1 SEMUEL 20 - Nanduk Ngget Tul Pidnak Wene

Yonatan-nen Ndaut yongga wiridnak wene 20:1-42

¹ Ndaut na-ge Arama koroga o Nayot iri me-nen kwiye mberarik, Yonatan imin lambuk yosolat-nen yak tosolar-e: ”An-e meya no kwarigi-o? An-e at imin-e no meya kwat ubukmu-nen kat keid iri-ge an nereyekluk yusu-o?” yak tij-o.

² Yak tosola-ge, Yonatan-nen onggo yosolar-e: ”Kar-e iri nggal perasu iri-ge lag-o. Nagawan Indo owag-o. Mondok kuruwa bug-o. At-nen kwarurak wene-ge nggok wene na irit marik wene na irit an neij-e yak nak noroso-o. An neid-nen-e at indi-nen pidnag-e an nimbiri bem-e mondok kuruguwa bug-o. Iri bem-e at-nen iri kwaruwa-ge mondok lag-o” luk yak tij-o.

³ Yosoloma, Ndaut-nen Yonatan yak tosolar-e: ”Kat-nen an nebem kindi kundik worasu yu-ge kat keij-e aru me, kat kindi puru yugun naru yak kirigit lak kuragusu-o. Nagawan Indo Uruk nak Woraso owag-o. An-e mondok kan ndamak pem worasu-o” luk yak tij-o.

⁴ Yak tosoloma, Yonatan-nen Ndaut yak tosolar-e: ”Kat-nen peragun mende-ge mondok kwar-et kibimin-o” yak tij-o.

⁵ Yosoloma, Ndaut-nen onggo-ge yu nggal yak tij-o: ”Kub-e waneya ngget arem nggurak tarem-e iri yebet kagolat nggok sagidnag-e an-e nagawan imin-et norag-et nde-o. Kat-nen nde iri nde ’Ob-o’ yosolar-e, kup woraruk kup iri kubu-nen lambuk yuwok-nen an-e kurak yil mbirimin-o.

⁶ Nde, kat keid-nen kin wok kobosolat nde, ’Noluk-nen Ndaut na-ge wok yigit lag-o?’ yosola-ge, kat-nen onggo-ge yu nggal yak turag-o: ’ ”An-e an nama woragwi nap oboksa-nen olengen misik arem nggogolat wam wurugwi tarem wok yidnak me, ndag-et nak Mbetleyem mbereyekluk-nen yak kurusu yur-o” yak nutluk mbirij-o’ yak turag-o.

⁷ Yak tosoma nde, nagawan iri-nen yosola-t nde: ’Iri-ge ob-o’ yosola-ge, an-e wene lak woramin-o. Alat nde, at nde isilepma nde yosola-ge, ’Ar-e ndemeret Ndaut wuruwa-o’ luk yebet kagun-o.

⁸ Nit nenmbereg-e mondok kundig-et wolmomtag-o luk Nagawan Indo imbiri bem-et owak mbaridnak me, kat-nen yongga noronokluk kemengen mbarusu-o. An-nen nde meya mbi kwaridnak ala-ge, kat-net nururag-o. Alat nde, kat-nen waga keid inggem nuburak pug-o” luk yak tij-o.

⁹ Yosoloma, Yonatan-nen yak tosolar-e: ”Kat kwiye kasu-ge meyog-o. An neid-nen nde ndemeret kat kururak wat tak karug-e, mondok yag-et kirimin-o luk yak tij-o.

¹⁰ Yosoloma, Ndaut-nen onggo yosolar-e: ”Kat-nen keid yak tosola, onggo isilepma min yak kuruwa wene-ge ta-nen an yak nuruwa-o? luk yak tij-o.

¹¹ Yosoloma, Yonatan-nen onggo yosolar-e: ”Nab-o. Ap lak ma mburuwog-o” luk yak tij-o. Yosoloma, it enmbereg-e ap lak ma mbiriga-o.

¹² Mbirigarik, Yonatan-nen Ndaut yak tosolar-e: ”Isarael nap Enmbal Pem Nagawan, Nagawan Indo erengen pem yak kurusu-o. Kup, lak? Are, kup iri, lak? An-e kuplila yanem nggal-e neid indi kayekluk arem ngen lek kamin-o. Iri yosoma nde, kat kimin nde ar-e konag-et ala karug-e, kat keram wene pil lobok yimin-o.

¹³ At-nen nde indi-ge kat kururak indi karug-e, kat kurak yonokluk an-net yak kirimin-o. An-nen nde iri nggal kwarigit lak ala-ge, mondok Nagawan Indo-nen nuruwag-o. Nagawan Indo-nen an neid ndegel obosolat woragid nggal-et Nagawan Indo-net kat na ndegel kubuwag-o.

¹⁴ Kar-e an nde nuruk worala-ge, Nagawan Indo erengen pem kundik wolmag-o luk owak mbarige iri na kindi yeberak woralat, an nimin-et kundik wolmomtag-o. Alat nde, an nde wat yumu-ge,

¹⁵ kat-nen an nimin tugup lak mot mot kwat noboso iri na nggal-et an-nen wigarak inmin-e pem irit kundik wolmomtag-o. Nagawan lndo-nen-e kat kuwim nap lak tak onposola-ge,

¹⁶ nit nenmberek kondogolat owak mbarige iri na-ge pok tak purak pug-o. Nde, pok tak nde posola-ge, Nagawan Indo-nen angin worak kebem puwa-o” yak tij-o.

¹⁷ Yonatan-nen Ndaut na-ge at ambik abuwa kaso nggal irit abuwa kaso me, mberen pem tak poaolar-e, Yonatan-nen Ndaut yak tosolar-e: ” ’Kabuwa-t kamin-o’ luk owak mbari-o” luk yak tij-o.

¹⁸ Iri luk Yonatan-nen Ndaut yak tosolar-e: ”Kub-e waneya ngget arem nggogolat nggok sagidnak nonggolar e, kat kore yosoluk naso kondoro nde kebe lak ala-ge, ’At eresa-ge lag-er-o’ luk enaru yuwa-o.

¹⁹ Kup iri ret nde lak ala-ge, mondok meya-o. Iri bem-e kar-e nanduk kura woraigen iri na me mburugundik, kerep ndok wosa pidnak ereba ombol nggwe ereba me kura wolmin-o.

²⁰ Nde, kup iri-ge an-nen-e mare abi-ge kerep ndok worak ereba ambigit nomorak puruk mare kenan mbisingsa pil lobok yimin-o.

²¹ Iri rak puruk an-nen ndegel noboso nap iri na yak tosola-t nde: ’Kar-e mare yu nggwe iri waruk lobok yi-o’ yak tosola-ge, kat-nen perasolar-e: ’Iri-ge wene lag-er-o’ perasoluk, nam yurag-o. Nagawan Indo Uruk nak Woraso owag-o. Mondok kuruwa-ge lag-o.

²² Alat nde, an-nen ndegel noboso nap iri na yak tosola-t nde: ’Mare ereya-ge erepma mbisingsa mbirij-o’ yosola-ge, kat-nen perasolar-e: ’Yu-ge Nagawan Indo-nen mbiri-o yak nurusu kagi’ luk mondok kwiye mbururag-o.

²³ Nit mberen woragolar-e, ’Mondok kundik wulmul-o’ luk owak mbarige na-ge pok ma naru Nagawan Indo-net yik karok wolmag-o” luk yij-o.

²⁴ Nde, Ndaut na-ge ap lak ma ereba kura woragij-o. Nde, waneya ngget arem nggogolat nggok sakola-ge, Nagawan Saul iri na-ge nggok sagili iri na me lobok yosolar-e,

²⁵ at-nen kore yusu iri na nggal-et kebet manda kore yij-o. Nde, Yonatan-e Saul min unlugwe mboma kore yiga-o. Nde, Apnet iri na-ge Saul eralu ponok nggwe kore yij-o. Alat nde, Ndaut kore yoso-ge we irit woragij-o.

²⁶ Iri ala ge, Saul-nen yebet kasolar-e: ”Imiri mbarak pidnak wene bem-e lugud tak kwatlug-e lobok yugwi buk me, Ndaut iri-ge lugud tak kwararik-nen at ondomok marigit lak me, lobok yigit lag-o” peraruk-nen iri tarem-e Ndaut owene-ge kin wanigit lak larok yij-o.

²⁷ Nene luk kup mberen pem tak pogolat waneya ngget arem nggogolat tarem na Ndaut na lag-et ala karug-e, Saul-nen Yonatan kin wok obosolar-e: ”Noluk-nen Ndaut iri-ge tono na irit yawo na irit nggok saguruk nunggwi tarem ebe lak nak worasu-o?” luk kin wok ibij-o.

²⁸ Yosoloma, Yonatan-nen yosolar-e: ”At-nen an yak norosolar-e: ’An-e Mbetleyem mbirimin yu-ge nunggwirig-o?’ luk nemengen mbarosolat-nen

²⁹ yosolar-e: ’An nama woragwi nab-e Nagawan Indo amanggim wam wosa pogolat sakwi tarem yebet kagolat nggok sagili me, an nowe-nen yonggo nibidnak me, mbereyek-nen ob-o yak norosola-ge, nowe nowot inmin lambuk yek-nen mbereyeg-o’ luk yidnak me, neid kat-nen saiken yu me lobok yigit lak yid kagi-o” luk yak tij-o.

³⁰ Iri yosola kulurug-e, Saul na isilepma kwarat Yonatan ebem posolat-nen yak tosolar-e: ”Ndumu-nen nderak kat yu-ge wa-e! Ndaut ambigit yosolat, kat kondomok min kiya min nde kinnggiri yaga labuk yili-o.

³¹ Ndaut iri uruk worala-ge, ’An-e o yu enanggul pem nagawan men yimin-o’ luk perasu-a? Yawo-ge ar-e mondok wat mak-nen ogore ap wirik unpugunmu, waruk lobok yuwag-o” luk yij-o.

³² Yosoloma, Yonatan-nen onggo yosolar-e: ”Ar-e no meya kwaridnak pem-nen mondok wat momtak yigen-o? luk yak tij-o.

³³ Yosoloma-ge, Saul-nen tege wanosolar-e, Yonatan iri na wereyekluk tege kijarij-o. Iri kwarosola karuk-nen perak nde at eid-nen Ndaut wururak yusu iri na-ge ndemerer-o luk aru yij-o.

³⁴ Yonatan na-ge isilepma kwarat yosoluk, kore yid iri na keya buruk mborosolar-e, mberen pem tak pogolat waneya ngget arem nggogolat nggok saiga iri na-ge ninggit lak irit yij-o. Yonatan na-ge eid-nen Ndaut erengenma nggal tak pusu iri na bem indi abi kalok yosolar-e, nunggwi mende ninggit lak irit yij-o.

³⁵ Nde, kub-e Yonatan na-ge Ndaut imin lambuk yurak ap lak ma mbirij-o. It enmberek wene ningga iri na ndak ndag-et mborosolar-e, at ndegel oboso nap misik imin mbirij-o.

³⁶ Iri yosolat-nen ndegel oboso iri na yak tosolar-e: ”Kar-e an-nen mare mbising kamin ereba pundugurag-o” yak tosola-ge, la na-ge pundugurak pong kasola-ge, mare la iri na anggul pandok mbisingsa pil mbirij-o.

³⁷ Yosoloma, la yu na mberarik mare mbisingsa pil mberamu mbid sa iri na me wok yosoma-ge, Yonatan-nen la iri na eram ene pil mborosolar-e: ”Mare iri na-ge mbisingsa erepma-t mbirij-o.

³⁸ Orog-et kwarusu meyog-o. Ndag-et nak wani-o” yak tosoloma, la iri na-ge ndag-et nak mberarik, mare ereya na punduguruk Yonatan eram pil lobok yij-o.

³⁹ Alat nde, Yonatan-nen wene yid ereba na-ge la iri na-nen-e mondok yenggerak pigit lag-o. Nde, Ndaut min Yonatan min nak yenggerak piga-o.

⁴⁰ Iri rak purug-e, Yonatan-nen-e san iri na-ge at ndegel oboso na iri wok turuk-nen yak tosolar-e: ”O ma nggwe waruk mbiri-o” luk yak tij-o.

⁴¹ Iri na kwatluk mborosola-ge, Ndaut kerep umut mbarak ombol nggwe kurak tak woragid iri na-ge wasolar-e, kenan pem-et erare nggwe tud yurug-e, Yonatan min Ndaut min ya na ngonoksa labuk lug-e, wa yak kerak mbogolat yip mak kerak mbiga-o. Nde Yonatan-nen indi puru yij-e ija-t nde, Ndaut-nen indi puru yij-e mondok terak minig-er-o.

⁴² Iri lug-e, Yonatan-nen Ndaut yak tosolar-e: ”Nagawan Indo-ge kimin wolmag-o. Nde, nit mberen-nen: ’Pem irit kundik wolmog-o’ luk Nagawan Indo erengen pem owak mbarige iri na Nagawan Indo-nen yik karok worala me, nit mberen min nit-nen wigarak min-e mondok kundik irit wolmog-o” yogolug-e, Ndaut na mborosola-ge, Yonatan na-ge o silmu nggwe-t mbirij-o.