1 SEMUEL 19 - Nanduk Ngget Tul Pidnak Wene

Saul-nen Ndaut langgal luk nidnak wene 19:1-24

¹ Saul-nen at ambara Yonatan min at eyabu wanugwi nap oboksa min yak ondosolar-e: ”An-e Ndaut wirimin-o” luk yak indij-o. Alat nde, Yonatan-nen-e Ndaut abuwa kwarat karuk,

² Yonatan-nen Ndaut yak tosolar-e: ”An neid-nen kar-e kereyekluk yusu me, kwara wolmin-o. Kub-e mburugundik, kurama ereba me kurak tak wolmomtag-o.

³ Nde, kub-e an neid nenmberek ap lak ma mburulndik, kat kura woragun sa koroga men yogolar-e, at-nen kat kimin yusu iri-ge ’Kat kindi-ge no perasolat-nen yusu-o? luk kin wanimin-o. Iri lug-e, wene yuwa iri-ge an-nen-e kat yak kirimin-o” luk yak tij-o.

⁴ Iri luk, Yonatan-nen Ndaut wene konag-et Saul yak tosolar-e: ”Neij-o. Kar-e ndegel koboso nap Ndaut lak tak purak yusu iri-ge mondok meyog-o. Nde, at-nen neid kat kimin-e meya-ge mondok kwat kibigit lag-o. Iri-nen kat kimin-e konak nak kwat koboso-o.

⁵ Kindi yebet ki-o. Ar-e Nggoliat worosolar-e, iminep wisirik puruk nggwid iri nar-o. At ebem-net Isarael nab-e Nagawan Indo-nen ombol nggwe rak inpid iri nar-o. Iri kwarosola-ge, neid kerengen-net karuk, iri tarem-e neid kar-e kalen kaigen nar-o. Alat nde, yawo-ge meya kwarigit lak nap yu lel mberel obosolat, konak nap yu-ge elem lak ma-t wururak yusu-a?” luk yak tij-o.

⁶ Wene iri na Yonatan-nen indi yanggonosola, Saul-nen-e: ”Iri-ge ndemerer-o” luk yebet karug-e, ”Nagawan Indo unu bem mondok wirimin pug-o” luk owak mbarij-o.

⁷ Wene iri na yurug-e, Yonatan-nen-e Ndaut na wene mbo buruk, wene yiga ereba na oboksa Ndaut yak turug-e, Ndaut na-ge imin luk Saul eram mbirigarig-e, Ndaut-nen-e nanduk kwarusu ereba na nggal-et Saul ndegel posolat woragij-o.

⁸ Iri luk woragolar-e, Pilisin nap inmin wim tuguruk mbariga-o. Mbarogolar-e, Ndaut-nen Pilisin nap ondosolat, abu urugwe nggwe rak onposola, ndi yiga-o.

⁹ Nde, misik tarem-e Saul na-ge tege tenaga o ma koreyak worasoma-ge, Nagawan Indo-nen meya indi iri na Saul arem pil lobok yij-o. Nde, iri tarem-e Ndaut na-ge kecapi poba yik tenak worasoma,

¹⁰ Saul-nen-e Ndaut na kebet watsa koreyak worasoma tege ebem ndurum tak puruk, kebet min mbiringin tak pij-et nde, wabosola kebet na nde nggaruk ninggij-o. Iri yosola, Ndaut na-ge kwiye-nen mbirij-o.

¹¹ Nde, kubu iri na-t Saul-nen-e ap ereb-e Ndaut enlengen waruk kwat tenak nene luk, kub-e wururak pem Ndaut ama wirik inpij-o. Alat nde, Ndaut ogwe Mikal-nen at yak tosolar-e: ”Kat nde yawo kubu nde mbirigit lak-nen-e mondok kuruwa-o” luk yak tij-o.

¹² Yak turug-e, Mikal-nen-e Ndaut na-ge papalo tu nggwe mberak pamu, Ndaut na-ge kwiye mberamu, wirigit lak yiga-o.

¹³ Mborosola-ge, Mikal-nen-e it-nen erembel wanugwi ndak worak iri na waga Ndaut nene yoso ondoro iri na me mbinggirik puruk, anggul ambigit nggwe-ge enanggul ugwi mbarugwi kambing usu-nen konidnak iri na-ge anggul ugwi mbarak keya bij-o. Iri rak purug-e, erembel wanugwi ndak worak iri na-ge embem sum-nen nggetla keya bij-o.

¹⁴ Iri rak puruk worasoma, Saul-nen Ndaut tenagurak inpil lobok yid nap ereba na lobok yogola-ge, Mikal-nen yak ondosolar-e: ”Ndaut na-ge kugi worak worasu-o” luk yak indij-o.

¹⁵ Yak ondosoloma mbirigarik, Saul yak tukmu, Saul-nen yak ondosolar-e: ”Kenlengen-net ker-o” luk tuguruk wirik onposolat-nen yak ondosolar-e: ”Nene yoso ondoro min kud turuk lobok yer-o. Iri yugupmu an-nen wirimin-o” luk yak indij-o.

¹⁶ Yosoloma, nene yoso sa nggwigarik, lombot piganggal-e erembel wanugwi ndak worak iri nde nene yoso ondoro iri na bem enanggul ugwi mbarugwi kambing usu-nen konidnak iri na-ge anggul ugwi mbarak mbinggirik kaiga-o.

¹⁷ Iri ala karuk, Saul-nen Mikal yak tosolar-e: ”An nuwim nap na-ge yongga worosolat, wirik puruk kar-e noluk-nen an namberam laigenma-o?” luk yak tij-o. Yosoloma, Mikal-nen onggo yosolar-e: ”An-nen nde yongga wosa kuraga wirik pigit lak nde ala-ge, mondok an nururak ala-nen kwarukmu-o” luk yij-o.

¹⁸ Ndaut iri na wirigit lak agap nggarik mberarig-e, Samuel eram o Arama mbirij-o. Mberarig-e, Saul-nen kwat ibidnak ereba na pendega yak tij-o. Yak turug-e, Semuel min Ndaut min-e o Nayot mbirigarik iri me woraiga-o.

¹⁹ Alat nde, ap-nen Saul yak togolar-e: ”Ndaut na-ge o Arama koroga o Nayot worasu-o” yak tiga-o.

²⁰ Iri yogola kulurug-e, Saul-nen-e ap ereb-e Ndaut tenaguruk lobok yurak wirik inpij-o. Wirik enpamu mbiriganggal-e, Semuel-nen lit kuruk Mbal Pem Nagawan ene lomboksa yugwi nap siyak enne nggoksa ndawi ndorogolat, kot kil lobok yukmu eneyaiga-o. Nde, it Saul-nen wirik inpid nap ereba na-ge Mbal Pem Nagawan Indi enpem wok yosolar-e, it min-et enne nggoksa ndawi yogolat, kot kaiga-o.

²¹ Nde, iri kwatli wene ereba na Saul eram wok yosoloma-ge, Saul-nen-e ap erep iri na me wirik inpij-et nde, it min-et enne nggoksa ndawi yogolat yot kot mbiga-o. Iri na nggal-et kenan pem tak posolat wirik inpid na iri na nggal-et kwariga-o.

²² Iri kwarogola karuk imbirig-e, at Saul ondomog-et Arama nggwe yi kenanggurak mbun nenaridnak sa o Segu iri me wok yosolar-e: ”Semuel min Ndaut min-e ngge me worali-o?” luk kin wanosola-ge, iri me woragwi nap-nen yak togolar-e: ”Nayot worali-o” luk yak tiga-o.

²³ Iri yak togola iri me mborosoma-ge, at Saul min-et Mbal Pem Nagawan Indi ebem lobok yosolar-e, Nayot mburugwi tula iri na-ge ene nggoksa ndawi yosolat kot kil mborosolat woragij-o.

²⁴ Nde, Saul na iri me wok yosolar-e, usum yonggora keya buruk, Semuel erengen pem ene nggoksa ndawi yosolat kot kasolat woragij-o. Iri kwarosolar-e, Saul na-ge usum we erare nggwe tudtak nag-et misik nene yij-o. (Iri ala karuk, ap-nen yogolar-e: ”Saul min-et Mbal Pem Nagawan ene lomboksa yoso nap kwat yid, lak?” luk wene ijambo rak pugwi-o.)