1 TESALONIKA 1 - Nanduk Ngget Tul Pidnak Wene

Wa yak indidnak wene 1:1

¹ I Paulus min Silwanus min Timotius min-nen-e Tesalonika woragwi lambuk tak inpidnak Nineid Mbal Pem Nagawan min Nagawan Indo Yesus Kerisut min-nen idnak nap kit kenmanggim engga yu mbatli-o. Mbal Pem Nagawan-nen we wok ondoso elem min lambuk tak woragwi elem min kit kinmin wolmag-o.

Paulus-nen aid wene yak indidnak pem ebem kwat yidnak wene 1:2-10

² Kit oboksa kenpem ala, nir-e pempa Mbal Pem Nagawan wiwa-o luk yak togolar-e, kit kunnu wonasa kundugu kenmanggim tepan yili-o.

³ Nineid Mbal Pem Nagawan imbiri bem nit-nen yebet keneyagolar-e, kit kinndi angin tubu yidnak pem-nen kwarogolat woragwi nde, ap enabuwa kagolat-nen yabu kenmawi min-et wanugwi nde, Nenagawan Indo Yesus Kerisut ebem kinndi mbung mbung tak pigeb-e mondok tugup lak worali nde, iri mende yebet yebet tak worali-o.

⁴ Nennggamirak wa-e. Mbal Pem Nagawan-e kit kenabuwa karuk, at arengge rak kenpeyekluk len kinpij-o luk nenaru yili-o.

⁵ Nde, nit-nen-e aid wene kit kendam waruk lobok yige iri-ge, we nenne nak-nen yak kindigit lag-o. Are, Konak Indi amawi bem-nen na ”Yu-ge ndemeret wene-net yusu-o” luk, mondok nenaru yidnak pem-nen na yak kindige nar-o. Nde, kit kenmanggim ala, nir-e kit kennggendumu woragolat-nen yabu wanige na-ge kenaru nar-o.

⁶ Kir-e nit min Nagawan Indo min-nen kwarugwi nggal kwat yigeb-o. Nde, kit kenpem angin worak mende kwarat mbij-et nde, aid wene iri wanogolar-e, Konak Indi-nen wok ondoso enalen iri na bem-net wanigeb-o.

⁷ Iri kwarigep pem-e Makeronia min Akaya min woragwi inndi angin tubu yidnak nap-nen-e kit kenpage iri nggal waniga-o.

⁸ Nagawan Indo owene-ge kit kendam-nen wigak yosolar-e, Makeronia min Akaya min nak mbirigir-e lag-o. Are, Mbal Pem Nagawan ebem kinndi angin tubu yidnak wene-ge yi wi ndi wi wigak yij-o. Iri bem-e, nit-nen wene mbi yurag-e lag-o.

⁹ Are, iri wene kuliga nap it ondomok-nen kenggera yak nondogolar-e, nir-e kit kendam wok yogola-nen wok ninpigep wene min kit nanduk kugiwak kwarugwi keya buruk, nden karuk Mbal Pem Nagawan ambigit nggwe lobok yigep wene min ndemeret uruk nak woraso Mbal Pem Nagawan ndegel ibili wene min

¹⁰ at ambara aid arem-nen mbuma-o luk yik karok worali wene min oboksa yak nundugwi-o. At Ambara Yesus iri-ge wat yidnak nap ennggendumu-nen uruk tak pij-o. Nde, Yesus-nen-e Mbal Pem Nagawan isilepma abok-nen ap enpem mbumomtak iri na inggem-nen ninmiri yij-o.