1 SEMUEL 17 - Nanduk Ngget Tul Pidnak Wene

Nggoliat-nen Isarael nap erengenma nggal tak onposolat undurak yidnak wene 17:1-11

¹ Nde, misik tarem-e Pilisin nap san ombo oboksa wim ngguwokluk Yewura nggweyak pem o Soko siri iri me obo nesa keya buruk, ndok wiriga-o. Iri lug-e, o lije-ge Suko wok Aseka wok o Epes Ndamim iri me wiril lobok yiga-o.

² Nde, Saul min Isarael nap min-e unuwi lije-ge Ela mbirikmu iri me ndok wutluk o sare wiriga-o. Iri luk, Pilisin nap inmin wim mbarurak pem mondok lid lud tak pogolat woraiga-o.

³ Iri nggal kwarogolar-e, enggendumu-ge mbirik misik worala, Pilisin nab-e ndobo ponok iri na bem ndok worogola, nde, Isarael nab-e ndobo misik ponok iri na bem ndok worogola irit kwariga-o.

⁴ O Nggat nap mondok yig nggoso aru nap misik unu-ge Nggoliat woragij-o. Nde, at iri na-ge Pilisin nap woragwi sa-nen Isarael nap erengenma nggal tak unpuruk undurak pem nggweyel inpil lobok yij-o. Nde, ebe mot ndak worogolar-e, tiga meter nggal-o.

⁵ Nde, at iri na anggul imiri yoso topi-ge posid tembaga-nen konidnak mbi puruk, eragun-e posid tembaga-nen konidnak angin-e lima pulu tuju (57) kilo irit yoroso-o.

⁶ Nde, ijog-e posid tembaga-nen konidnak unuwok lumurak pugwi mende puruk, nde, wuru-ge posid tembaga-nen konidnak iri na endak pem keyok tak puruk

⁷ nde, erege iri na abare ndak worogolar-e, o owak nggal, nde, erege iri na anggat nggwe posid angin-e tuju kilo nggal-o. Nde, undumno iri-ge san ombo misik-nen amanggim waruk mborosola, imbirik noso-o.

⁸ Nggoliat iri na ndong yosolat-nen ene nggoksa Isarael nap san ombo endam ene yaga pil lasolar-e: ”Kir-e iri me-ge no kwatli-o? Ninmin wim mbaruwokluk yili-a? Saul ndegel ubugwi nap wa-e! An-e Pilisin nap-nen yusu-o. Kit kennggendumu ap kwiye lak nap an nebem kore yil mbumomtak nap misik lener-o.

⁹ Lenak pugupmu nenmawi wal kakmu nde, an norosola-ge, nir-e kit ndegel kunpugwi nap kwat mul-o. Alat nde, ombol nggwe yosolat at iri na nde wirimindig-e, kir-e nit ndegel nunpugwi nap kwat yugub-o.

¹⁰ Nde, yawo-ge an-nen Isarael nap san ombo kenpem kore yimin me, kit kennggendumu an nimin nenmawi wal kudtak nap ndak misik mbi lenak per-o!” luk yak indij-o.

¹¹ Nde, Saul min at-nen idnak nap ereba na min-nen enpem kore yurak yusu wene iri na kulurug-e, wendet luk, kwiye kwarat yiga-o.

Ndaut na Saul imin o lijema woragid wene 17:12-40

¹² Nde, Ndaut iri-ge Eperata nap Isai ambara Yewura nggweyak pem Mbetleyem iri me woraso-o. Nde, Isai ambara-ge ap nak delapan irit woragij-o. Nde, Saul nagawan worasola tarem-e Isai iri-ge abu indi worak irit woragij-o.

¹³ Nde, Isai ilirak nanduk nderak kenan-e manggiya-ge Eliap, nde, imbirig-e Abinandap, imbirig-e Siama, it ereya na-ge Saul imin wim timbiril mbiriga-o.

¹⁴ Ndau iri-ge labo irit woragij-o. Worala-ge, owerak indi worak kenan ereya na-ge Saul min wim timbiril mborogola-ge,

¹⁵ Ndaut na woralar-e, Saul ndegel ubusu na keya buruk, misik tarem nggal-e eid olomba yik karok wolmomtak pem Mbetleyem mborosolat woragij-o.

¹⁶ Pempa empat pulu (40) tarem ereya woragolar-e, kuplila-nen na keyama-nen na Nggoliat iri na-ge erengenma nggal tak unpuruk, Isarael nap undurak nggweyel inpil lobok yosolat woragij-o.

¹⁷ Worala-ge, misik tarem-e Isai-nen Ndaut yak tosolar-e: ”Kar-e kowerak enmanggim mbato wora angin sepulu kilo ya min oroti wora sepulu ya min Isarael nap san ombo wim nggogolat-nen woragwi sa waruk mbiri-o.

¹⁸ Iri-nen it enanggul pem san ombo onowe amanggim keju sapi wam amburu-nen konidnak mende sepulu yu min-et waruk mbiri-o. Iri yosolar-e, kowerak worali wene kin wanurag-o. Kin wanuruk, lobok yosolar-e: ’Ir-e konag-et unluk ndigirig-et worali-o’ luk yebet kasolat, kat na it endam-et wok yigen-o luk yebet kayek-nen yenggerak purak mende it-nen pidnak min-et waruk lobok yurag-o.

¹⁹ Nde, ir-e Saul min-et Isarael nap oboksa min-et Ela Mbirikmu iri na me Pilisin nap inmin wim tembet tenak worali-o” luk yak tij-o.

²⁰ Yak tosoloma-ge, kub-e Ndaut iri na kubu kabu men yosolar-e, at olomba ereba na-ge lomba yik karok woraso nap misik yik karok wolmakluk ebem purug-e, at waruk mbururak nunggwi mende wanuruk yarik, Isai-nen yak tid iri na ndak ndag-et mbiridnggal-e Isarael nap san ombo-ge wim timbiril mborogolat kek kok pem mburukmu, Isarael nap wim nggogolat-nen woragwi sa wok yij-o.

²¹ Nde, Pilisin nap san ombo min Isarael nap san ombo min-e wim ngguwokluk ponok ponok mbiginiga-o.

²² Nde, Ndaut na-ge at-nen waruk mbirid nunggwi mende ereba na-ge ap o towarak worasu iri na eram ereba me puruk, owerak mbenat inpil wim nggugwi sa mbirij-o.

²³ Nde, Ndaut na mberarik, owerak inmin wene ndorosoma-ge, Nggoliat iri na-ge irim nggosolar-e, at-nen pem yoso iri na nggal-et erengenma nggal tak unpuruk, Isarael nap undurak nggweyel onposola-ge, Ndaut-nen na kulii-o.

²⁴ Nde, Isarael nab-e Nggoliat karug-e, ndag-et nak kwiye-nen pong kil mbiriga-o.

²⁵ Iri yogolat, it Isarael nap nak yak kerak mbogolar-e: ”Ap iri ker-o! Nggoliat iri nak nggweyel nonposolat nundurak yusu ereba nak koler-o! Nde, Nagawan Saul-nen owak mbarosolar-e: ’Ta-nen nde Nggoliat wuruwa nab-e onggo nggok wok tosolat, iri-nen an nara iri na wok tosolat, at iri owe owot inmin-e pemerinta enmanggim tol pugwi iri na-ge puwa bug-o’ yid nar-o” luk yak kerak mbiga-o.

²⁶ Yogola, Ndaut-nen yosolar-e: ”Elem nin nap Pilisin nap yu-ge Mbal Pem Nagawan Uruk nak Woraso-nen idnak esan ombo inmin amawi wal kudtak pem kwiye lag-et nggweyel unpusu yu-ge ngge-o?” luk at-nen san ombo misik kin wok obosolar-e: ”Pilisin nap iri worosola, Isarael nap pesel unpusu iri lak tak puwa nap iri-ge onggo-ge no mende wok tuwa-o?” luk kin wanij-o.

²⁷ Yosoloma, ap ereba na-nen-e Saul-nen Nggoliat worosoma wok undurak yid ereya na obok yak tiga-o.

²⁸ Ndaut owe manggiya Eliap iri na-nen Ndaut-nen san ombo ereba na inmin wene yusu ereba kulurug-e, isilepma Ndaut obosolat-nen yak tosolar-e: ”Kar-e no wil lobok yigen-o? Nde, kolomba parugu woraso sa ereba na-ge nduguruwakluk ta ebem pigen-o? Kar-e kwiye lag-et lubung nak kasu yu-ge! Kar-e wim nggwili yu niniyil nak lobok yigen iri nar-o!” luk met ibij-o.

²⁹ Yak tosoloma, Ndaut-nen yosolar-e: ”An-e we nak kin wanusu yu-t nde, no meya kwarigi-o?” luk yij-o.

³⁰ Yosoluk mberarig-e, san ombo erep kin wanid ereya na nggal-et kin wanij-o. Kin wok onposola-ge, onggo na ereya na nggal-et yak tiga-o.

³¹ Alat nde, ap erep-nen-e Ndaut-nen yid wene ereba na kulurug-e, Saul yak tiga-o. Yak togolikma-ge, Saul-nen Ndaut na-ge at eram wok makluk yonggo ibij-o.

³² Saul eram wok yosolat-nen Ndaut-nen yosolar-e: ”Nagawan wa-e. Nir-e Pilisin nap iri kwiye yurak pug-o. Ndegel koboso nap an-nen ebem kore yimin-o” luk yij-o. Yosoloma, Saul-nen at yak tosolar-e:

³³ ”Kat nggal-nen-e ap iri-ge nggesa-nen ebem kore yugun-o? Kar-e awo la mendaso-t nde, ar-e liap pem-net wim nggoso aru me, mondok meya-o!” luk Saul-nen yak tij-o.

³⁴ Alat nde, Ndaut-nen yosolar-e: ”Nagawan wa-e. Ndegel koboso nap an neid olomba wam parugu woralar-e, ndakngge isilepma worak singa min mberuang min-nen lomba wam norak lobok yosola-ge,

³⁵ ndakngge isilepma worak ereba na-ge muk karuk worosolar-e, lomba ereba na-ge agap ndagoso-o. Nde, iri yosoma isilepma worak ndakngge singa min mberuang min-nen nde an nereyekluk yosola-ge, an-e urum lomboksa nggwin kaga worak poso-o.

³⁶ Ndegel koboso nap an-e isilepma worak singa na irit mberuang na irit mondok worosolat woraso-o. Nde, Mbal Pem Nagawan aru buk Pilisin nap iri-ge kwiye lag-et Mbal Pem Nagawan Uruk nak Woraso iri na-nen idnak san ombo ereba na erengenma nggal tak unpusu me, singa ndakngge min mberuang min wurusu ereba na nggal-et mondok wirimin-o.

³⁷ Nagawan Indo-nen isilepma worak singa min mberuang min emendam-nen perak nimiri yoso-o. Iri nggal-et Pilisin nap iri inggem-nen na nimiri-t yuwa-o” luk yij-o. Yosoloma, Saul-nen at yak tosolar-e: ”Iri ala-ge, wiril mbiri-o. Nagawan Indo-nen yongga kuruwag-o” luk yij-o.

³⁸ Iri luk Saul-nen-e posid-nen konidnak eragun iri na wok tamu, Ndaut-nen yirij-o. Iri rak puruk, Saul-nen-e posid tembaga-nen yidnak anggul imiri yoso topi iri na Ndaut anggul pem pij-o.

³⁹ Iri rak purug-e, Ndaut-nen Saul agabo iri na-ge posid-nen konidnak tagun iri na bem para mberak pij-o. Iri rak puruk, tu wal kagaij-et nde, Ndaut na-ge wim nggogolat-nen pugwi mende yoroso buk me, mondok mbururak meya agaij-o. Iri ala, Ndaut-nen Saul yak tosolar-e: ”Naboo. An-e yeba mende-ge yoroso buk me, yutluk mbururag-e meya-o” yosoluk, yunggwirik pij-o.

⁴⁰ Yunggwirik purug-e, lomba ndogoroso wangun iri-na wanuruk, yi ma-nen wanidnak kerep kumbungen marik lima wanuruk, usumu yarak purug-e, karet min inggem wanuruk, Nggoliat eram mbirij-o.

Ndaut-nen Nggoliat nggweyakma rak pidnak wene 17:41-54

⁴¹ Mborosola ereya na-net Nggoliat iri na-ge at eragun waruk naso iri na-ge nanduk tak puruk, Ndaut eram panggo yil lobok yij-o.

⁴² Iri yosolat-nen Ndaut abage kwarat lombot ibidnggal-e, Ndaut na-ge liap awo mendaso, erare na konak, ebe na tenaga men yidnak ala karug-e erengenma nggal tak obosolar-e, nda wirij-o.

⁴³ Iri yosolat-nen Nggoliat-nen Ndaut yak tosolar-e: ”No amanggim-nen wangun iri-ge wanigen-o? Kar-e an-e yengge ala-nen, lak?” yak turug-e, at ugugwiwak unu bem Ndaut na-ge imbiri lamut tak ibij-o.

⁴⁴ Iri luk Ndaut yak tosolar-e: ”Ndak wasug-o. Kebe iri-ge towe mena-nen nujwakluk wok teyek-nen ndak wasug-o” yak tij-o.

⁴⁵ Yak tosola, Ndaut-nen onggo yosolar-e: ”Kar-e kagabo bem kuwuru bem kerege bem nereyekluk lobok yusu-t nde, an-nen-e Nagawan Indo Amawi Worak Isarael nap Enmbal Pem Nagawan kat-nen kerengenma nggal tak pusu iri na bem-net kereyekluk lobok yusu-o.

⁴⁶ Kar-e o yawo-net Nagawan Indo-nen kegera ninggem posola, nggweyakma rak kuburuk kanggulwak mbarimin o. Mbatluk kat kebe min kat-nen idnak san ombo Pilisin nap oboksa enpe min-e towe mena-nen nok kunpuwakluk wok tumu, yi wi ndi wi oboksa-nen kulurug-e: ’Isarael nap-nen erembel wanugwi Enmbal Pem Nagawan-e worasur-o’ luk yuwa-o.

⁴⁷ Iri-nen yu me worali nap oboksa-nen enaru yogolar-e: ’Nagawan Indo-nen-e at ilirak inmiri yosolar-e, kabo bem tege bem-nen-e inmiri yoso bug-o’ luk yebet kujwa-o. Wim nggurak iri-ge at inggem nak worasu me, kir-e at-net nininggem kegera puwa-o” luk yak tij-o.

⁴⁸ Yosoloma-ge, Nggoliat na-ge Ndaut eram panggosa lobok yosola-ge, Ndaut na-ge Pilisin nap enambigit Nggoliat eram ndag-et nak panggo yil mborosolar-e,

⁴⁹ inggi usumu nggorak posolar-e, kerep kumbungen ereya na misik wanosolar-e, karet iri na bem ket mbet tak puruk, woroksa Nggoliat lel kil mbiridnggal-e, kerep na mborosolar-e, Nggoliat imbiriwak arem poloksa nggosolar-e, erare nggwe langgu yij-o.

^50-51 Iri rak puruk Ndaut-na Nggoliat eram ndag-et nak mborosolar-e, at agabo lak me, Nggoliat agabo iri na yarak woraso ondolma-nen lit kasolar-e, Pilisin nap yu na-ge anggulwak mbarij-o. Iri nggal kwasa kerep min karet min iri na bem nak-nen Ndaut-nen-e Nggoliat na-ge nggweyakma rak pij-o. Nde, Pilisin nap-nen yik kaiganggal-e, it-nen idnak san ombo onowe iri na worosola-ge, kwiye-nen ndi yiga-o.

⁵² Nde, Isarael nap min Yewura nap min-nen-e kek kok pem Pilisin nab-e maguruk mbiriga mbiriga, o Nggat wok luk, iri me-nen nok Ekoron pak tumende bem-et inpil mbiriga-o. Nde, Pilisin nap indiga ereba-ge o Nggat min Ekoron min-nen Seraim mburugwi tula tula ereba-ge Pilisin nap mare worak nak-nen liring arem mbiriga-o.

⁵³ Iri kwasa langgara wirik unpuruk, Isarael nap na tuguruk mborogolar-e, Pilisin nap san ombo wim nggogolat-nen woragwi sa yi mende ndi mende oboksa kugun waniga-o.

⁵⁴ Nde, Nggoliat anggulwak mbarid iri na-ge Ndaut-nen-e Yerusalem waruk mbirij-o. Alat nde, Nggoliat esan ereba na-ge Ndaut uwi lijema-t ndok worak pij-o.

Ndaut Saul imbiri bem nuk kaidnak wene 17:55–18:5

⁵⁵ Nde, Ndaut na Nggoliat wereyekluk mborosola-ge, Saul-nen at-nen idnak san ombo onowe Apnet iri na kin wanosolar-e: ”At yu-ge ta ambara-o?” luk kin wanosola-ge, Apnet-nen yosolar-e: ”Ndegel koboso nap an na naru bug-er-o” luk yak tij-o.

⁵⁶ Yosoloma, Saul-nen yosolar-e: ”Iri ala-ge, wene yu-ge ap kin wok inpil mbiri-o” luk yak tij-o.

⁵⁷ Nde, Ndaut-nen Nggoliat iri na nggweyakma puruk, san ombo wim nggogolat-nen woragwi sa lobok yosola-ge, Nggoliat anggul mbarak iri na-ge inggem parugu, Apnet-nen-e Ndaut na-ge Saul eram imin mbirij-o.

⁵⁸ Iri yamu, Saul-nen kin wok obosolar-e: ”Li ap kar-e ta ambara-o?” yosoloma, Ndaut-nen onggo yosolar-e: ”An-e Isal Mbetleyem nap iri na ambara-o” luk yak tij-o.