1 SEMUEL 11 - Nanduk Ngget Tul Pidnak Wene

Saul-nen Amon nap urugwe nggwe rak inpidnak wene 11:1-15

¹ Nde, misik tarem-e Amon nagawn Nas iri na-nen: ”O Yabes siri narurag-o” luk at-nen idnak san ombo yak endamu, Nggileat nggweyak pem o Yabes siri iri na lop lop indiga-o. Iri yogola, Yabes woragwi nap-nen Nas yak togolar-e: ”Nab-o, ninmim kundi-o. Iri yosola-ge, nir-e kat ndegel kubugwi nap kwat yuwog-o” luk yak tij-o.

² Yogoloma, Amon nap Nas-nen onggo yosolar-e: An nde kit kinmin kondosolar-e, Isarael nap oboksa teberak konposolar-e, kenlengen kigit nggwe-ge kela mbo bimin-o” luk yak indij-o.

³ Iri yosoloma, Yabes woragwi enne kulugwi nap ereba na-nen yogolar-e: ”Ondoro tuju tarem nak wok nindi-o. Tuju ereya bem nir-e Isarael nap woragwi sa ap wirik unpul nde, it-nen ninmiri yurak nde meya nak ala-ge, nir-e kat kinggiyapma nak kegera labuk mul-o” luk yiga-o.

⁴ Iri nggal kwasa ap wirik inpikma mbirigarik, Saul woraso sa Nggibea wok yiga-o. Wok yogolat enlengen kulurak wene iri na yak ondogola-ge, inndi kabak yogolar-e, yip sa nggwa mbiga-o.

⁵ Yip til mburukmu-ge, Saul-e nggeret yapmu nggwe-nen sapi waruk lobok yosolar-e; ”Wene-ge ngge kwarag-o? Noluk ap oboksa yip tili-o?” yosoloma, Yabes-nen wene waruk pil lobok yiga nap-nen yiga wene ereba na yak tiga-o.

⁶ Yak togola, kolosolar-e, Nagawan Indo Indi-ge Saul ebem wok yosolar-e,

⁷ isilepma mondok kwarat yosolar-e, sapi mberen ereya na-ge mbarep parepsa mbara ligik purug-e, mbarak ereba na Isarael nap oboksa endam wirik posolat-nen yosolar-e; ”Ta-nen nde an min Semuel min ninmin wim timbiril mbirigit lak ala-ge, it ensapi wam-e iniksa mbara ligik pimin-o” luk yij-o. Yosoloma-ge, Isarael nab-e ap oboksa-nen Nagawan Indo nen kwat unpuwa iri na kwiye rak purug-e, wim timbiril mburuwakluk inndi misiget yiga-o.

⁸ Nde, it ereba na Saul-nen o Mbesek iri me-nen ndok worak unpuruk, wonat inpidnggal-e Isarael nab-e tiga ratus ribu (300.000), nde, Yewura nab-e tiga pulu ribu (30.000) irit wonat inpij-o.

⁹ Nde, it-nen Yabes-nen yonggo wirik ibil lobok yiga nap ereba na yak ondogolar-e: ”Yabes woragwi nab-e yu yak indi-o: ’Kub-e mo lenggesilmu yekluk yosola ereya bem-e kinmiri yurak worasu-o’ luk yak undurag-o” luk yak indikma-o. Yak ondogola kulurug-e, mondok enalen kwarat yiga-o.

¹⁰ Enalen luk Nas yak togolar-e: ”Kub-et nir-e kat kinggiyapma kegera labuk mul me, kat-nen kwat nunpurak yigen ereba-ge kwat nunpurag-o” luk yak tiga-o.

¹¹ Nde, kup o nda yosola-ge, Saul-nen-e at nap ereba na-ge menggesa kere kenan tak puruk, o nggeret kil posola-ge, Amon nap unuwi bem mbud yigarik o nariga-o. Iri yogolar-e, Saul-nen idnak san ombo-nen Amon nab-e urugwe nggwe rak inpiga-o. Nde, mengga ndibi ndi yiga nab-e mberen lombok-nen mbi mondok mbirigit lag o.

¹² Iri rak puruk Isarael nap-nen Semuel yak togolar-e: ”Kwiye lag-et yogolat: ’Saul nggal-nen nit nenanggul pem nagawan yurag-e ndag-a?’ luk yiga nap yeba na-ge ngge me worali-o? Nab-o. Mondok unduwok-nen wok nindi-o” luk yiga-o.

¹³ Alat nde, Saul-nen yosolar-e; ”O yawo-ge Nagawan Indo-nen Isarael nap inmiri yidnak tarem me, yawo yu tarem-e ap mondok undurak pug-o” luk yij-o.

¹⁴ Yosoloma, Semuel-nen it yak ondosolar-e; ”Naptag-o. Nggilnggal mburulndik Saul iri na mondok ar-er-o luk watsa nagawan mendak puwog-o” luk yak indij-o.

¹⁵ Iri luk it oboksa Nggilnggal mbirigarik, Nagawan Indo erembel wanugwi sa iri me-nen-e Saul na tuguruk ar-er-o luk watsa nagawan mendak ibiga-o. Iri lug-e, it lambuk yogolat-nen Nagawan Indo amanggim wam wosa kan purug-e, Saul min Isarael nap oboksa min-e enalin enalen yogolat nggok saiga-o.