1 SEMUEL 7 - Nanduk Ngget Tul Pidnak Wene

¹ Iri yikma, Kiriyat Yearim woragwi nap lobok yogolar-e, waruk mbirigarik ap misik unu-ge Abinandap uwi ndobo bem worak iri na me piga-o. Purug-e, Abinandap ambara Elieset iri na-nen urul pidnak wene labu mbarak iri na-ge tena wolmakluk lenak piga-o.

Semuel-nen Isarael nap tena unpuruk woragid wene 7:2-17

² Nde, Nagawan Indo-nen idnak urul pidnak wene labu mbarak iri na o Kiriyat Yearim woralar-e, olengen dua pulu nggal woragij-o. Worala-ge, ereya na tarem-e Isarael nap oboksa-nen ”Yongga nindi-o” luk Nagawan Indo eram wene mbo bogolat woraiga-o.

³ Iri yogola, Semuel-nen Isarael nap yak ondosolar-e: ”Kit-nen nde mondok kinndi min-net tuguruk nden karuk, Nagawan Indo eram mbutluk Nagawan Indo kek tak purak yogola-ge, nin nap unkugwiwak min kugwi Ndewi Asoret ndak worak min mondok keya buruk, kenpe-ge mondok ndemeret ndemeret kegera Nagawan Indo eram nak pogolat, at nak kek tak pogolat wolmomtag-o. Iri kwarogola-ge, Pilisin nap ininggem-nen wisirik kunpuwa-o” luk yak indij-o.

⁴ Yak ondosola-ge, Isarael nab-e Mbaal kugwi ndak worak ereba na min kugwi Ndewi Asoret ndak worak ereba na min abu mbo buruk, Nagawan Indo kek tak pogolat woraiga-o.

⁵ Iri lug-e, Semuel-nen yosolar-e: ”Kit kenmanggim an-nen Nagawan Indo emengen mbareyek-nen Isarael nap oboksa o Mispa ndok worak werer-o” luk yak indij-o.

⁶ Iri yak ondosoloma-ge, it oboksa-nen Mispa iri na me ndok wiriga-o. Iri kwarogolar-e, yi kenangga Nagawan Indo amanggim kiril kagolug-e, aptusa nunggwi mende ninggit lak woragolat-nen yogolar-e: ”Nir-e mondok Nagawan Indo imin meya-t kwarugwi-o” luk pariga-o. (Nde, Mispa iri me-nen-e Semuel-nen-e Isarael nap-nen yuk puk mbugwi ereba na wene kona ndamosolat woraso-o.)

⁷ Iri yogola-ge, Pilisin nap-nen kuliganggal-e: ”Isarael nab-e Mispa ndok wirigarig-o” yogola kulurug-e, Pilisin nap nagawan lima ereya na-ge it-nen idnak ensan ombo inmin-et Isarael nap unduwokluk mbiriga-o. Iri yogola, Isarael nap-nen onpok kulurug-e, kwiye kwarat yogolat-nen

⁸ Semuel yak togolar-e: ”Pilisin nap ininggem-nen Nagawan Indo-nen ninmiri yuwakluk nit-nen idnak Nagawan Indo Mbal Pem Nagawan eram tepan kundugu-t wolmomtag-o” luk yak tiga-o.

⁹ Iri yogola karug-e, Semuel-nen-e lomba usul misik wanarik, emben Nagawan Indo amanggim posolar-e ebis-et wosa kan pij-o. Iri rak purug-e, Nagawan Indo-nen Isarael nap yongga unduwakluk tepan yosola-ge, Nagawan Indo-nen-e Semuel ene-t kulij-o.

¹⁰ Nde, Semuel-nen Nagawan Indo amanggim lomba wosa kan posoma ereya na-net Pilisin nap nen Isarael nap enpem mbud yukmu ereya na-net Nagawan Indo-nen enpem o nggu ngara mberak posoloma, Pilisin nab-e nari wari yogolat, inndi kabak yidnak irit ndi yiga-o.

¹¹ Nde, Isarael nap san ombo Mispa-nen mborogolar-e, Pilisin nap indil indil muk iniyil mbiriga mbiriga o Mbet-kat maksa ereba inpil mbiriga-o.

¹² Iri rak purug-e, Semuel nen-e kerep misik Mispa wok Sen wok iri na me sindik posolat-nen yosolar-e: ”Nagawan Indo-nen mondok kwara yongga nindij-o” luk yosolar-e, kerep iri na unu-ge ”Yongga Nindidnak Kereb-o” luk unu yarij-o.

¹³ Iri nggal kwasa Pilisin nab-e urugwe nggwe rak inpiga-o. Iri rak inpikma, it-nen Isarael nap-nen tenagid nggweyak arem-e Semuel uruk worala-ge, Pilisin nap-nen tuguruk nggumomtag-e meya irit woraiga-o.

¹⁴ Isarael nap unuwi siri Ekoron kuri-nen Nggat kuri Pilisin nap-nen mengga waniga ereba na-ge oboksa tuguruk Isarael nap wok ondogola-ge, Isarael nap-nen-e it unuwi nggweyak ereba na-ge oboksa tuguruk waniga-o. Wanuruk woragolar-e, Isarael nap min Kanaan nap min lambuksa woragolar-e, yamuksa irit woraiga-o.

¹⁵ Semuel uruk woralar-e, Isarael nap tena unpuruk nak irit worasoma wat yij-o.

¹⁶ Pempa Semuel-nen Isarael nap endam waring kasolar-e, Mbetel min Nggilnggal min Mispa min ereba waring kasolar-e, Isarael nap ennggendumu yuk puk mbogolat woragwi ereba na-ge wene kona ndamil nosolat woragij-o.

¹⁷ Pempa iri nggal kwatlug-e, ama Arama mborosolat woragij-o. Nde, at nen Isarael nap ennggendumu wene mbenaroso nap irit woralat, iri-nen Arama iri me-nen Nagawan Indo amanggim wosa kan purak ondoro kona mendaga pil lagaij-o.