1 SEMUEL 8 - Nanduk Ngget Tul Pidnak Wene

Isarael nap-nen nagawan nggi yidnak wene 8:1-2

¹ Nde, Semuel iri na indi worak ala-ge, at ilirag-e at ondolma Isarael nap enpem wene mbenarugwi nap makluk mendak inpij-o.

² Nde, Semuel ambara manggu iri na unu-ge Yoel, nde, imbirik iri na unu-ge Abia-o. Nde, it ya na-ge o Mbereseba iri me ap enpem wene mbenarugwi nap woraiga-o.

³ Alat nde, it mberen ya na-ge ineid-nen kwaroso nggal-e kwarigit lag-o. Are, it ondomok enmanggim nak uang ndok wuruwaklug-e ap enpem wene mbenarogolar-e, onggo lesa wanogolat, ap enpem wene mot mot mbarugwi iri na-ge lugud tak pogolat woraiga-o.

⁴ Iri kwarogola karug-e, Isarael nap ennggendumu enne kulugwi nab-e ndok wutluk Semuel eram Arama iri me mbirigarik-nen

⁵ Semuel yak togolar-e: ”Kar-e kindi worak yigenma-o. Nde, kat kelirag-e kat-nen kwaroso nggal-e kwatli buk me, nir-e ap enlem erep ereba nagawan-nen tena unpuruk worali nggal-et nit na nagawan misik-nen tena nunpuruk wolmakluk nagawan misik mendak ninpi-o” luk yak tiga-o.

⁶ Yak togola-ge, Semuel-nen-e it-nen nggi yiga wene iri-ge isili rak purug-e, at-nen-e tepan pem Nagawan Indo yak tij-o.

⁷ Iri yak tosola, Nagawan Indo-nen yosolar-e: ”It enne irit kuli-o. Iri-ge kat keya kobogolat-nen kwatli-ge lag-o. Are, an-et keya nibili-o. Ir-e an-et it ennggendumu nagawan wolmomtag-e inndi-ge perali bug-o.

⁸ Nanduk an-e ir-e Mesira iri me-nen wesera wok unpuruk lobok yosola-net an neram-nen nden karuk, kugwiwak erembel wanogolar-e, it-nen yawo kwat kibili iri nggal-et an na kwat nubugwi-o.

⁹ Iri bem-e it-nen nggi yili irit kuli-o. Alat nde, kat-nen abuwokma enaru wolmakluk yak ondosolar-e, abok nagawan iri-nen kwat unpuwa iri-ge mondok kwara enaru rak purag-o” luk yak tij-o.

¹⁰ Nagawan Indo-nen yak tid wene ereba na oboksa-ge Semuel-nen-e it ennggendumu nagawan mendak purag-o luk at emengen mbatli nap ereba na yak indij-o.

¹¹ Yak ondosolar-e: ”Nagawan iri-nen-e abog-e yu nggal kwat kunpuwa-o” luk Semuel-nen yak ondosolar-e: ”Abok nagawan iri-nen-e kit kenmbararag-e lembesa lesa san ombo nggorak unpuwama, ereb-e san ombo nggweyak koma bem nugwi rak onposolat, nde, ereb-e san ombo kura ombol pem nugwi rak onposolat, nde, ereb-e nggweyak tu nugwi rak onposolat ma-o.

¹² Nde, ereb-e san ombo enpe seribu (1.000) enanggul pem san ombo onowe rak onposolat, nde, ereb-e ap san ombo lima pulu (50) enanggul pem kek tak onposolat kwaruwa-o. Iri-nen at amanggim nggweyak yalurak watsa enpem posolat, at eyapmu yagidnak ereba na ogwere yosola, mbara uburak enpem posolat, at amanggim tup san kwarogolat, wim koma konurak mende ndak worogolat kwarurak irit enpem puwa-o.

¹³ Nde, kinligwami enpem posolar-e, emben konak amburu amanggim konugwi rak onposolat, at amanggim nunggwi mende sakwi rak onposolat, oroti konugwi rak onposolat kwaruwa-o.

¹⁴ At-nen kit keneyabu wanosolar-e, yabu anggut yabu min saitun yabu min yakwi ondoro konak ereba na-ge at-nen mengga wanurug-e, at imin yabu misik erep wanugwi nap ereba na wok unduwa-o.

¹⁵ Kit keneyapmu min kenanggut engen yabu min-e yakupndik engen yosola-ge, ’Enggep lombok karetkwe yidnak an wok nururag-o’ yuwama, menggesa at wok togolat woragub-o. Iri yugupmu at-nen-e at-nen idnak san ombo onowe min at imin yabu misik erep wanugwi nap min wok unduwa-o.

¹⁶ Nde, at-nen-e kit ndegel kunpugwi nap ereba na min konowam konak min kenkelerai wam konak min at eyabu wanurak amanggim at nak wanuwa-o.

¹⁷ Kit konlomba min kenkambing min ligik ereba na-ge enggep lombok menggesa karetkwe yidnak at-nen wanuwa-o. Kit kenpe na at ndegel ubugwi nab-et kwat yugub-o.

¹⁸ Nde, iri kwat kunpurak tarem iri nde wok yosola-ge, kir-e nagawan kennggendumu mendak pugup iri na-nen ndowaga ’Niri nera-o’ luk yane worogolat woragub-o. Yane wurugub-et nde, Nagawan Indo-ge mondok kuluwa bug-o” luk yak indij-o.

¹⁹ Yak indij-et nde, Isarael nab-e Semuel-nen wene yak indid iri na-ge ndemerer-o luk peragit lak unsubem mbo biga-o. Iri yogolat-nen yogolar-e: ”Ereba-ge ereba-t mag-o. Nir-e nennggendumu nagawan-et mendak purag-o.

²⁰ Nir-e ap erep ereba nagawan-nen lit unpuruk wim nggwili ereba nggal-et nit nenagawan-nen lit nunpuruk wim nggosolat, tena nunpuruk woralat kwaruwak-nen mendag-et purag-o” luk yiga-o.

²¹ Yogola, it-nen yiga wene ereba na oboksa-ge Semuel-nen kulurug-e, at-nen-e Nagawan Indo yak tij-o.

²² Yak tosola, Nagawan Indo-nen Semuel yak tosolar-e: ”Kar-e it inndi-nen pidnak irit kwarosolar-e it enmanggim nagawan misik mendak unpurag-o” yak tosoloma-ge, Semuel-nen-e Isarael nap ereba na-ge enmarak ndi rak onposola-ge, enmarak ndi yiga-o.