1 SEMUEL 4 - Nanduk Ngget Tul Pidnak Wene

Nagawan Indo-nen idnak urul pidnak wene labu mbarak Pilisin nap-nen mengga wanidnak wene 4:1-11

¹ Nde, ereya tarem-e Pilisin nap san ombo oboksa-nen: ”Isarael nap undurag-o” yogola karug-e, Isarael nab-e wim silmu mbirigarik o lije-ge o Eben-Kaeset koroga iri me wiril lobok yiga-o. Alat nde, Pilisin nap san ombo ereba na-ge o Apek iri me o lije wiril lobok yiga-o.

² Pilisin nap san ombo-nen mondok enmawi-t kondogolar-e, Isarael nap inmin wim tomborogolar-e, wim silmu iri-net Isarael nab-e empat ribu (4.000) unduruk, urugwe nggwe rak inpiga-o.

³ Unduruk, urugwe nggwe rak inpikma, san ombo erep keya inpiga ereba na mbirigarik, unuwi lijema wok yogola-ge, Isarael nap enne kulugwi ereba-nen yogolar-e: ”Yawo-ge noluk-nen Nagawan Indo-ge keya nenpamu, Pilisin nap-nen urugwe nggwe rak ninpiga-o? Iri ala-ge, Nagawan Indo-nen wim nap ininggem-nen yongga nondosolat ninmiri yosolat makluk Nagawan Indo-nen idnak urul pidnak wene labu mbarak iri na Silo iri me wil mburulndik, waruk lobok yuwog-o” luk yiga-o.

⁴ Iri lug-e, Nagawan Indo-nen idnak urul pidnak wene labu mbarak iri na-ge Silo iri me wil mbururak ap enpem pikma, Nagawan Indo Kek tak Amawi Worak iri na koreyak woraso ondoro nggal kwasa o Silo-nen waruk lobok yogola-ge, Eli elirak Opni min Pineas min-e urul pidnak wene labu mbarak waruk lobok yili iri na inmin-et waruk lobok yiga-o.

⁵ Nde, urul pidnak wene labu mbarak iri na Isarael nap woragwi sa wok yosola-ge, Isarael nab-e enalen-nen kek kok lel kagolat inni enne mbiga-o. Iri yogolar-e, o nggweyak min lele yij-o.

⁶ Nde, enne nggu ereba na Pilisin nap-nen kulurug-e, it-nen yogolar-e: ”It Iberani nap iri-ge noluk-nen enne nggu lek kali-o?” luk yiga-t nde, abok nggwe-nen kagolar-e, Nagawan Indo-nen idnak urul pidnak wene labu mbarak iri na Isarael nap woragwi sa wok yosola-nen enne lek kaidnak irit enaru yiga-o.

⁷ Enaru lug-e, it-nen yak kerak mbogolar-e: ”Unkugwi-ge it woragwi sa wok yij-o. Nir-e mondok warn eram-o! Yu nggal-e mondok kagwi bug-o!” yogolat-nen kwiye kwarat yiga-o.

⁸ It-nen yogolar-e: ”It unkugwi amawi worak iri na inggem-nen-e ta-nen ninmiri yuwa-o? Mesira nap nembaga-nen indid kugwi ereba na-ge ereba-ner-o.

⁹ Pilisin nap wa-e. Kir-e kinndi tugup lak tak puruk, ap-nen kwarugwi nggal-et wim nggwer-o. Lak nde ala-ge, nanduk it-nen kit ndegel konpogolat woraiga iri na nggal-et kir-e Iberani nap iri ndegel onpogolat woragub-o. Iri bem kir-e kwiye lag-et wim nggogolat kenmawi konder-o!” luk yiga-o.

¹⁰ Iri luk Isarael nap inmin wim mbarogolar-e, Pilisin nap enmawi-t kondogolar-e Isarael nap urugwe nggwe rak onpogola, kwiye-nen enmarak ndi yiga-o. Mondok meyasa urugwe nggwe rak onpogolar-e, Isarael nap san ombo-ge tiga pulu ribu (30.000) irit indiga-o.

¹¹ Iri yogolar-e, Mbal Pem Nagawan-nen idnak urul pidnak wene labu mbarak iri na min-et mengga waniga-o. Iri tarem-et Opni min Pineas min na-ge indiga-o.

Eli wat yidnak wene 4:12-18

¹² Iri tarem-e Mbenyamin nap misig-e wim nggugwi sa-nen kwiye Silo lobok yosolar-e, iri na tarem-et o Silo wok lug-e, indi abi kalok yogolat-nen kwarugwi usum ndela keya bosolat, nggweyak anggul pem ndarosolat kwarij-o.

¹³ Nde, Eli na-ge urul pidnak wene labu mbarak iri na bem indi mburuk tenak at koreyak woraso iri na bem tu mbanggoma koreyak worasoma-ge, ap iri na-nen Isarael nap urugwe nggwe rak inpidnak wene waruk lobok yosola-ge, o siri iri me woragwi oboksa-nen yip nggu lek kaiga-o.

¹⁴ Lek kagola, Eli-nen yip nggu kulurug-e: ”Noluk-nen enne lek kali-o?” yosoma-ge, ap wene yonggo lobok yid iri na at eram pong pang lobok yosolar-e, wene iri na yak tij-o.

¹⁵ Nde, iri tarem-e Eli na-ge olengen sembilan pulu delapan (98) woraidnak me, erengen-e kubo lurak irit woragij-o.

¹⁶ Ap iri na-nen Eli yak tosoiar-e: ”An-e wim nggugwi sa-nen yanem-et lobok yusu yur-o” yosoloma, Eli-nen wene kin wanosolar-e: ”Nambara-o. Wene-ge ngge kwarag-o?” luk kin wanij-o.

¹⁷ Yosoloma, ap wene waruk lobok yid nap iri na-nen yosolar-e: ”Nir-e mondok kwiye worag-et abu urugwe nggwe rak ninpikma-o. Iri yogolar-e, ap kwarat nondogolat, ennggendumu-ge nonmbo kambararak Opni min Pineas min-et indiga-o. Iri-nen Mbal Pem Nagawan-nen idnak urul pidnak wene labu mbarak iri na min-et mengga waniga-o!” yak tij-o.

¹⁸ Ap iri na-nen urul pidnak wene labu mbarak iri na wanidnak wene yak tosoma, ereya na-net Eli na-ge koreyak woraso ondoro iri na bem-nen o pak tumende iri na erabet ponok nggwe anggul sindik nggwe wirim nggola mbosolar-e, ar-e ap indi worak ebe na mondok nggok me, undugun ngguroksa wat yij-o. Nde, at-nen Isarael nap lit unpuruk nosolar-e, olengen empat pulu (40) irit woragij-o.

Pineas ogwe togwe wat yidnak wene 4:19-22

¹⁹ Nde, iri tarem-e Eli ambara Pineas iri na ogwe iri na-ge abila ala-ge, ogwere ndagurak panggorak irit woragij-o. Worasoma-ge, kulidnggal-e, Mbal Pem Nagawan-nen idnak urul pidnak wene labu mbarak iri na mengga wanidnak wene min un eid wat yidnak wene min at un wiriga wene min kulurug-e, mimo la yane woroso tel kwirij-o. Iri yosolar-e, ereya na tarem-et la ndagij-o.

²⁰ Kwe na komo wat yekluk yosoma-ge, kweyap at yongga witli ereba na-nen yak togolar-e: ”Mamak puruk wolmin-o. Kela yu-ge ap ndaigen-o” yak tiga-t nde, enne erep na nggarigit lak, it-nen yak tiga wene na kwara yebet kagit lag-o.

^21-22 La iri na ndaguruk-nen-e: ”Mbal Pem Nagawan abinal-e Isarael nap ennggendumu-nen lak yij-o” yosoluk, la unu-ge Ikabot yarij-o. Nde, iri yarid iri-ge urul pidnak wene labu mbarak iri na mengga wanogolat, un eid min un min wat yogolat yiga-o peraruk-nen iri yarij-o. Iri ala-nen at-nen yosolar-e: ”Mbal Pem Nagawan-nen idnak urul pidnak wene labu mbarak iri na-ge mengga wanidnak me, kek tak Mbal Pem Nagawan abinal iri na-ge Isarael nap ennggendumu-nen lak yamu-o” luk yij-o.