1 SEMUEL 14 - Nanduk Ngget Tul Pidnak Wene

Yonatan na-ge wim wari kwat yid wene 14:1-15

¹ Nde, misik tarem-e Yonatan-nen ap sujwe at esan waruk naso iri na yak tosolar-e: ”Nir-e Pilisin nap-nen tu pakta worali sa ele me ndil log-o” yak tij-et nde, ar-e eid yak tigit lak irit yij-o.

² Nde iri tarem-e Saul na-ge o Nggibea koroga Migoron iri me e ndelima indipma woragij-o. Nde, ap at imin woraiga nab-e enpe wonarag-e enam ratus (600) irit woraiga-o.

³ (Nde, tepan ombo-nen yurugwi sum (epot) waruk mbirid tepan ombo-ge Agitup ambara Agia-nen waruk mbirij-o. Agitup iri-ge Pineas ambara Ikabot owe-o. Nde, Pineas iri-ge Nagawan Indo-nen idnak tepan ombo Eli o Silo woraso iri na ambara-o.) Nde, ap ereba na-ge Yonatan iri me-nen mbirid na-ge kabag-et woraiga-o.

⁴ Nde, Yonatan iri na-ge Pilisin napmen yengenma tu paktak worali sa iri na me wok yurak pem-e kerep tumbu nin wok nin wok mangonok iri na nggwe-t lagaij-o. Nde, kerep nggok ponok nggwe unu-ge Mboses, nde, ponok nggwe iri na unu-ge Sene.

⁵ Nde, kerep nggok abare abam (utara) nggwe iri-ge Mikmas ambigit wosara mbiridnag-o. Nde, kerep nggok abare ena (selatan) nggwe iri-ge wosara Nggeba ambigit mbiridnag-o.

⁶ Nde, Yonatan-nen ap sujwe at esan waruk noso iri na yak tosolar-e: ”Mbal Pem Nagawan enaru buk Pilisin nap tu paktak worali sa iri me mburuwog-o. Nagawan Indo-ge ap kwarat inmin-nen na irit marig-et inmin-nen na irit ombol nggwe rak onposo me, Nagawan Indo-nen yongga nunduwa nde kwat ma-o” yak tij-o.

⁷ Yosoloma-ge ap sujwe iri na-nen onggo yosolar-e: ”Nab-o, kat kindi-nen peraruk kwarosola-ge, an-e kimbirik nag-o” luk yak tij-o.

⁸ Yosoloma, Yonatan-nen yosolar-e: ”Nab-o. Nit nde Pilisin nap tu paktak worali sa ndil lagolar-e, Pilisin nap-nen yik niniyujwakluk nam ndil lorag-o.

⁹ Iri kwarukmu nde, Pilisin nap-nen neneyaruk nde it-nen yak nondogolar-e: ’Iri me wolmer-o. Nit nak kendam lobok yul-o’ yogola-ge, nir-e ndil lagit lak ninndi abu wulmul-o.

¹⁰ Alat nde, it-nen nde: ’Nendam lobok yer-o’ yogola-ge, iri-ge Nagawan Indo-nen nit nininggem pij-o luk yenggerak purag-e iri yuwa irit me, nit nak ndil lul-o” luk yak tij-o.

¹¹ Iri luk it mberen na-ge Pilisin nap tu paktak worali ereba na enlengen pem nam yiga-o. Nam yukmu, Pilisin nap ereba na-nen yogolar-e: ”Ker-o. Iberani nap it kurak yidnak sa e urumu kerep urumu-nen nam yil lobok yili-o!” luk yiga-o.

¹² Enne nggoksa Yonatan min at yongga woroso nap iri na min yak ondogolar-e: ”Kir-e yu me lumer-o. Nit-nen misik mende mbi mirik kunpul-o” luk yak ondogola-ge, Yonatan-nen ap sujwe iri na yak tosolar-e; ”Yawo-ge it iri-ge Nagawan Indo-nen wesera Isarael nap nininggem pid me, an nimbirik nak lobok yi-o” yij-o.

¹³ Yosoluk lagolar-e, Yonatan na-ge wam pud mborosola-ge, ap sujwe iri na imbirig-et wam pud lagaij-o. Yonatan iri na-ge ap yeba na panggalsa mbud tak inpil mborosola-ge, ap sujwe iri na-nen-e mbud tak ma imbirik indil mbirij-o.

¹⁴ Nde, wim nandug-et nggwiga iri bem-e Yonatan min ap sujwe iri na min-nen ap ondogolar-e enpe-ge dua pulu (20) irit ndegera indiga-o. Nde, it indiga sa iri nde kerep mbising kagolar-e, misik tarem mbising kaidnag-e kuri maksa mburuwa-o (seperempat hektar)

¹⁵ Nde, iri kwaridnak wene-ge Pilisin nap woragwi sa-nen ap nembaga worali ereba na ennggendumu-nen wigak yil mbirij-o. Iri yosolar-e, Pilisin nap oboksa tu yik karok woragwi min ap nden unpugwi nap kere ereba na min-e kwiye-nen nggweyak min lele yij-o. Iri yogolar-e, enne nggu lek kagolat woraiga-o.

Pilisin nap urugwe nggwe rak inpiga wene 14:16-23

¹⁶ Iri kwarogola, Saul-nen idnak san ombo Mbenyamin nap onnggweyak pem Nggibea iri me wim tu mbal tenak worali ereba na-nen yik kaiganggal-e, Pilisin nab-e kwiye-nen inndi min kabak yidnak pong kil nogola eneyaiga-o.

¹⁷ Eneyaruk, Saul-nen san ombo at imin woragwi nap na yak ondosolar-e: ”San ombo-ge wonat inpi-o. Ta nde lak kagub-o?” luk yak indij-o. Yosoloma, it-nen ap mbenat onpogolat wonat unpukmu-ge, Yonatan min at esan waruk noso nap sujwe iri na min nde lak eneyaiga-o.

¹⁸ Tepan ombo-nen yurugwi sum epot iri na-ge iri tarem-e tepan ombo Agia nak Isarael nap anggul tak puruk nanduk waruk mbiridnak me, Saul-nen Agia yak tosolar-e: ”Epot iri na waruk lobok yi-o” yak tij-o.

¹⁹ Nde, Saul na-ge tepan ombo iri na imin wene mbal tenak worakmu-ge, Pilisin nap woragwi sa-ge enne nggu kwarat yogolat, sa nggwa mbogola-ge, Saul-nen tepan ombo iri na yak tosolar-e: ”Nagawan Indo-nen wene mirik nunpuwakluk nit-nen kin wanurak tarem-e lak yusu-o” luk yak tij-o.

²⁰ Iri luk, Saul na at-nen idnak san ombo inmin-e wim nggugwi sa mbirigarik-nen lombot piganggal-e, it Pilisin ennggendumu nari wari mbogolat, it nak wat kerak mbogola eneyaiga-o.

²¹ Nde, Iberani nap erep Pilisin nap ennggendumu woragolat Pilisin nap san ombo inmin nili ereba na nden kagolar-e, Saul min Yonatan min inmin lambuk yiga-o.

²² Nde, Isarael nap erep ndobo Eperaim ereba me kura worali ereba na-nen kuliganggal-e: ”Pilisin nab-e kwiye-nen nggilarak mbu ndi yili-o” yogola kulurug-e, it min-et Saul imin lambuk yogolar-e, Pilisin nap enpem kore yiga-o.

²³ Iri yogolat wim tomborogolar-e, tula irit timbiril timbiril mborogolar-e, o Mbet-Awen kwidsa irit mbiriga-o. Iri yogola-ge, iri tarem-e Nagawan Indo-nen Isarael nab-e inmiri yij-o.

Wim ngguruk ombol nggwe-nen kwat yidnak wene 14:24-46

²⁴ Nde, iri tarem-e Saul-nen owak mbarosolar-e: ”An-nen kenmepnggo nuwim nap indigit lak ma, o yawo-nen nde yi nilik ndi nilik yuwa nab-e mondok imbiri lamut mag-o” luk owak mbaridnak me, iri tarem-e nunggwi mende ninggit lak me, Isarael nap oboksa nere-nen onowak wil lobok yij-o.

²⁵ Nere-nen onowak lit kamu mborogolar-e, wal misik me nggogolar-e, tamuk amburu kwarat kaiga-t nde,

²⁶ Saul-nen it imbiri lamut tak purak wene wirik pid iri na it enpem mberak puwa naru ap misiger-o luk tet tamuk amburu ereba na-ge mondok ninggit lak keya biga-o.

²⁷ Alat nde Yonatan iri na-ge at eid Saul-nen ap ereba na-nen nasoma enpem imbiri lamut tak purak wene wirik pid iri na-ge kabak me, wangun inggem iri na wanosolar-e, tamuk amburu iri na ndowasa keya buruk, wanarik ninggij-o. Nurug-e, erengen kondok yosolat tuguruk amawi irit yij-o.

²⁸ Nuruk ombol nggwe san ombo ereba na ennggendumu ap misik-nen Yonatan yak tosolar-e: ”Kat keid-nen wene nit nenpem posolat-nen owak mbarosolar-e: ’Ta-nen nde o yawo yu-nen nunggwi mende nujwa ala-ge, mondok imbiri lamut ebem mberak purag-o’ luk yidnak me, nit oboksa ninggit lak me, nere-nen nenmawi lak yusu-o” luk yak tij-o.

²⁹ Yosoloma, Yonatan-nen onggo yosolar-e: ”An neid iri-ge nit nenlem nap inmin mondok meya-t kwarij-o. An-e tamuk amburu ningginggal-e yawo-ge namawi yid yu ki-o.

³⁰ ’Nunggwi mende nde norag-o’ yelepmanggal-nen-e wim nap urugwe nggwe rak onpogolat mengga wanidnak nunggwi mende ereba nonggolatnggal-nen-e nir-e Pilisin nab-e mondok terak menna endeleb-o” luk yij-o.

³¹ Nde, iri tarem-e o Mikmas-nen watsa o Ayalon kuri tula tula ereba wim nggogolar-e, Pilisin nab-e urugwe nggwe rak inpiga-o. Iri kwatlug-e, ir-e mondok enpabok lak yij-o.

³² Iri yogolar-e, silobulo wim nap enarengge kugun pem wanogolar-e, wirimikmik waruk ndi yiga o. Iri yogolar-e, lomba min sapi min waniga ereba na-ge wanidnak sa iri na me-net mbarep parep ligik puruk, mondok eyabi min irit ningga-o.

³³ Iri kwarogola, wene iri na Saul yak togolar-e: ”Nagawan wa-e. Kat kilirak yeba na-ge uno eyabi min nonggolar-e, Nagawan Indo imin meya kwatli-o” luk yak togola, Saul-nen kuluruk, ene mba yosolat-nen yosolar-e: ”Kit mondok lugud perel kit yu-ge wa-e! Ndak kerep nggok misik lembera limbik lambik pil lobok yer-o” luk yij-o.

³⁴ Iri luk Saul-nen wene waruk lobok yidnak nap ereba na yak ondosolar-e: ”Kir-e Isarael nap oboksa endam ndi yugupndik, ap oboksa-nen ensapi min onlomba min waruk yu me lobok yuwak-nen yak ender-o. Nde, waruk lobok yogola-ge, kerep yu bem-nen mbara ligik puruk yu me-nen norag-o. Iri nggal kwarogolar-e, ir-e uno eyabi min ninggit lak yogolat Nagawan Indo min-e tuguruk meya kwarigit lak ma-o” yij-o. Yosoloma, ap oboksa-nen wim kugun pem wanidnak wam ereba na waruk lobok yigarik, kerep iri na bem-nen mbariga-o.

³⁵ Iri rak purug-e, Saul-nen Nagawan Indo amanggim wam wosa kan purak ondoro misik konij-o. Nde, iri-ge mondok Saul-nen anggul-et Nagawan Indo amanggim wosa kan purak ondoro konij-e irir-o.

³⁶ Iri luk Saul-nen at imin nugwi nap ereba na yak ondosolar-e: ”Yawo kubu yu-t Pilisin nap enpem kore yil mbogolar-e, enarengge ndena wanogolat enpe oboksa ondogolat worakmu o nda mag-o” yosoloma, it-nen erep nggarogolar-e: ”Nonowe nagawan kat-nen yigen irit kwaruwog-o” yiga-t nde, tepan ombo-nen yosolar-e; ”Nandug-er-e Nagawan Indo indi-n pidnak mirik nunpuwak-nen nggi yuwog-o” luk yij-o.

³⁷ Yosoloma, Saul-nen Mbal Pem Nagawan kin wok obosolar-e: ”An-e Pilisin nap inmin wim mbarimin yu-ge nunggwirig-o? It iri-ge kat-nen kegera Isarael nap ininggem pugun, lak?” luk-kin wanij-et nde, iri na tarem-e Mbal Pem Nagawan-nen-e wene erep nggarigir-e lag-o.

³⁸ Iri ala karuk Saul-nen Isarael nap ennggendumu ap enne kulugwi nap ereba na yak ondosolar-e: ”Ndak yanem lobok yugupndik wene mbenarer-o. Yawo-ge meya-ge no kwaridnag-o?” luk yak indij-o.

³⁹ Iri luk Saul-nen watsa yosolar-e: ”Uruk nak woraso Nagawan Indo, Isarael nap ombol nggwe rak inpid iri na erengen pem yusu-o. Ta-nen nde meya kwaridnak ala-ge, mondok wat ma-o. An nambara Yonatan-nen kwaruwa-t nde, iri na mondok war-et ma-o” luk owak mbarij-o. Alat nde, ap misiger-o luk-nen mbi erep nggarigit lak yiga-o.

⁴⁰ Iri ala karuk Saul-nen Isarael nap yak ondosolar-e: ”Kit oboksa ponok yu nggwe men yil lobok yer-o. Nde, an nambara Yonatan nenmbereg-e ponok nggwe men yul-o” yak indij-o. Iri yosoloma, it-nen yogolar-e: ”Nonowe nagawan kat-nen nde kwarurak yosolar-e, kwarurak nag-o” luk yak tiga-o.

⁴¹ Yogoloma, Saul-nen tepan yosolat-nen yosolar-e: ”Nagawan Indo Isarael nap Enmbal Pem Nagawan wa-e. Yawo-ge noluk-nen an nene-ge erep nggarusu bug-o? Kat-nen idnak kerep lenak yeba bem-nen nene erep nggari-o. Meya yidnak iri-ge an nebem ala na Yonatan ebem ala na kerep Urim yu bem-nen onggo yi-o. Alat nde, meya iri nde Isarael nap enpem nde worala-ge, onggo-ge kerep Tumim yu bem-nen onggo yi-o” luk yij-o. Yosoloma, Nagawan Indo-nen onggo yosolar-e, Yonatan min Saul min enpem pij-o. Iri yosola-ge, ap ereba na-nen meya kwarigit lak irit eneyagaij-o.

⁴² Iri ala karuk Saul-nen yosolar-e: ”Nagawan Indo wa-e. An-nen, lak? Are, Yonatan-nen-a? Kat-nen nam tak pi-o” yosoloma, meya kwaridnak iri na-ge Yonatan ebem lud tak pij-o.

⁴³ Iri ala karuk Saul-nen Yonatan yak tosolar-e: ”Kar-e no kwarigen-o?” yak tosoloma, Yonatan-nen onggo yak tosolar-e: ”An-e tamuk amburu wangun abi bem-nen siyak ndowasa waga ninggi-o. Meya iri kwarigirik me, an wat yurak iri-ge ndak-nen yusu-o” luk yij-o.

⁴⁴ Yosoloma, Saul-nen Yonatan yak tosolar-e: ”Kat nde meya kwarigen onggo wat yigit lak yosolar-e, an nde Nagawan Indo-nen nuruwag-o!” yak tij-o.

⁴⁵ Alat nde Isarael nap oboksa-nen Saul yak togolar-e: ”Yonatan-et wururag-e mondok ndag-a? Yawo-ge at-net ombol nggwe rak ninpid yu-t nde, mondok lag-o. Nagawan Indo Uruk nak Woraso owag-o. Yonatan yu-ge anggulsu misiger-o luk tet mondok punurak pug-o. Nagawan Indo-nen yongga worosola at-net yawo ge ombol nggwe rak ninpid yur-o” luk yiga-o. Nde, Yonatan iri na-ge mondok watleb-et nde, Isarael nap oboksa-nen imiri yiga-o.

⁴⁶ Iri luk ombol nggwe-ge Saul-nen Pilisin nab-e tuguruk muk eneyagit lak ala karuk, ir-e it woragwi sa-t tuguruk mbiriga-o.

Saul-nen tena unpuruk woragid min at ilirak nderak min wene 14:47-52

⁴⁷ Nde, Saul na Isarael nap ennggendumu nagawan woralar-e, nin me nan me Isarael nap unuwim nap oboksa inmin wim timbiril waring tenak irit woragij-o. Nde, iri-ge Moap nap min Amon nap min Erom nap min Soba nagawan nagawan min Pilisin nap min inmin wim mbarosolar-e, at-nen inmin wim mbaridnak sa-ge ar-et ombol nggwe yil nosolat woragij-o.

⁴⁸ Ar-e amawi bem umbunu bem wim mbarosolar-e, Amalek nab-e urugwe nggwe rak unpuruk, Isarael nab-e ap nden unpugwi nap ininggem-nen wisirik onposolat woragij-o.

⁴⁹ Nde, Saul ambararag-e Yonatan min Yiswi min Malkisua min, nde, ararag-e manggiya-ge Merap min imbirig-e Mikal min irir-o.

⁵⁰ Ogwe unu-ge Agimas ara Aginoam irir-o. Nde, at-nen idnak san ombo onowe-ge Net ambara Apnet irir-o. Nde, Net iri-ge Saul eid Kis min ineid iniya misik-nen nderag-o.

⁵¹ Nde, Saul iri eid Kis min Apnet eid Net min ereya-ge Abiel ambararag-o.

⁵² Saul uruk woralar-e, pempa Pilisin nap inmin mondok wim kwiye worak mbal tenak woraso me, Saul-nen yik kasoma nde ap nde enmawi worak, kwiye lak ala-ge, waga san ombo nggorak onposolat irit woragij-o.