1 TIMOTIUS 4 - Nanduk Ngget Tul Pidnak Wene

Ap kabak tak unpugwi wene mul undugwi nap inmin-e: ”Kar-e yu nggal kwarurag-o” luk Timotius yak tidnak wene 4:1-16

¹ Konak Indi-nen mondok nam-et yosolar-e: ”Abok woragolar-e, ap ereb-e inndi angin tubu yidnak keya buruk, ap kabak tak unpugwi inndi langgal luk mborogolat, kugi-nen mul ondoso wene na langgal luk mborogolat yuwa-o” luk yij-o.

² Nde, wene yu elem-e onmbol pem lagolat enesiget yugwi nap enarem-nen lobok yusu-o. Posid wiril yidnak embem-nen ninggidnak nggal it-nen kwiye kagwi inndi-ge lak tak pusu-o.

³ Iri yidnak nap-nen yogolar-e: ”Kwe wanurak pug-o. Nunggwi mende ereb-e norak pug-o” luk yili-o. Alat nde, nunggwi mende iri-ge Mbal Pem Nagawan-nen nujwakluk ndak wiridnak me, inndi angin tubu yidnak nap min ndemeret wene enaru nap min-nen nonggolar-e, Mbal Pem Nagawan wa yak turuk norag-o.

⁴ Mbal Pem Nagawan-nen ndak wiridnak tengge pidsa-ge konak nak-nen yusu-o. Misiget ter-o luk mondok wosama-ge lag-o. Are, pidsa nonggolar-e, Mbal Pem Nagawan wa yak turuk, norag-o.

⁵ Nde, Mbal Pem Nagawan-nen yidnak wene min tepan yidnak min-nen-e nunggwi mende iri-ge nalma rak pusu-o.

⁶ Kat-nen nde wene yu pidsa nennggamirak mul ondosola-ge, Kerisut Yesus ndegel oboso nap konak irit kwat yugun-o. Kwat yosolar-e, ninndi angin tubu yidnak elem iri-nen na, kat-nen yawo woralat langgal luk mburusu wene owak iri-nen na kat kindi umut nduruwa-o.

⁷ Alat nde, konmborak-nen yugwi wene lom ebe lak mende meya iri keya bi-o. Keya buruk, Mbal Pem Nagawan indi-n peraso kebage iri wanurak pem wal kasolat wolmin-o.

⁸ Ap enpe amawi makluk onowak mulugwi iri-ge ob-et nde, iri-ge te nggal-nen yusu-o. Nde, inndi-ge Mbal Pem Nagawan abage nggal makluk onowak mulugwi iri-ge mondok nggok lombok-nen yusu-o. Iri arem-e yawo nunluk worali min abok nunluk wulmul min worasu-nen yusu-o.

⁹ Wene yu-ge ndemeret wene-o luk mondok kwara yebet kudtak-nen yusu-o.

¹⁰ Nde, uruk nak woraso Mbal Pem Nagawan na ebem ninndi kwara mbung mbung tak worali me, nir-e nenmawi kondogolat, yabu kwarat wanili-o. Nde, Mbal Pem Nagawan iri-ge ap oboksa Inmiri Yoso Nab-et nde, nggog-e inndi angin tubu yidnak nap Inmiri Yoso-nen yusu-o.

¹¹ Wene yu-ge yak ondosolat, mul ondosolat wolmin-o.

¹² Kar-e ap sugwe me, ap misiger-o luk-nen te rak kuburag-e meya-o. Are, kat-nen inndi angin tubu yidnak nap kat kebage mirik onposolar-e, wene yoso bem-nen na, kat-nen kwaroso bem-nen na, enabuwa kaso bem-nen na, mot mot nak kwaroso bem-nen na, mbek tak woraso bem-nen na kat kebage irit it-nen kwaruwakluk mirik onposolat wolmin-o.

¹³ An lobok yigit lak worala, nememet worasolar-e, kar-e Mbal Pem Nagawan Engga-ge ap inmbiri bem wonat ondosolat, ap nggomo ondosolat, mul ondosolat wolmin-o.

¹⁴ Konak Indi-nen we wok kiridnak mende iri-ge kar-e liring liring tak purak pug-o. Nde, we wok kiridnak mende iri-ge lambuk tak inpidnak nap-nen idnak ogore yidnak nap ininggi kanggul pem piga tarem-nen ”At iri nggal kwaruwa-o” luk kurul pidnak tarem-nen wok kirid nar-o.

¹⁵ Kat-nen konak nak kwaroso kebage terak mena nggal lasu ap oboksa-nen kujwaklug-e, iri mende pidsa iri-ge mondok kwara kwarosolat wolmin-o.

¹⁶ Kat-net kondomok kwil kwal korasolat, kat-nen mul ondoso wene kwara yik karok woralat min-o. Yu mende pidsa kwara kwarosolat wolmin-o. Nde, iri yugun pem-e, kat kondomok kimiri yosolat, kat-nen yidnak wene kuluwa nap na inmiri yosolat yugun-o.