1 SEMUEL 12 - Nanduk Ngget Tul Pidnak Wene

Yabu na Saul ebem posolat-nen Semuel-nen yak indidnak wene 12:1-25

¹ Iri luk, Semuel-nen Isarael nap oboksa yak ondosolar-e: ”An-e kit-nen nebem nggi yigep iri na ndak ndag-et kwarosolat, kit kenanggul pem nagawan misik lenak pigi-o.

² Nde yawo kuri-nen tel korogolar-e, at-nen nak lit kunpuruk nuwa-o. Yik neyer-o. Yawo-ge an-e abu indi worak me, negeren yeba na ker-o. Yenggerak purag-e, an nilirag-e abu indi worak ereba nak ker-o. An-e nusujwe bem-net lit kunpuruk nosoma, abu nindi worak yigi-o.

³ Nde, yawo an-e kit kenlengen pem mendak worasu-o. An-nen nde meya mbi kwaridnak worala-ge, Nagawan Indo min at-nen nagawan lenak pidnak nap min enlengen pem-et: ’Kar-e iri kwarigen nar-o’ luk nimbiri parer-o. An-e ap erep enarengge sapi ala na, kelerai wam ala na mbi wanoso, lak? Are, kenmberam lasolat namawi bem kenarengge mengga wanosolat, onggo wok norogola lesa wanosolat kwaroso-a? Iri nde yoso ala-ge, tuguruk uwi yageyek-nen ndak yak nerer-o” yak ondosoloma,

⁴ ap ereba na-nen onggo yogolar-e: ”Nonmbo kar-e nenmberam lasolat, kamawi bem nenarengge lesa wanosolat iri nggal-e kwaroso bug-er-o. Ap misik arengge misik mesag-er-o tet mondok wanoso bug-er-o” luk yak tiga-o.

⁵ Yogoloma, Semuel-nen yosolar-e: ”Yawo-ge Nagawan Indo min at-nen nagawan lenak pidnak min enlengen pem-et yak kundusu-o. An-nen-e meya-ge mariget mbi-ret mondok kwarigit lak irir-o” luk yij-o. Yosoloma, it-nen yogolar-e: ”Nagawan Indo erengen pem ndemeret yigen-o” luk yiga-o.

⁶ Iri luk, Semuel-nen yosolar-e: ”Nagawan Indo-net Musa min Arun min lenak unpuruk, konmborag-e Mesira-nen inmin lobok yij-o.

⁷ Nde, yawo kir-e mbururak pug-o. Nagawan Indo erengen pem wene kenpem pimin-o. Nagawan Indo-nen konmborak min kit min kenabuwa-nen kwat kinpidnak iri na-ge kir-e mondok meme rak purak pug-o.

⁸ Nde, Yakup ilirak inmin Mesira mborogola-ge, Mesira nap-nen anggun panggun tak onpogola, konmborak-nen-e yongga unduwakluk Nagawan Indo emengen mbarogola-ge, Nagawan Indo-nen-e Musa min Arun min lenak inpij-o. Iri yamu it mberen iri-nen konmborag-e Mesira-nen inmin lobok yigarik, o yu me wolmakluk yongga indiga-o.

⁹ Alat nde, abok nggwe-ge Nagawan Indo Enmbal Pem Nagawan iri na-ge meme rak piga-o. Iri yogola karuk, at-nen-e keya enpamu, Asot woraso san ombo onowe Sitera iri na min Pilisin nap min Moap nagawan min-nen-e it inmin wim mbarogolar-e, urugwe nggwe rak inpiga-o.

¹⁰ Iri yogola-ge, it meya yidnak parogolat, Nagawan Indo eram tepan yogolat-nen yogolar-e: ’Nagawan Indo wa-e. Nir-e kat keram-nen mborogolar-e, meya kwarogolat, kugwi Mbaal min Asoret min ereba na erembel wanige-t nde, yawo-ge nit nunuwim nap ininggem-nen ninmiri yi-o. Iri yosola-gen, nir-e kat nak kerembel wanogolat wulmul-o!’ luk yiga-o.

¹¹ Nde, imbirik-nen-e Nagawan Indo-nen Nggireyon lenak puruk, imbirig-e Mbarak lenak puruk, imbirig-e Yepta lenak puruk, nde, erep yoboksa-ge an lenak nibij-o. Iri yamu nit nenariktak lombok-net wim nap ininggem-nen Weserak kinpige-o. Iri yikma-ge, kir-e kona yamuksa woraigeb-o.

¹² Alat nde Amon nap nagawan Nas-nen kit kenpem kore yurak iri-ge karug-et nde, kir-e kit tena kunpuruk woraso Nagawan Indo iri na keya buruk, kit-nen yak norogolar-e: ’Nir-e nagawan-nen tena nunpuruk wolmomtak perak nindingen-o’ luk yigeb-o.

¹³ Iri yigep na-ge yawo-ge kit-nen nggi yigep nage nagawan-e yur-o. Nagawan Indo-nen wok kendamu-o.

¹⁴ Kit na irit nagawan kit tena kunpuruk wolma iri na irit kit nde Nagawan Indo kek tak pogolat, at nak ndegel obogola woragolat, at-nen yidnak wene kuluruk iri na ndak ndak kwarogolat na irit kwarogolar-e, Nagawan Indo Kenmbal Pem Nagawan-nen kenpem pidnak iri-ge mondok tugup lak kwat tenak woragola-ge, kenalen pem-et woragub-o.

¹⁵ Alat nde, kit-nen nde Nagawan Indo ene kuligit lak yogolat, at-nen kenpem pidnak na kwarigit lak ala-ge, ndemeret kit min kit-nen idnak nagawan iri min-e Nagawan Indo-nen kenpem mbud ma-o.

¹⁶ Nde, yawo-ge tuguruk kwara koler-o. Nde, kir-e Nagawan Indo-nen kenlengen pem wi yurak mende kwaruwa ereba na-ge kwara yebet kagolat wolmer-o.

¹⁷ Yawo-ge o kibi mbud yarik worasu-t nde, an-nen Nagawan Indo eram wene pil lasola-ge, at-nen erep nggarosolar-e, o nggu ngak yosolat, talme mberak pil mbuwasola, kagub-o. Iri ala, kit-nen yebet kagolar-e: ’Nit-nen nagawan misik nggi yige bem-e Nagawan Indo imin meya nggok irit kwarige-o’ luk yebet kagub-o” yak indij-o.

¹⁸ Iri yak unduruk, Semuel-nen tepan yosola-ge, iri na tarem-et Nagawan Indo-nen talme mberak posolat, o nggu rak posolat kwarij-o. Iri yosola-ge, Isarael nap oboksa-nen-e Nagawan Indo min Semuel min enaye kaiga-o.

¹⁹ Kwiye luk it-nen Semuel yak togolar-e: ”Nonmbo wa-e. Nit wat mul-o luk kat-nen yongga nondosolat Nagawan Indo Kembal Pem Nagawan emengen mbari-o. Nde, nir-e nanduk mondok meya kwarugwi-t nde, yawo tugurug-et nagawan nit nennggendumu mendak purak nggi yige iri-ge mondok meya-t kwarige-o” luk yiga-o.

²⁰ Yogola karuk, Semuel-nen onggo yosolar-e: ”Meya kwarigeb-et nde, kwiye yili-ge meyog-o. Nagawan Indo eram-nen nden karuk mbururak pug-o. Alat nde, kinndi misiget tak puruk, Nagawan Indo nak ndegel tenak wolmer-o.

²¹ Kugwiwak mondok ebe lak, urugup na lak me, yongga kondosolat, kinmiri yosolat na kwaroso buk ereba langgal luk mondok mbururak pug-o.

²² Nagawan Indo-nen owak mbarosolat-nen yosolar-e: ’Ir-e an nondomok nilirak tak inpimin-o’ luk yidnak me, at-nen-e mondok keya kunpuwa bug-o.

²³ Nde, an nondomok namanggim-e an-nen kit kenmanggim tepan yigit lak yosolat, Nagawan Indo imin meya yimin naru kwara yongga nuruwag-o. Nde, iri-nen an-nen mul kondosolar-e, ndemeret konak mot mot kwarugwi irit mirik konposolat woramin-o.

²⁴ Nagawan Indo nak kek tak pogolat, kinndi misiget tak puruk tugup lak at nak ndegel tenak wolmer-o. Nagawan Indo nen kwiye worak kenmanggim kwarid ereba-ge meme rak purak pug-o.

²⁵ Alat nde, kit-nen nde meya nag-et kwat tenak woragola-ge, kit min nagawan iri min mondok lak tak kunpuwa-o” luk yak indij-o.