge, kinndibok yurak pug-o.

¹⁴ Nde, nennggamirak enabuwa kali iri bem-nen nir-e wat yugwi elem keya buruk, nunlug-et wolmomtak elem tenaige-o luk nenaru yili-o. Ap enabuwa kaso buk nab-e wat yugwi elem arem iri na-t worasu-o.

¹⁵ Ta-nen nde at anggamirak isili rak onposolar-e, iri-ge ap woroso nap-net yusu-o. Nde, ap woroso nab-e unlug-et woralik nalik momtak elem-e wanigit lak worasu-o luk kenaru nar-o.

¹⁶ Ap enabuwa kagwi elem-e yu bem-nen nenaru yili-o: Kerisut-e nit nenmanggim at-net at iminep wisirik pij-o. Iri nggal-et nit-nen na nit nennggamirak enmanggim nit-net nit ninminep wisirik purag-o.

¹⁷ Ap misik isilobulo kwarat worala-t nde, at anggam arengge lak me, indi kabak worala karug-et nde, at anggam yongga wirigit lak alar-e, iri yoso nab-e nggesa-nen ”An-e Mbal Pem Nagawan abuwa kasu-o” luk yuwa-o?

¹⁸ Nilirak wa-e. Nir-e ap enabuwa kagolar-e, we nenemnde bem nak-nen: ”An-e ap enabuwa kaso-o” luk yurag-e meya-o. Are, ndemeret ap enabuwa kagolar-e, nininggi-nen kwarugwi mende bem-net kudtag-o.

Mbal Pem Nagawan eram kwiye lak wolmomtak wene 3:19-24

¹⁹ Yu nggal kwasa nir-e Mbal Pem Nagawan ilirak kwat yili-o luk nenaru yogolar-e, Mbal Pem Nagawan eram ninndi yamuk yili-o.

²⁰ Nde, nit nondomok ninndi-nen meya-t kwarigen-o luk yak nondosola-ge, nit ”ninndi-nen” yebet kagwi iri-ge te-nen yuso-o. Alat nde, Mbal Pem Nagawan-e mondok terak minik nggok me, yi mende ndi mende pidsa aru-o luk nenaru yili-o.

²¹ Nanggamirak kenabuwa worak wa-e. Nit nondomok ninndi-nen meya-t kwarigen-o luk yak nindigit lak ala-ge, nir-e Mbal Pem Nagawan eram kwiye lag-et wok yurag-e ndak-nen yusu-o.

²² Nit-nen-e at-nen yidnak yidnak nak kwarogolat, at-nen peraso mende nak kwarogola-ge, at ebem nggi yul mende pidsa wok nunduwa-o.

²³ Nde, at-nen: ”Irit kwarer-o” luk yidnag-e yu-o: At Ambara Yesus Kerisut unu bem nit ninndi angin tubu luk, Kerisut-nen yak nindid ndak ndag-et nabuwa kabuwa yogolat wolmomtag-o.

²⁴ Nde, Mbal Pem Nagawan-nen yidnak yidnak kwarusu nab-e ar-e Mbal Pem Nagawan arem-et worasu-o. Nde, Mbal Pem Nagawan na at arem worasu-o. Nde, Mbal Pem Nagawan-e nit nenarem worasu iri-ge at-nen wok nindidnak Konak Indi nenarem worasu iri bem-net nenaru yili-o.