1 TESALONIKA 4 - Nanduk Ngget Tul Pidnak Wene

Mondok marak wolmakluk, nggomo indidnak wene 4:1-12

¹ Nanggamirak wa-e. Nir-e Nagawan Indo Yesus unu bem wene misik kwarobokluk kenmengen mbatli-o. Mbal Pem Nagawan indingen tak purak pem kwarogolat wolmomtak mende kwarobokluk mirik kinpige nar-o. Nde, kit iri nggal kwatli-t nde, mondok kwara kwarogolat worabog-o luk nggomo kindili-o.

² Nagawan Indo Yesus unu bem-nen ”Iri nggal kwaru-o” luk mirik kinpige-ge kenaru nar-o.

³ Mbal Pem Nagawan indi-n pidnak mende-ge yu-o: Kir-e marak nak woragolat, kwami terak terak ye unpugwi buk irit wolmer-o.

⁴ Kit ap kenambik tak-nen konkwe wanogolar-e, marak nak woragolar-e, konak nak kwarurak iri-ge kenaru tobog-o.

⁵ Mbal Pem Nagawan enaru buk nap-nen kwatli nggal, mbabi kwarurak inndi peragwi bem-nen kwarurak pug-o.

⁶ Yu mende kwarugwi bem-e ap misik-nen at anggam meya rak posolat, at anggam ombol pem ludtak pug-o. Nandug-e wene yu yak kondogolar-e: ”Nagawan Indo-nen iri mende kwarugwi nap enpem wene mbaruwa-o” luk nir-e nenne amawi min yak kindige nar-o.

⁷ Nir-e mbilaro ngin mende kwaruwakluk-nen Mbal Pem Nagawan-nen wene mbo ninpij-e lag-o. Are, nir-e marak nak wolmakluk-nen wene mbo ninpij-o.

⁸ Iri bem-e, wene yu keya busu nab-e ki nap-nen yidnak wene keya busu-ge lag-o. Are, at Konak Indi wok kondoso Mbal Pem Nagawan irit keya ubusu-o.

⁹ ”Kennggamirak inmin nabuwa kabuwa wolmer-o” luk an-nen engga mbal kundurag-e lag-o. Mbal Pem Nagawan-nen ”Ap-nen nabuwa kabuwa yugwi-ge iri nggal-o” luk mirik kinpid naro-o.

¹⁰ Nde, kit-nen-e nabuwa kabuwa yugwi elem-e Makeronia woragwi nennggamirak oboksa inmin ndemeret kwatli-t nde, nennggamirak wa-e. Iri bem-e, it-nen kwatli iri-ge mondok kwara kwarogolat wolmer-o luk kenmengen mbatli-o.

¹¹ ”Nir-e yamuksa wolmog-o” luk kinndi-nen peragolat, kit kondomok konowene mbarogolat, kit kondomok kininggi-nen yabu wanogolat wolmer-o luk nanduk-nen na yak kindige nar-o.

¹² Kit nde iri nggal kwarogola-ge, kit kenambik kininggi bem-et woragola-ge, it inndi angin tubu yigit lak nap-nen kit kinmin-e ”Iri-ge mot mot nak kwaroso nab-o” luk kunpurujwa-o.

Nagawan Indo lobok yurak wene 4:13-18

¹³ Nennggamirak wa-e. At ebem inndi mbung mbung tak woragwi buk nap-nen inndi puru pera yili nggal, kit-nen na iri nggal kinndi puru pera yugup naru, wat yidnak nap iri nggal kwat unpuwa-o luk kenaru wolmomtak iri-ge nir-e nindingen-o.

¹⁴ Yesus na wat luk, tuguruk uruk yij-o luk iri bem-e nit ninndi angin tubu yili-o. Iri bem-e, Mbal Pem Nagawan-nen-e Yesus ebem inndi angin tubu luk wat yidnak nab-e at imin totno wolmakluk unluk tak puwa-o luk, ninndi angin tubu yili-o.

¹⁵ Wene yu yak kindili-ge, Nagawan Indo-nen yidnak wene bem-net yak kindili-o. Nagawan Indo lobok yuwa tarem nunluk wulmul nap nit nanduk mborogolat, it nanduk wat yidnak nap abok tak unpul pug-o.

¹⁶ Nagawan Indo ar-et aid arem-nen mbuwasola ereya na-net aid nap nagawan-nen ene nggoksa yosolat, Mbal Pem Nagawan obosid poba ene yasolat ma-o. Nde, Kerisut ebem inndi angin tubu luk wat yidnak nab-e nandug-et unluk ma-o.

¹⁷ Iri luk, nit nunluk wulmul nab-e it inmin lambuk luk, nggan nggan arem lagolar-e, teram iri me-nen Nagawan Indo imin lambuk mul-o. Iri lug-e, Nagawan Indo imin pem-et woralik nalik wulmul-o.

¹⁸ Iri bem-e, wene yu bem kit na kit-nen kinndi yanggwen kerak mbogolat wolmer-o.