1 TESALONIKA 3 - Nanduk Ngget Tul Pidnak Wene

Timotius-nen konak wene waruk lobok yidnak wene 3:1-13

¹ Nde, nit kunndulu-nen wolmomtak puk ala karug-e, nit-nen peragolar-e: ”Nit mberen nap Atena yu me woragolar-e,

² nit nonowot Timotius, nit totno Mbal Pem Nagawan eyabu wanogolar-e, Kerisut-nen yidnak aid wene yak ondoso nap iri-ge wirik ubuwog-o” luk yige-o. Nde, wirik uburak yige iri-ge, kit kinndi angin tubu yidnak na kwara uwi yabosolat, nggomo kondosolat,

³ nit lel mberel ninpili yu karuk, kit misik-nen kinndi angin tubu yidnak keya buruk mburugup naru wirik ibige-o. Nde, lel mberel ninpili yu-ge, Mbal Pem Nagawan-nen ”Irit kwat unpuwag-o” luk yidnak pem kwat ninpili-o luk kir-e kenaru nar-o.

⁴ Nde, nit nanduk kit kinmin woragolar-e, abuwok ma-net ”Lel mberel nunpuwa o” luk mondok yak kindige-o. Nde, yak kindige iri na nggal-et ndemeret kwat ninpili-ge kir-e kenaru yili-o.

⁵ Iri bem-e, an nindi wolmom puk ala, kit kinndi angin tubu yidnag-e ngge kwarak worali-o luk naru yekluk Timotius wirik ibil lobok yigi iri-o. Sere-nen kit kenarem woraga pil ngguwama, nit-nen wanidnak yabu-ge ebe lak mende ma-o luk numud-nen yigi-o.

⁶ Nde, yawo Timotius na-ge kit kendam-nen tuguruk nit nendam lobok yarik, kit kinndi angin tubu yidnak wene nde, kit-nen nit nenabuwa kali wene nde, konak wene irit waruk lobok yij-o. At-nen yak nondosolar-e: ”It iri-ge pempa kit yebet keneyagolar-e, enalen min-et yebet keneyali-o. Nde, kit-nen it iniyudtak perali nggal, it-nen na irit kit kiniyudtak perali-o” luk yak nindij-o.

⁷ Nir-e andi bandi min anggun panggun min kagolar-et nde, kit konpok kulige iri-nen na kit kinndi angin tubu yidnak iri-nen na nit ninndi yamuk tak pij-o.

⁸ Kir-e Nagawan Indo ebem tugup lak woragola-ge, iri yidnak pem nir-e ndemeret nunluk worali-o.

⁹ Yawo-ge kit kenpem ala, nit-nen Mbal Pem Nagawan wa yak togolar-e, kwara wa yak turag-e meya-o. Kit-nen yidnak pem nit Nenmbal Pem Nagawan imbiri bem nenalen kagolar-e, at wa yak tili-o.

¹⁰ Kubu-nen lengge-nen nir-e kiri keresa at emengen mbarogolar-e: ”It inmin lambuk yogolat, it-nen kwara inndi angin tubu yigit lak iri na ndak tak unpuwokluk-nen yili-o” luk tepan yugwi-o.

¹¹ Nineid Mbal Pem Nagawan at-nen na, Nenagawan Indo Yesus-nen na kit kendam lobok yuwok-nen tu mirik nunpuwag-o.

¹² Nit-nen kenabuwa kali iri nggal-et kit na kit-net nabuwa kabuwa wolmomtak elem min nin nap enabuwa kudtak elem min-e Nagawan Indo-nen-e utlud lombok kwarat tak kunpuwag-o.

¹³ Nde, at-nen kit kinndi amawi rak posola-ge, nit Nenagawan Indo Yesus na at winde nap oboksa inmin luk lobok yuwa tarem-e kir-e Nineid Mbal Pem Nagawan imbiri bem-e kenpem kop kap lak, mondok marak nab-et worabog-o.