1 SEMUEL 6 - Nanduk Ngget Tul Pidnak Wene

Urul pidnak wene labu mbarak iri na tuguruk pil mbiridnak wene 6:1-19

¹ Nde, Nagawan Indo-nen idnak urul pidnak wene labu mbarak iri na Pilisin enma woralar-e, waneya tuju worarug-e,

² Pilisin nap-nen kugwiwak ombo min kugwi tu mbarugwi min ereba na wene mbo unpuruk, kin wok onpogolar-e: ”Nagawan Indo-nen idnak urul pidnak wene labu mbarak yu-ge ngge rak pul-o? Nit-nen nde tuguruk ondolma pil mborogolar-e, ngge kwasa pil mbururag-o?” luk kin wok onpogola,

³ it-nen onggo yogolar-e: ”Isarael nap Enmbal Pem Nagawan-nen idnak urul pidnak wene labu mbarak iri-ge we nag-e pil mbururak pug-o. Alat nde, kit-nen meya kwarigep onggo min-et pil mbururag-o. Iri nggal kwarogola-ge, kir-e ki yogolat, Isarael nap Enmbal Pem Nagawan-nen angin worak kundugu kenpem mberak posolat worasu iri-ge elem-e kenaru ma-o” luk yak indiga-o.

⁴ Yogoloma, ”Onggo-ge no mende wok tul-o?” luk yiga-o. Yogoloma, kugwiwak ombo-nen yogolar-e: ”Kit kenpem angin worak mende mbusu iri-ge kit-nen Pilisin nap nagawan lima ereya ndak ndag-et emas pem ndak worak marigot lima iri min wuningga lima min ndak wosa wok turag-o. Nde, angin worak mende kenpem mbid iri-ge marigot min wuningga min nggal-et kit oboksa min nagawan lima ereba min oboksa kenpem mbid nar-o.

⁵ Iri ala karuk, kit-nen-e marigot min wuningga o yu me eyak worak yusu yu min ut memera ndak worak per-o. Kit-nen iri nggal kwarogolar-e, Isarael nap Enmbal Pem Nagawan kek tak pogolat-nen kwarugub-o. Iri kwarogola-ge, kit min kunkugwiwak min konnggweyak min andi bandi rak kunpusu iri-ge ndong yuwa nde kwat ma-o.

⁶ Kir-e noluk-nen keneyanggo lak Mesira nagawan min Mesira woragwi nap min-nen kwariga iri na nggal kwatli-o? It iri-ge Mbal Pam Nagawan-nen lel mberel onposola karuk-nen Isaraal nab-e Mesira keya buruk mburuwakluk-nen keya inpiga iri na-ge meme rak purak pug-o.

⁷ Iri bem-e ebem puruk lit kudtak nggweyak koma ngget min sapi mendaso ija mberen nggweyak koma lit kaso buk min mondok lid lud tak per-o. Iri rak purug-e, nggweyak koma iri na bem-nen kere-ge sapi mberen ereya na bem parik puruk, amarik ereya-ge ama tu lesa pil mberer-o.

⁸ Iri rak purug-e, Nagawan Indo-nen idnak urul pidnak wene labu mbarak iri na kudsa nggweyak koma iri na bem puruk, kit meya yidnak onggo Isarael nap Enmbal Pem Nagawan amanggim purak emas-nen konidnak marigot min wuningga min ndak worak ereba na yarak iri na-ge eralu purag-o. Iri rak purug-e, sapi-nen nggweyak koma na-ge ondomok lit kuruk mburuwakluk keya burag-o.

⁹ Wirik puruk, ngge nggwe mburuwa? kenlengen nak wolmomtag-o. Worakmu nde, at uwi siri Mbet-Semes ambigit nggwe-t mborosola-ge: ’E! Iri-ge Isarael nap Enmbal Pem Nagawan-net mondok lak tak onposo mende kwiye worak iri na-ge nenpem pil lobok yamu-o’ luk yebet kudtag-o. Alat nde, nggweyak koma iri nde iri nggwe mbirigit lak ala-ge, ’Iri-ge Isarael nap Enmbal Pem Nagawan-nen-e lag-o. Are, we nenpem mburag-et nenpem yamu-o’ luk yebet kudtag-o” luk yiga-o.

¹⁰ Ap ereba na-ge yak indiga ereba-net kwarogolar-e, sapi mendaso ija mberen wanuruk, nggweyak koma iri na bem parik puruk, sapi amarik ereba na-ge ama tu lesa biga-o.

¹¹ Iri rak purug-e, nggweyak koma iri na bem-e urul pidnak wene labu mbarak iri na pil laiga-o. Nde, ondoro eralu iri na me-ge emas pem-nen konidnak marigot min wuningga min ut memera ndak wosa pidnak yarak iri biga-o.

¹² Puruk keya bikma-ge, sapi ya na-ge nok nok Mbet-Semes nggwe-t mbirij-o. Lugud tak nggwe mbirigit lak, tula nggwe-t kul mbaro mborosola, Pilisin nagawan lima ereba na-ge imbirik enlengen waruk mbiriga mbiriga o Mbet-Semes kuri mak mak wok yiga-o.

¹³ Nde, iri tarem-e Mbet-Semes woragwi nab-e yabu mbirikmu ereba na me nggandum mbato anggul mbarukmu, enlengen yik kaiganggal-e, urul pidnak wene labu mbarak iri na karug-e, enalen pem kil mbiriga-o.

¹⁴ Nde, nggweyak koma iri na-ge Mbet-Semes woraso Yosua iri na eyapmu kerep ija nggok iri na eralu ndong yij-o. Iri yamu-ge o Mbet-Semes woragwi nap-nen-e nggweyak koma konidnak e ereba na waga nggara, sapi mberen ya na wosa Nagawan Indo amanggim kan piga-o.

¹⁵ Nde, Nagawan Indo-nen idnak urul pidnak wene labu mbarak iri na min emas yarak ondoro iri na min-e it Lewi nap-nen-e waga kerep ija nggok iri na bem piga-o. Iri rak pogola-ge, Mbet-Semes woragwi nap-nen-e wam wosa Nagawan Indo amanggim kan pogolat, Nagawan Indo amanggim pugwi mende erep min-et piga-o.

¹⁶ Ereba na oboksa Pilisin nap nagawan lima ereya na-nen karug-e, iri na tarem-et tuguruk enma Ekoron mbiriga-o.

^17-18 Pilisin nap nagawan lima-nen tena woragwi o siri lima ereya na woragwi nap-nen it meya kwaridnak onggo-ge iri nggal kwasa Nagawan Indo amanggim pugwi mende-ge pil mbiriga-o. O siri lima ereya-ge Asndot min Nggasa min Askelon min Nggat min Ekoron min, nde, o siri ereba-ge ereb-e kerep pag-e worag-o, nde, ereb-e lag-o. Nde, o siri ereya na ondomoktak-nen Nagawan Indo amanggim pogolar-e, emas pem-nen konidnak marigot min wuningga min ut memera ndak worak ereya na pil mbiriga-o. Nde, iri kwariga iri na ndemerer-o luk yenggerak purag-e Nagawan Indo-nen idnak urul pidnak wene labu mbarak iri na kerep ija nggok iri na bem pidnak kereb-e Mbet-Semes nap Yosua eyapmu yawo-nen na worasu irir-o.

¹⁹ Nde, it Mbet-Semes nap-nen urul pidnak wene labu mbarak iri na arem nggwal kaidnak pem-e it ennggendumu ab-e enpe tuju pulu (70) irit Nagawan Indo-nen indij-o. Iri yamu, iri me woragwi nab-e Nagawan Indo-nen angin worak kwiye worak enpem pidnak pem yip tabun puruk woraiga-o.

Urul pidnak wene labu mbarak o Kiriyat Yearim pil mbiridnak wene 6:20–7:1

²⁰ Nde, it Mbet-Semes woragwi nap-nen yogolar-e: ”Ta nggal-nen Nagawan Indo Mondok Marak Mbal Pem Nagawan iri erengen pem-e uruk wolma-o? Mondok inggi mbara wolmaklug-e urul pidnak wene labu mbarak iri-ge ngge me pil mbururag-o?” luk yiga-o.

²¹ Iri lug-e, ab-e yonggo Kiriyat Yearim woragwi nap endam wirik onpogolat-nen yak ondogolar-e: ”Pilisin nap-nen Nagawan Indo-nen idnak urul pidnak wene labu mbarak iri na-ge tuguruk pil lobok yikma me, kir-e ndak lobok yugupndik, urul pidnak wene labu mbarak yu-ge kit kenma waruk mberer-o” luk wene wosa enpem puruk wirik inpiga-o.