1 SEMUEL 2 - Nanduk Ngget Tul Pidnak Wene

Ana-nen tepan yidnak wene 2:1-11

¹ Ana-nen tepan yosolar-e: ”Nagawan Indo-nen an nindi alen tak pij-o. Ndemeret Mbal Pem Nagawan-nen an yongga niridnak me, nalen min-et nuwim nap pesel unpusu-o.

² Nagawan Indo nggal marak mbi mondok worasu bug-o. Kurak yurak ondoro wok ondoso Mbal Pem Nagawan iri nak worasu-o.

³ Ebe lak indi-nen kek yugwi wene pilana wirik pusu iri-ge ndong tak pi-o. Kek yogolat-nen yugwi ebe lak wene iri-ge woroksa lak tak pi-o. Nagawan Indo Mbal Pem Nagawan iri-ge mondok oboksa aru me, ap-nen kwarugwi oboksa mbenaroso-o.

⁴ Ap san wari ensan-e kalok yij-et nde, enmawi lak nab-e enmawi kundili-o.

⁵ Ap enarengge kwarat me, inmbitsa ningga nab-e, yawo-ge onggo nunggwi mende mak turak pem-et nde ap eneyabu wanugwi nap kwat yili-o. Nanduk nere woraiga nab-e yawo-ge nunggwi mende ndak me, ndak nili-o. Nde, kwe ibiri-ge li nde tuju ndagurug-e, indi kek yusu-o. Alat nde, inlirak kwarat ndagidnak kwe-ge amawi lak yosolat pabok pil nusu-o.

⁶ Nagawan Indo iri-ge worak onposolat, unluk tak onposolat yoso-nen yusu-o. Nagawan Indo-nen-e ab-e wat luk ndok wiril mburugwi sa inpil ngguruk, at-nen iri me-n lesa inpil luwaso-o.

⁷ Ap ereb-e Nagawan Indo-net insilobulo lak ndak worak onposolat, nde, ap ereb-e insilobulo worak ndak wat onposolat kwaroso-o. Nde, ap ereb-e teberak onposolat, nde, ap ereb-e kek tak onposolat kwaroso-o.

⁸ Andi bandi arem-nen insilobulo lak nap mendak onposolat, anggun panggun arem-nen ap unnu lak nab-e wisirik onposo-o. It iri-ge ap enlem kek tak iri na annggamtak onposolat, kek tak unpugwi kwarak onposo-o. O nggweyak yu paro-ge Nagawan Indo arengge-net yusu-o. Nde, paro iri na bem-e o yu ndak worak pij-o.

⁹ Nde, tugup lak woragwi nab-e Nagawan Indo arem yamuksa worali-o. Alat nde meya yugwi nab-e ndamuk arem yabera lak yili-o. Nggweyakma nap ondomok enmawi bem-nen-e ombol nggwe-ge yugwi bug-o.

¹⁰ Nagawan Indo uwim nab-e yigisa lak tak onposola, kwiye yili-o. It enpem mbal pem-nen ene o nggu nggal yoso-o. Nagawan Indo-nen nggweyakma woragwi nap oboksa enpem wene mbenaruwa-o. At amawi nggok iri na-ge at-nen lenak pid nap nagawan iri na wok tuwa-o” luk yij-o.

¹¹ Iri lug-e Elkana ogwela inmin-e enma Arama mbiriga-o. Alat nde, la Semuel iri na-ge o Silo woralat Nagawan Indo ndegel obosolar-e, tepan ombo Eli iri na-nen yidnak yidnak kwarosolat woragij-o.

Eli ilirak-nen kwaridnak wene 2:12-17

¹² Eli ambararag-e Nagawan Indo indi aye lak tak puruk, mondok meya lombok kwarogolat woraiga-o.

¹³ Eli ilirag-e tepan ombo woragolar-e, Isarael nap kwat onpogolar-e, indi nak-nen tepan ombo-nen kwarugwi kwidsa kwarogolat woraiga-o. Ap-nen nde Nagawan Indo amanggim wam wosa pogola-ge, tepan ombo yongga undugwi nab-e wam uno kunduguburak wanugwi ondogwal kenan iri na waruk lobok yosolar-e, wam mbarak iri na-ge nggeret togolwak arem sak yosoma-ge,

¹⁴ tepan ombo enmanggim wam uno kunduguburak wanugwi ondogwal kenan iri na-ge togolwak arem mberak puruk, togolwak arem sak yusu ereba na-ge kunduguburuk lesa waruk mborogolat woraiga-o. Iri nggal kwarogola-ge, Isarael nap oboksa Mbal Pem Nagawan amanggim wam wosa puwokluk Silo lobok yidnak ereba na-ge iri nggal nak kwat onpogolat woraiga-o.

¹⁵ Nde, it-nen kwarugwi ereb-e, tepan ombo yongga undugwi nap iri na Nagawan Indo amanggim wam mbarak kan purak nap iri na eram wok yosolar-e, Nagawan Indo amanggim kan purak wam iri na omok awo arik lenak pigit lak ma, ap iri na yak tosolar-e: ”Wam uno ki ereba mbi wok niri-o. Tepan ombo amanggim kan engen pem worageyek-nen-o. Nde, togolwak arem sa-ge ar-e imbiri-o” luk nggi yoso-o.

¹⁶ Iri yosola, ap iri na-nen yak tosolar-e: ”Kwarugwi-t kwarogolat Nagawan Indo amanggim omok nanduk kan puruk-nen kondomok kindi-n pidnak wanurak iri-ge ob-o” luk yak tosola-ge, tepan ombo yongga woroso nap iri na-nen yosolar-e: ”Mondok lag-o. Yanem-et wok nururag-o. Lak nde ala-ge, mondok nerambet mengga wanimin-o!” luk yoso-o.

¹⁷ Iri nggal kwarogolar-e, Eli ilirak mberen ereya-ge Nagawan Indo erengen pem meya nggok irit kwarogolar-e, Nagawan Indo amanggim wosa kan pugwi iri na-ge te rak pogolat woraiga-o.

Semuel o Silo iri me woragid wene 2:18-21

¹⁸ Iri kwarogola-ge, la marik Semuel iri na-ge Nagawan Indo mondok ndegel obosolat woralar-e, usum-e linen-nen konidnak tepan ombo-nen Nagawan Indo ama yabu wanogolat-nen nak yurugwi sum nggal irit yutluk wanosolat woragij-o.

¹⁹ Nde, olengen wosa Nagawan Indo amanggim wam wosa purak tarem ndak yosola, un min Silo lobok yogolar-e, ija-nen-e usum-e leyok sum marik mbi amanggim yaguruk wok til lobok yosolat woragij-o.

²⁰ Iri yosola-ge, Eli-nen-e Elkana min ogwe min inmbiringgat tak onposolat-nen Elkana yak tosolar-e: ”Nagawan Indo-nen kogwe yu ebem-nen kilirag-e erep min-et kambara kegera Nagawan Indo amanggim pigen yu ondolma-ge wok kurugwag-o” yak tij-o. Yak tosola-ge, it na-ge enma Arama mburugwi-o.

²¹ Nde, Nagawan Indo-nen Ana iri na imbiringgat ebem posolar-e, ambararak kenan, ararak mberen irit ndet inpij-o. Nde, Semuel na-ge Nagawan Indo ndegel eberenak irit worasoma, nggok irit yij-o.

Eli ilirak inmin-nen kwaridnak wene 2:22-26

²² Nde, Eli iri na-ge indi worak irit yij-o. At ambararak-nen enabut meya Isarael nap inmin kwarugwi wane-ge kolosolat irit woragij-o. Iri-nen Nagawan Indo woraso uwi iri na tumende ambigit nggwe yabu wanugwi kweyap ereba na inmin nene yugwi wene min-et kulij-o.

²³ Kuluruk, at-nen ambararak yak ondosolar-e: ”Kit-nen meya kwatli konpog-e Isarael nap oboksa-nen yak nitli-o. Kir-e noluk-nen iri nggal kwatli-o?

²⁴ Nambararag-o. Kir-e ereba nggal-e tuguruk kwarurak pug-o. Nagawan Indo ilirak-nen konpok pili iri-ge mondok meya-t kwarogola-nen yili-o.

²⁵ Ap-nen nde ki nap inmin meya yogola-ge, Nagawan Indo-ge enambigit yoso-t nde, ap-nen nde Mbal Pem Nagawan imin meya kwarogola-ge, ta-nen at yongga wuruwa-o?” luk yak indij-et nde, Nagawan Indo-nen mondok undurak wat tak pidnak me, ineid Eli-nen nggomo yak indij-e mondok kuligit lak yiga-o.

²⁶ Alat nde Semuel perak nggok yosola-ge, Nagawan Indo-nen na irit ki nap-nen na irit inndingen tak obogolat woraiga-o.

Eli ilirak kwat unpurak urul pidnak wene 2:27-36

²⁷ Nde, misik tarem-e Nagawan Indo ene lomboksa yoso nap mbi Eli eram lobok yosolat-nen Eli yak tosolar-e, Nagawan Indo-nen wene wosa pidnak wene yu-t yak tij-o: ”Konmbo Arun min at ama woragwi nap inmin-e Mesira nagawan iri na ndegel ubugwi nap kwatluk ndegel obogolat woragola-ge, an-e Arun imbiri bem nam yukmu-o.

²⁸ Nam lug-e, Isarael nap enlem oboksa ennggendumu-nen an-nen idnak tepan ombo makluk, an namanggim wam wosa kan pugwi sa iri me yabu wanogolat, emben konak mende kan pogolat, an nimin wene yogolar-e, tepan ombo-nen yurugwi sum epot yutluk-nen yogolat makluk, Arun min at-nen wigarak min-et len unpukmu-o. Nde, wam wosa kan pugwi sa kan pogolat uno erep wanurak iri-ge it enpem pukmu-o.

²⁹ Iri yidnag-et nde, noluk-nen kar-e an nelem nap-nen an namanggim wam wosa pidnak ereba na yik karug-e, kebem-e lasu bug-o? Noluk-nen Eli kar-e an kek tak nuburak iri na keya buruk, kambararak nde kek tak onposolat, an nilirak-nen namanggim wosa pidnak ereba na oboksa-ge an-e abok tak nuburuk, uno konak ereba na-ge it enmanggim nak wanuwakluk kar-e larok nak yusu-o?

³⁰ Isarael nap Kenmbal Pem Nagawan, Nagawan Indo an-nen nanduk urul yak kondosolar-e: ’Kenlem nap min konowe konowot min-e tepan ombo nggal an ndegel nobogolat woralik nalik irit woragub-o’ yak kindigi-t nde, yawo-ge iri kwarurak iri na-ge an-e mondok nisili-o! Are, an kek tak nubuwa nab-e kek tak inpimin-o. Nde, an teberak nubuwa nab-e an-nen na teberag-et inpimin-o.

³¹ Kwara kuli-o! Kat kama woragwi nap min kowe kowot min ennggendumu-nen ap sujwe min kit lolo min oboksa an-nen kundurak tarem-e wog-et ma-o. Iri yosola-ge, kit kennggendumu ab-e kunluk mot pem woragup pug-o.

³² Nde, Isarael yu me worali nap ereb-e an-nen inmbiringgat wok undumu, wok indimin ereba na karug-e, kindi andi yosolat, kisilepma ma-o. Alat nde, kat-nen wigarak oboksa-ge awo indi worak yigit lak ma wat yogolat wolma-o.

³³ Alat nde, kat-nen wigarak misig-e uruk keya bumu, an ndegel nobosolat tepan ombo wolma-o. Nde, ar-e erengen ngguru yosolat, indi kabak yidnak wolma-t nde, kat-nen wigarag-e mondok oboksa unduwa-o.

³⁴ An-nen yak kirigi wene yu oboksa-ge ndemerer-o luk yenggerak pugun-e kat kambararak Opni min Pineas min ereya-ge misik pem nak wat yogola, iri-net yenggerak pugun-o.

³⁵ Iri luk ombol nggwe-ge an-nen tepan ombo mondok tugup lak, an-nen yidnak yidnak oboksa kwaruwa nap misik lenak pimin-o. At-nen wigarag-e tepan omborak unpumu, tepan ombo-nen wanugwi yabu wanogolar-e, nagawan an-nen lenak inpimin ereba na endam yabu pempa wanogolat wolma-o.

³⁶ Kat-nen wigarak-nen unluk wolma-ge tepan ombo iri eram uang min nunggwi mende min-e nggi yogolat wolma-o. Iri yogolat-nen nggi yogolar-e, ir-e nunggwi mende misik pem-et kum norak ereya na wok turak pem tepan ombo iri na yak ondosolar-e: ’Nab-o. Yongga kendeyek-nen ob-o luk yak nerer-o’ luk emengen mbaruwa-o” luk yak tij-o.