1 TIMOTIUS 5 - Nanduk Ngget Tul Pidnak Wene

Nennggamirak inndi angin tubu yidnak misiget erep kwat unpurak wene 5:1-2

¹ Ap inndi worak inmin-e wene mbaroksa yurak pug-o. Are, kat keid nggal tak puruk, nggomo wururag-o. Nde, ap sugwe inmin-e kat kanggamirak tak unpuruk,

² kweyap inndi worak inmin-e kiyarak nggal tak unpurag-o. Nde, kweyap ndugum inmin-e kindi mondok mbek tak pem-net kiridtak nggal tak unpurag-o.

Kweyap togwe kwat unpurak wene 5:3-16

³ Kweyap togwe-ge ndemeret togwe ala-ge enabuwa kasolat wolmin-o.

⁴ Alat nde, kwe togwe na-ge ilirak min it-nen ndaidnak oworak nde woragola-ge, it iri-nen-e nandug-er-e it lolo iri-ge mondok ndegel unpurak iri enaru mag-o. Ndegel onpogolar-e, ineid iniya min onoworak min-nen it ndegel inpidnak iri onggo ndegel unpurag-o. Nde, Mbal Pem Nagawan indingen peraso mende iri kwarugwi irir-o.

⁵ Togwe terak ndumu ndemeret togwe iri-nen-e indi-ge Mbal Pem Nagawan ebem mbung mbung tak woralar-e, kubu-nen lengge-nen at eram tepan yosolat, at yongga wuruwakluk emengen mbarosolat yoso-o.

⁶ Alat nde, at ukwe ukwe mende nak kore yoso kwe togwe iri-ge urug-et nde, wat yidnak-nen yusu-o.

⁷ Kweyap togwe meya ma naru, wene yu yak indi-o.

⁸ Alat nde, at lolo min at ambik ama woragwi nap min ndegel onposo buk nab-e at indi angin tubu yidnak iri nak keya busu-o. Nde, inndi angin tubu yigit lak nab-et meya kwarugwi-t nde, at-nen meya kwarusu iri-ge terak minik-net yusu-o.

⁹ Kweyap togwe unnu mbarugwi engga na bem mbarogolar-e, yu nggal kwarugwi ala nak-nen mbarurag-o: Olengen enam pulu woraidnak ala nak-nen, nandug-e un misiget nak wanidnak kwe ala-nen

¹⁰ konak nak kwaroso bem ap pidsa enaru ala, ilirak kwara ndegel onposo ala, ap sal enal paroso ala, anggamirak inndi angin tubu yidnak nap unuwok maroso ala, anggun panggun woragwi nap yongga ondoso ala, wene poro bem yogolar-e, pempa konak nak kwaroso ala, unnu mbarurag-o.

¹¹ Alat nde, kweyap togwe unnu mbarugwi engga bem-e togwe-net nde ndugum ala, unnu mbarurak pug-o. It-nen ap wanurak inndi nak nggok tak puruk, Kerisut na keya buruk, ap nin wanogola-ge,

¹² nandug-et Kerisut imbiri bem ”Iri nggal kwarimin-o” luk owak mbaridnak na kwid togola, it ondomok enpem wene mbarurak kwarak pili-o.

¹³ Iri-nen-o, ir-e perari lembe yogolar-e, ap enma ya nggwilik nili-ge meya-t nde, meya nggulok kwarogolar-e, enmende amburu waruk nogolar-e, ap onpok pogolat, ap onowene-t nde, erep tenakolat, yurak puk wene-t nde yogolat yili-o.

¹⁴ Iri bem-e, nit ninmin wim mbarak nap-nen nit nonpok pigit lak makluk, it togwe-net nde ndugum ala, ap wanuruk, inlirak ndaguruk, enma woragwi ndegel onpogolat wolmomtak iri-ge an-e nindingen-o.

¹⁵ Kweyap togwe ereb-e kabak luk, Sere langgal luk mbitli-o.

¹⁶ Nde, indi angin tubu yidnak nap mbi-nen at winde togwe mbi worala-ge, lambuk tak inpidnak nap anggun tak unpuwa naru, at-net yongga worosolat wolmag-o. Nde, lambuk tak inpidnak nap-nen-e kweyap togwe mondok terak iri na yongga ondogolat wolmak-nen-o.

Ogore yidnak nap kwat unpurak wene min nggomo wene erep min 5:17–6:2a

¹⁷ It ogore yidnak nab-e yabu konak nak wanogolat-nen: ”Iri nggal, yu nggal kwarurag-o” yugwi nap ala-ge, mondok kwara mberen pem tak pidnak nggal-et unnu kek tak purag-o. Nde, nggok lombog-e it aid wene yogolat, ap mul ondogolat inligak mbusu irit kwat unpurag-o.

¹⁸ Mbal Pem Nagawan engga bem-nen yosolar-e: ”Lembu wam wabuk ngen nggal mbela womakluk yimindil waring kasu iri-ge, emende kamaru bug-o” yurug-e, ”Yabu wanoso nap-nen-e yabu wanidnak onggo irit wanuwag-o” yij-o.

¹⁹ Ogore yidnak nap ebem wene mbi pogola-ge, kulurak pug-o. Alat nde, ap mberen ala, kenan ala-nen ”Ndemerer-o” luk yogola-nen perak kulurag-o.

²⁰ Ap erep inndi kwiye kujwakluk, it meya kwat tenak woragwi nab-e ap pidsa inmbiri bem-et innggiri wururag-o.

²¹ Mbal Pem Nagawan min Kerisut Yesus min lenak inpidnak aid nap min inmbiri bem-et wene yu-ge nene amawi min-et yak kurusu-o. Mirik kubusu wene yu nak kat-nen kwarosolar-e, ap misig-e kindingen tak puruk, op tak posolat, nde, ap misig-e kisili rak puruk, meya rak posolat yurak pug-o. Are, mot mot nak kwarosolat wolmin-o.

²² Mbal Pem Nagawan eyabu wanuwaklug-e, mija lele ap enanggul tenagurak pug-o. Nin nap-nen meya yidnak arem kat tet nggurak pug-o. Are, kwara ndegel korasolat, mbek tak irit wolmin-o.

²³ Kar-e pempa ud nak kaso me, yi nag-e norak pug-o. Are, kindi ud iri amanggim-e anggut engen amburu siyak nilik kwari-o.

²⁴ Ap erep-nen meya yidnag-e enpem wene mbarigit lak me, abuwokma-net nam yoso-o. Alat nde, ap erep-nen meya yidnak perak nde abok-nen nam yoso-o.

²⁵ Iri nggal-et konak kwaridnak na nam-et kagwi-o. Nde, konak kwaridnak ereb-e nam yurak puk na, mondok kura nak wolmomtag-e meya-o.