1 SEMUEL 28 - Nanduk Ngget Tul Pidnak Wene

Saul-nen ap wat yidnak engena muk eneyaso kwe eram wene kin wil mbiridnak wene 28:1-25

¹ Nde, siyak woraruk misik tarem-e Pilisin nap-nen-e it-nen idnak san ombo-ge Isarael nap inmin wim mbarurak ndok worak inpiga-o. Iri yogola, Akis-nen Ndaut yak tosolar-e: ”Kat min kat-nen idnak san ombo inmin-e an nap inmin luk wim-e nggurag-o” yak tosoloma,

² Ndaut-nen onggo yosolar-e: ”Nab-o. An-nen kwarimin-e ndemeret nagawan kat-nen na neyagun irir-o” luk yak tij-o. Yosoloma, Akis-nen yosolar-e: ”Iri ala-ge, kar-e an nurum pempa pak tak woraso nap tak kibimin-o” luk yak tij-o.

³ Nde, Semuel na wat yamu-ge Isarael nap oboksa-nen tabun puruk worarug-e, at uwi silmu ama Arama iri me-t yapma ibiga-o. Nde, nanduk nggal woragolar-e, it yari min wat yidnak enngena min wene muk kagwi kweyap min oboksa-ge Saul-nen-e Isarael nap ennggendumu-nen sera wirik inpij-o.

⁴ Nde, Pilisin nap san ombo-ge o Sunem koroga iri me ndok wirigarik, o sare lit kil lobok yiga-o. Iri yogola-ge, Saul-nen Isarael nap san ombo inmin-e Ndobo Nggilmboa iri na bem o sare lit kaiga-o.

⁵ Nde, Saul na-ge Pilisin nap san ombo ereba na eneyarug-e, mondok kwiye kwarat yij-o.

⁶ Kwiye kwarat lug-e, Nagawan Indo-nen tu mirik ubuwakluk yak tij-et nde, nabi bem-nen na irit, Urim min Tumim min pem-nen na irit, Mbal Pem Nagawan ene lomboksa yugwi nap enpem-nen na irit ene erep mondok nggarigit lag-o.

⁷ Iri ala karuk, Saul-nen at eyabu wanugwi nap yak ondosolar-e: ”Kir-e kwe tu mbarosolat ap wat yidnak enngena min wene mbaroso kwe mbi kore yer-o. Iri yugupmu-ge an-e wene kin wanurak eram mbirimin-o” yak ondosoloma, it-nen onggo yogolar-e: ”O Endot iri me perak kwe iri mende kwaroso mbi worasu-o” luk yak tiga-o.

⁸ Yak togoloma-ge, ap-nen yenggerak ubuwa naru Saul na-ge we nap nggal kwasa we sum yutluk, ap mberen inmin mberarik, kwe tu mbaroso iri na eram kubu nggwe wok yogolar-e, Saul-nen kwe iri na yak tosolar-e: ”Kar-e an-nen ap unu yak kirimin iri engena min kin wanosola, abok-nen kwat ma wene-ge at-nen yak nuruwakluk kin wanurag-o” luk yak tij-o.

⁹ Yosoloma, kwe iri na-nen yosolar-e: ”Nab-o. It yari min ap wat yidnak enngena wene muk kagwi kweyap min-e Isarael nap ennggendumu-nen oboksa Nagawan Saul-nen lak tak inpij-e kar-e karu iri nar-o. Kar-e noluk-nen an nuruwakluk nare burak lobok yigen-o?” luk yak tij-o.

¹⁰ Yosoloma, Saul-nen Nagawan Indo unu bem owak mbarosolat-nen yosolar-e: ”Nagawan Indo Uruk nak Woraso owag-o. Kat-nen iri kwarugun pem angin worak kebem puwa-ge lag-o” luk yak tij-o.

¹¹ Yosoloma, kwe iri na-nen Saul kin wok obosolar-e: ”Kat wene tu mbal kuruwaklug-e ta engena muk kamin-o?” luk yak tosoloma-ge, Saul-nen onggo yosolar-e: ”Semuel engena muk kudtag-o” luk yak tij-o.

¹² Yosoloma, kwe iri na-nen Semuel karug-e, ene nggwa luk Saul yak tosolar-e: ”Nab-o. Kar-e noluk-nen an namberam laigen-o? Kar-e Nagawan Saul yu na-t nde-o” luk yak tij-o.

¹³ Yosoloma, Nagawan Saul-nen yosolar-e: ”Kar-e kwiye yusu-ge meyog-o. Kat-nen kasu wene nak yak niri-o” luk yak tij-o. Yosoloma, kwe iri na-nen onggo yosolar-e: ”Engena mbi nggweyak arem-nen luwasola kasu-o” luk yosoloma,

¹⁴ Saul-nen yosolar-e: ”Abage-ge ngge nggal kwarak kasu-o?” yak tosoloma, kwe na-nen onggo yak tosolar-e: ”Ap indi worak sum leyok sum langgusa yirik luwasola kasu-o” yosoloma-ge, Saul-nen perasolar-e: ”Iri-ge Semuel iri na engenar-o” luk yenggerak purug-e, Saul na-ge Semuel kek tak obosolat erare nggwe nggweyak pem tud yij-o.

¹⁵ Iri lug-e Semuel-nen Saul yak tosolar-e: ”Kar-e noluk-nen an sil neyasu-o? Noluk-nen kar-e tuguruk an wene mbo nubusu-o?” yosoloma Saul-nen onggo yosolar-e: ”An-e Pilisin nap-nen mondok nebem kore yogola nindi kabak yosolat-nen yusu-o. Mbal Pem Nagawan-nen na abu keya nuburuk, an nene na kulusu bug-o. At ene lomboksa yugwi nap enpem-nen na irit, nabi bem-nen na irit mondok onggo yak nurusu bug-o. Iri ala karuk, an-nen kwarurak wene-ge nombo kat-nen mul noronokluk kin wok kubusu-o” luk yak tij-o.

¹⁶ Yosoloma, Semuel-nen yosolar-e: ”Nagawan Indo-ge kat keya kuburuk kat kimin sirid nap kwat yidnak kagit, no manggim-nen kar-e an wene mbo nubusu-o?

¹⁷ Nde, nanduk Nagawan Indo-nen an nebem-nen yak kirid iri na ndak ndag-et kat-nen Isarael nap ennggendumu nagawan woraso-ge kat kinggem-nen waga abu Ndaut wok tid nar-o.

¹⁸ Kar-e Nagawan Indo ene tarosolar-e, Amalek nap indigit lak yosolat, enarengge mende na oboksa lak tak pigit lak yigen iri nar-o. Iri kwarigen iri na bem-nen yawo-ge Nagawan Indo-nen iri nggal kwat kubusu-o.

¹⁹ Nagawan Indo-nen-e kat min Isarael nap min-e kinminep wesera Pilisin nap ininggem kunpuwa-o. Kub-e kat min kambararak inmin-e an neram ndok wurugub-o. Nde Nagawan Indo-nen Isarael nap san ombo oboksa inmin-et Pisilin nap ininggem kegera unpuwa-o” luk yak tij-o.

²⁰ Nde, Saul na-ge Saul-nen yusu wene erebe na kolosolar-e, ar-e kwiye-nen wendet yosolar-e ebem-e o pinel nggal yebek luk esaligik mbud yij-o. Ebem luj-e misik tarem kubu-nen lengge-nen nunggwi mende ninggit lak nat woraidnak pem amawi lak iri-nen ndowaga kwarij-o.

²¹ Iri kwara worala, kwe tu mbaroso iri nanen Saul eram panggosa lasolar-e, mondok abu indi min lak yidnak karuk, kwe iri na-nen Saul yak tosolar-e: ”Nab-o. An-e kat-nen kwarurak yak nirigen kwarosolar-e, nuruwa-ge peragit lak, nindi abuwa lak tak pigi iri nar-o.

²² Iri ala, kat-nen na an-nen yak kirimin na kat-nen na kwarurag-er-o. Nab-o. Kar-e nuruk kamawi bem mboroknok-nen nunggwi mende siyak saga wok kirimin-e mondok norag-o” luk yak tij-o.

²³ Yak tij-et nde, Saul na keya bosolat-nen yosolar-e: ”An norag-e nimbir-o” luk yak tij-o. Alat nde, at eyabu wanugwi nap-nen lembesa emengen mbarogola-ge, mbud tak woragid iri na men yosolar-e, koreyak woragwi sa iri na me kore yij-o.

²⁴ Iri yosola-ge, kwe iri na-nen-e sapi usul misik wutluk, nggandum mbato yigirik mbi wanarik, omok wosa oroti lomboroso mende pigit lak oroti mbi woraguruk,

²⁵ iri kwasa saga woraga keya burug-e, kwe iri na-nen-e Saul eyabu wanugwi nap inmin endam pamu ningga-o. Nurug-e, kubu iri na-t mbiriga-o.