1 SEMUEL 16 - Nanduk Ngget Tul Pidnak Wene

Ndaut nagawan mendak posolat amburu ebem kilid wene 16:1-13

¹ Nde, siyak woraruk misik tarem-e Nagawan Indo-nen Semuel yak tosolar-e: ”Kar-e Saul yebet karuk, kindi andi kerenak worasu-a? Nde, Saul iri-ge Isarael nap ennggendumu nagawan woraso iri na-ge lak tak pigi nar-o. Kar-e saitun engen amburu kenanggo waruk Mbetleyem ap misik unu-ge Isai iri eram-et mbiri-o. At iri ambararak ennggendumu misig-e nagawan wolmakluk an-nen lenak pukmu-o” luk yak tij-o

² Yosoloma Semuel-nen yosolar-e: ”Wene iri-ge nggesa-n kwarimin-o? Saul-nen kuluwarig-e, mondok nuruwa-o” yosoloma, Nagawan Indo-nen yosolar-e: ”Sapi mendaso misik waruk mbiri-o. Waruk mborosolat-nen ap ereba yak ondosolar-e: ’An-e Nagawan Indo amanggim wosa purak waruk lobok yusu-o’ luk yak indi-o.

³ Nde, eyabi worak Mbal Pem Nagawan amanggim pugun iri posolar-e, Isai iri-ge yonggo ibi-o. Nde, kat-nen kwarurag-e an-nen mirik kibimin-o. Kat-nen-e ap an-nen mirik kibimin irit nagawan tak obosolat, amburu anggul pem kilik purag-o” luk yak tij-o.

⁴ Yak tosoloma, Semuel na Nagawan Indo-nen yid iri na ndak ndag-et Mbetleyem mbirij-o. Mberarik, Mbetleyem wok yosola-ge, o iri me-nen enne kulugwi nap ereba na-nen-e wendet luk, Semuel wok obogolat-nen kin wok obogolar-e: ”Nonmbo wa-e. Kar-e kalen min-et nendam lobok yusu, lak?” luk yak tiga-o.

⁵ Yogolikma, Semuel-nen yosolar-e: ”Ndemerer-o. An-e Nagawan Indo amanggim sapi wam wosa purak lobok yusu-o. Iri ala-ge, wam wosa pogolat nggok sagurak me, kit na kit-net marak puruk wolmer-o” yak ondosolar-e: ”Isai ilirak inmin na ondomoktak-nen marak puruk Mbal Pem Nagawan amanggim wam wosa pukmu lobok yurag-o” luk yonggo inpij-o.

⁶ Iri yak endamu, it ndok worogola-ge, Semuel-nen yik kagaidnggal-e Isai ambara Eliap karug-e, Semuel-nen perasolar-e: ”Mondok at irit Nagawan Indo-nen lenak pij-o” luk peragij-o.

⁷ Alat nde, Nagawan Indo-nen Semuel yak tosolar-e: ”Kar-e enpe konak min enpe mot min yik kaidnak pem nak kindi purungsa ebem pusu-ge meyog-o. An nindi-nen pigi-ge at iri-ge lag-o. An-nen-e ki nap-nen enabut yik kagwi nggal-e yik eneyaso bug-o. Ki nap-nen-e enpage ombol nggwe nak yik kali-t nde, an-nen-e inndi nak kaso-o” luk yij-o.

⁸ Yosoloma, Isai-nen-e ambara Abinandap iri na wene mbo buruk Semuel eram ibil lobok yij-et nde, Semuel-nen yosolar-e: ”At min-et Nagawan Indo-nen lenak pidnag-e lag-o” luk yak tij-o.

⁹ Iri yosoloma, Isai-nen ambara Siama min Semuel eram ibil lobok yij-et nde, Semuel-nen yosolar-e: ”At na Nagawan Indo-nen lenak pigit lag-er-o” luk yij-o.

¹⁰ Iri nggal kwasa Isai ilirak tuju ereya na-ge misik linggik Semuel eram inpil lobok yij-et nde, Semuel-nen Isai yak tosolar-e: ”It ya-ge Nagawan Indo-nen len inpigit lak nag-er-o” luk yij-o.

¹¹ Yak turuk, Semuel-nen Isai kin wok obosolar-e: ”Kat kambararag-e oboksa ya-t, lak?” yosoloma, Isai-nen yosolar-e: ”Lag-o. Labo misiget nak worasu-t nde, ar-e lomba wam ndegel tenak worasu-o” luk yak tij-o. Yosoloma, Semuel-nen yosolar-e: ”Ndak wene mbo ubuwak-nen yak indi-o. Nde, at lobok yigit lak ma-ge nunggwi mende nul pug-o” luk yak tij-o.

¹² Yosoloma, Isai-nen-e la iri na wene mbo ubuwakluk ap yak endamu, yak tikma-ge, ap sujwe arare na konak, ebe na mbenak, erengen na konak irit lobok yosola, Nagawan Indo-nen Semuel yak tosolar-e: ”An nindi peragi-ge yur-o. Irit anggul pem amburu kilik pi-o” luk yak tij-o.

¹³ Yosoloma, Semuel-nen-e saitun amburu kenanggo iri na wanosolar-e, owerak ereba na enlengen pem-et nagawan tak obosolat Ndaut anggul pem amburu kilik pij-o. Iri yosola-ge, iri na tarem-et Nagawan Indo Indi-ge Ndaut ebem mbij-o. Iri tarem-nen tel korarik, Nagawan Indo Indi-ge pem irit Ndaut imin woragij-o. Iri lug-e, Semuel na-ge tuguruk ama Arama mbirij-o.

Ndaut na nagawan Saul woraso sa woragid wene 16:14-23

¹⁴ Saul na-ge Nagawan Indo Indi-nen keya uburug-e, Nagawan Indo-nen meya indi Saul ebem pil lobok yamu, Saul na-ge andi bandi rak obosolat woragij-o.

¹⁵ Iri ala karuk, Saul ndegel ubugwi nap-nen Saul yak togolar-e: ”Nir-e nenaru-o. Nagawan Indo-nen meya indi kat karem pil lobok yamu, andi bandi rak kubusu-o.

¹⁶ Nagawan kat-nen nde ob-o yosola-ge, nir-e kecapi poba yoso aru nap misik kore yul-o. Nde, meya indi iri-nen andi bandi rak kobosola-ge, at iri-nen kecapi poba ene yosola-ge, kona yamuksa woragun-o” luk yak tiga-o.

¹⁷ Yogoloma, Saul-nen enpem posolar-e: ”Kecapi poba yoso aru nap mbi ogore yuruk, waruk lobok yer-o” luk yak indij-o.

¹⁸ Iri yosola kulurug-e, at ndegel oboso nap misik-nen Saul yak tosolar-e: ”Mbetleyem woraso nap Isai ambara misig-e kecapi poba ene yoso aru nap misik worasu-o. Ar-e san ombo konak, kwiye na lak, amawi worak, wene yoso mondok indi tenggerak-nen yusu-o. Nde, Nagawan Indo-ge imin-et woraso-o” luk yak tij-o.

¹⁹ Iri yogola-ge, Saul-nen-e wene yu waruk ab-e Isai eram wirik onposolar-e, wene yu yaga wirik inpij-o: ”Kat kambara Ndaut lomba yik karok worasu iri-ge an neram lobok yuwak-nen yak ti-o” luk wene wosa bij-o.

²⁰ Posoloma-ge, Isai-nen kelerai wam misik lud tak purug-e, iri na bem-e kambing marik misik min orati min anggut amburu kobongsa kenanggo embe misik min oboksa Saul wok tuwakluk Ndaut inggem pij-o.

²¹ Iri nggal kwasa Ndaut na-ge Saul eram lobok yarik, at ndegel oboso nap kwat yij-o. Iri kwarosola-ge, Saul-nen-e indi kundik irit woragij-o. Iri yosolar-e, at esan waruk noso nap tak ibij-o.

²² Iri luk, Saul-nen Isai ebem nggi yosolar-e: ”Ndaut yu-ge an-e mondok nindingen-o. An ndegel nobosolat ya me wolmag-o” luk yak tij-o.

²³ Nde, ereya tarem-nen meya indi-ge pempa Saul ebem lobok yosolat worasola-ge, Ndaut-nen kecapi poba ene yosola-ge, meya indi iri na-nen Saul na keya bosola-ge, Saul na-ge ebem yamuksa konak yosolat woragij-o.