1 TIMOTIUS 3 - Nanduk Ngget Tul Pidnak Wene

Lambuk tak inpidnak nap yik eneyarok woragwi nap enpage tena wolmomtak wene 3:1-7

¹ Wene yu-ge ndemerer-o: ”Lambuk tak inpidnak nap yik eneyarok woraso nap teyeg-o” luk yusu nab-e konak yabu waneyekluk-nen yusu-o.

² Nde, lambuk tak inpidnak nap yik eneyarok woraso nab-e meya kwaroso buk nap, ogwe misiget worak nap, ondomok indi mamak poso nap, indi nggat nggat worak nap, indi lid puruk-nen kwaroso nap, ”Ap sal nama nggumer-o” yoso nap, ap mul ondoso aru nap,

³ anggut engen amburu ndonggosa naro buk nap, isilepma yoso buk nab-et nde, indi yangonak nap, ap lambuk tak onposo nap, uwang nggok tak poso buk nap,

⁴ at ama woragwi nap-nen at-nen yidnak nak kwarugwi nap, ilirak-nen at indi aye min-et at ene kuluwakluk onggomo ondoso nap irit mag-o.

⁵ Nde, at-nen-e at ama woragwi nap na kwara yik eneyarok woraso buk ala-ge, nggesa-nen Mbal Pem Nagawan-nen idnak lambuk tak inpidnak nab-e yik eneyarok wolma-o?

⁶ At iri-ge at ambikpebe kek yosola, Sere ebem ween mbarid nggal, at ebem wene mbaruwa naru, nggeret aid wene wanidnak nab-e mendak purak pug-o.

⁷ Ap pidsa-nen yik kagolar-e, konak nak kagwi nap irit mendak uburag-o. Nde, we ereba-t mendak posoma-ge, ap-nen at obok pogola-ge, Sere esabu arem ngonok ma-o.

Ogore yidnak nap-nen kwarurak wene 3:8-13

⁸ Iri nggal-et lambuk tak inpidnak nap yik eneyarok woragwi ogore yidnak nab-e mot mot na woragwi nap, enne ndogwal mberen yugwi buk nap, anggut engen amburu ndonggosa nunggwi buk nap, uwang nggok tak pugwi buk nap irit mag-o.

⁹ It iri-ge it-nen yebet kagwi inndi mbek tak pem-net Mbal Pem Nagawan-nen nam tak pidnak inndi angin tubu yugwi wene iri-ge kwara tena wolmomtak nap mag-o.

¹⁰ Nandug-er-e it inndi ngarurag-o. Ngatluk nde, meya kwarugwi buk ala-ge, lambuk tak inpidnak nap yik eneyarok woragwi yabu na enpem purag-o.

¹¹ Iri nggal-et it onkwerak na konak nak kwarugwi kweyap, ap onpok na pugwi buk kweyap, ondomok inndi mamak puruk woragwi kweyap, yi mende ndi mende bem mot mot nak kwarugwi irit mag-o.

¹² Ogore yidnak nab-e ogwe misiget worak nap, at ilirak min ama woragwi nap min kwara ndegel onposo nap mag-o.

¹³ It ogore yidnak nap-nen lambuk tak inpidnak nap kwara yongga undugwi ala-ge, it kek tak onpogola, Kerisut Yesus ebem inndi angin tubu yurak wene iri-ge ir-e kwiye lag-et yak ondogolat wolma-o.

Lambuk tak inpidnak nab-e lud tak nak kwarugwi paro min eyogo woraso min-nen yusu-o 3:14-16

¹⁴ An-e yanem-et kiyil lobok yurak nindi puruk worasu-t nde, engga yu-ge kamanggim mbarusu-o.

¹⁵ Alat nde, an ndag-et lobok yigit lak nde ala-ge, Mbal Pem Nagawan ama woragwi nap nggal, uruk nak woraso Mbal Pem Nagawan-nen idnak lambuk tak inpidnak nap nir-e ngge nggal woragwi-o luk karu yonokluk-nen mbarusu-o. Nde, lambuk tak inpidnak nab-e ndemeret wene paro min eyogo woraso min-nen yusu-o.

¹⁶ Nit-nen Mbal Pem Nagawan erembel wanugwi kura bidnak wene iri-ge ndemeret nggok lombok-nen yusu-o: ”At ondomok-net ki nap enpage nggal luk, nam yij-o. At lud tak nak kwaroso iri-ge Konak Indi-nen nam tak pij-o. Aid nap inmbiri bem nam yij-o. At owene-ge Mbal Pem Nagawan enaru buk nap ennggendumu yiga-o. Nggweyak ma yu me-nen inndi-ge at ebem angin tubu yiga-o. Abinal pem lek karuk lagaij-o.”