1 SEMUEL 21 - Nanduk Ngget Tul Pidnak Wene

Ndaut Saul eram-nen kwlye mbiridnak wene 21:1-15

¹ Nde, Ndaut na mberarig-e, tepan ombo Abimelek eram o Nop wok yosola-ge, tepan ombo Abimelek na-ge wendet luk Ndaut eram wurungsa wasolat-nen Ndaut kin wanosolar-e: ”Kar-e noluk-nen karig-et yeba-t lobok yigen-o?” luk yak tij-o.

² Yosoloma, Ndaut-nen onggo yosolar-e: ”Nagawan Saul-nen-e yabu misik wok nutlug-e, yabu iri wene-ge mondok ap misiger-o luk tet yak undurak pug-o yosola me, an nimin nugwi nab-e ndegera misik me unpuruk, yik neyarok wolmer-o luk lobok yigirig-o.

³ Nab-o. An mbi kin wok kibimin-o. Nombo kat keram-e nunggwi mende-ge no no worasu-o? Oroti wora lima ala na, are, nunggwi mende mbi worala-ge, wok niri-o” luk yak tij-o.

⁴ Yosoloma, tepan ombo iri na-nen yosolar-e: ”An neram-e we oroti-ge lag-o. Alat nde, Nagawan Indo amanggim pidnak nak worasu-o. Kimin nugwi nap ereba inmin-e kweyap inmin nggeret nene yigit lak ala-ge, kit-nen norag-e ob-er-o” luk yak tij-o.

⁵ Yosoloma, Ndaut-nen tepan ombo iri na yak tosolar-e: ”Ndemeret nir-e imiri mbarak pidnak Wene-nen yidnak yidnag-et wim nggogolar-e, an nimin nugwi nab-e mbek tag-et wolmokluk kwami inmin-e mondok nene yugwi bug-o. Nde iri-ge we yabu-t nde iri kwarugwi-o. Alat nde yabu yu ambigir-e mondok nggok me, iri kwarurag-e meya-o” luk yak tij-o.

⁶ Nde, tepan ombo iri na eram-e oroti ngget woraga ondolma posolat nanduk wora ereba na-ge Mbal Pem Nagawan amanggim pugwi sa-nen waga wudtak pidnak worasoma me, Nagawan Indo amanggim woraga pidnak wudtak pidnak ereba na Ndaut wok tij-o.

⁷ (Nde, iri na tarem-e Erom nap unu-ge Ndoeng Saul olomba ndugurugwi nap enanggul pem kek tak iri na-ge Nagawan Indo eyabu misik wanosolat iri me woragij-o.)

⁸ Worala-ge, Ndaut-nen Abimelek kin wok obosolar-e: ”Nagawan Saul-nen ndag-et nag-o luk yosola me, an-e mija lele nesan min neyalawi min-e ma keya buruk lobok yidnak me, an ninggem mbururak san ala na, yalawi ala na kar-e yu me pidnak mbi worasu, lak?” luk kin wanij-o.

⁹ Yosoloma, Abimelek-nen onggo yosolar-e: ”Pilisin nap Nggoliat kat-nen Ela mbirikmu iri me-nen nggweyakma rak pigen iri na agabo perak mbok sum pem nggetla tepan ombo-nen yurugwi sum epot na ombol nggwe pukmu worasu-o. Iri nak perak yu me worala me, irit wani-o” luk yak tij-o. Yosoloma, Ndaut-nen yosolar-e; ”O yeba-nen-e kabo mondok konag-e iri nak me, irit wok niri-o” luk yak tij-o.

¹⁰ Iri na tarem-et Ndaut na-ge Saul aye-nen pong karik, o Nggat Nagawan Akis iri na eram wok yij-o.

¹¹ Iri yosola, Nagawan Akis eyabu wanugwi nap ereba na-nen Akis yak togolar-e, yu nggal yak tiga-o: ”Ndaut yu-ge at ama iri me nagawan-e Ndaut yur-o. ’Kweyap-nen kot kagolat, ndawi yogolat-nen yogolar-e: Saul-nen-e ab-e kwarat (beribu-ribu) indij-et nde, Ndaut-nen-e mondok wonarurak puk (berpulu-pulu ribu) indij-o’ luk ndawi ebem ngariga iri na-ge yur-o” luk yak tiga-o.

¹² Wene yiga iri na kulurug-e, Ndaut na-ge Nggat Nagawan Akis iri na igirimbi kwarat yosolar-e,

¹³ indi-net nde ap ereba na enlengen pem indi wawa kwarosolar-e, ap-nen tenabidnag-et nde, indi lak nggal kwatluk, o pak tumende ereba na nggerep worosolat, eragub-e ondoksu bem liring kiring tak pij-o.

¹⁴ Iri kwarosola, Akis-nen at eyabu wanugwi nap ereba na yak ondosolar-e: ”Ap yu-ge indi wawa yu-ge kali bug-a? Noluk-nen yu nggwe waruk lobok yigeb-o?

¹⁵ Ap indi lag-e an neram-e mariget ala-nen kir-e ap indi wawa yu-ge an nama yu me waruk lobok yigeb-a?” luk met inpij-o.