1 SEMUEL 3 - Nanduk Ngget Tul Pidnak Wene

Nagawan Indo Semuel imbiri bem nam yidnak wene 3:1-21

¹ Nde ereya na tarem woragolar-e, la marik Semuel iri na-ge Eli-nen yik karok worala, Nagawan Indo ndegel obosolat woragij-o. Nde, ereya tarem-e Nagawan Indo-nen wene yak ondosolat ala na nabi bem yak ondosolat ala na iri-ge mondok lak nggal-et woragij-o.

² Nde, misik tarem-e kubu-ge Eli na-ge ap indi worak me, erengen kubo lurak iri na-ge at nene yoso sa-t nene yij-o.

³ Nde, Semuel iri na-ge Mbal Pem Nagawan ama Nagawan Indo-nen urul pidnak wene labu mbarak iri na eralu nene yij-o. Nene yosoma o-ge awo kil posola, tal na awo nigirik pigit lak ma-ge

⁴ Nagawan Indo-nen Semuel wene mbo ibij-o. Iri yosola-ge, Semuel-nen-e: ”Nombo wa-e. No-o?” luk yij-o.

⁵ Yosoluk, Eli eram weyap turuk nak mberarik-nen yosolar-e: ”No-o? Nombo wa-e. Noluk-nen wene mbo nibigen-o?” yosoloma, Eli-nen yosolar-e: ”An-nen-e wene mbo kibigit lag-o. Tuguruk nene yil mbiri-o” yosoloma, Semuel na-ge nene yil mbirij-o.

^6-7 Nene yosoma-ge, tuguruk Nagawan Indo-nen Semuel na wene mbo ibij-o. Wene mbo obosola-ge, Nagawan Indo-nen-e at imin-e wene yoso buk me, Semuel-nen-e: ”Yu-ge Nagawan Indo-nen wene mbo nubusu-o” luk peragit lag-o. Iri bem, ar-e menluk Eli eram mberarik-nen yak tosolar-e: ”Nombo wa-e. Noluk kar-e wene mbo nibigen-o?” yosoloma, Eli-nen yosolar-e: ”Nambara wa-e. An-e wene mbo kibigit lag-o. Tuguruk nene yil mbiri-o” yak tij-o.

⁸ Mberarik tuguruk nene yosoma, kenan pem tak posolat, Nagawan Indo-nen Semuel wene mbo ibij-o. Iri yosoloma, Semuel na Eli eram mberarik-nen yosolar-e: ”Nombo wa-e. Noluk-nen kar-e wene mbo nibigen-o?” yosoloma, iri tarem Eli-nen yebet kasolar-e: ”Yu-ge Nagawan Indo-net la iri wene mbo ubusu-o” luk yenggerak puruk-nen

⁹ Semuel yak tosolar-e: ”Tugurug-et nde wene mbo kobosola-ge, kat-nen yosolar-e: ’Nagawan Indo wa-e. Wene yak niri-o. Ndegel koboso nap an-e kulusu-o’ yugun na-e” yak tosoloma-ge, Semuel na-ge tuguruk nene yoso sa nene yil mbirij-o.

¹⁰ Nene yosoma-ge, Nagawan Indo-ge iri na me men yil lobok yosolat-nen yid ereya na nggal-et yosolar-e: ”Semuel wa-e. Semuel wa-e” yosoloma-ge, Semuel-nen onggo yosolar-e: ”Wene yi-o. Ndegel koboso nap an-e kulusu-o” luk yak tij-o.

¹¹ Yosoloma-ge, Nagawan Indo-nen Semuel yak tosolar-e: ”An-nen-e kwiye worak nin mende mbi Isarael nap ennggendumu kwarimin-o. Nde, kwarimin iri wene kuluwa nab-e wendet ma-o.

¹² Iri tarem-e an-nen Eli elirak-nen kwarugwi bem an-nen wene enal tebarosolat mondok tel korosolat-nen yaga worok tak pigi wene ereba na oboksa-ge an-nen kwat inpimin-o.

¹³ An-nen Eli yak tosolar-e: ’Kat kambararak-nen an-e enlengenma nggal tak nibili me, pempa kat kelirag-e angin worak mende enpem mberak pimin-o’ luk yak tigi-t nde, Eli-ge it-nen meya kwarugwi-ge aru-net nde, isilepma-ge enpem poso bug-o.

¹⁴ Iri bem-e mondok owak mbarusu-o. It-nen meya nggok kwarugwi iri bem-e Eli-nen wigarak-nen-e it meya yidnak pem wam wosa kan pogolat, wam an namanggim pogolat wolma ereba-nen-e mondok it meya yidnak korak onposolat wolma bug-o” luk yak tij-o.

¹⁵ Yak tosoloma, Semuel na nene lug-e, kup men yosolar-e, Nagawan Indo uwi tumende ereba na kuwaril lobok yij-o. Nde, Semuel na-ge nabi nggal kagaid iri na-ge Eli yak turag-e kwiye irit yij-o.

¹⁶ Alat nde, Eli-nen wene mbo obosolar-e: ”Nambara Semuel wa-e” yosola, at-nen erep nggarosolar-e: ”Nombo wa-e. No-o?” luk yij-o.

¹⁷ Yosoloma, Eli-nen kin wok obosolar-e: ”Nagawan Indo-nen-e no yak kirij-o? Oboksa yak niri-o. Kat-nen nde ereb-e karem yemndak keya bugun nde ala-ge, Mbal Pem Nagawan-nen angin worak kebem mberak puwa-o” luk yak tij-o.

¹⁸ Yak tosoloma-ge, Semuel-nen-e wene ereba na-ge oboksa Eli yak tij-o. Mariget ter-o luk yemndak pigit lag-o. Yosoloma, Eli-nen yosolar-e: ”Ar-e Nagawan Indo-nen yusu-o. Ereba mag-o. At-nen kwaruwa nag-o” luk yij-o.

¹⁹ Nde, Semuel na nggok yosola-ge, Nagawan Indo-ge at imin woralat ndemeret Semuel-nen yid ereba na-ge ndak ndag-et kwat yij-o.

^20-21 Iri kwat yosola karug-e, Isarael nap o iri woragwi oboksa-nen-e: ”Semuel yu-ge ndemeret Mbal Pem Nagawan ene lomboksa yoso nab-er-o” luk yogolat woraiga-o. Nde, pempa Semuel-nen nde wene yosola-ge, Isarael nap oboksa-nen kologolat woraiga-o. Nde, Nagawan Indo-ge at-nen nandug-et Semuel imbiri bem nam yosolat wene yak tosolat yid sa o Silo iri na me-t nam yosolat woragij-o.