1 SEMUEL 10 - Nanduk Ngget Tul Pidnak Wene

¹ Iri luk Semuel-nen saitun engen amburu kenanggo mbi wanosolar-e, amburu iri na-ge Saul anggul pem kilik pij-o. Iri rak puruk Saul erabengen porok nasolat-nen yak tosolar-e: ’Kar-e Nagawan Indo-nen at ilirak ennggendumu nagawan woranokluk amburu kanggul pem kilik puruk mendak kubusu-o. Kar-e Nagawan Indo ilirak tena unpuruk woralat, it unuwim nap oboksa ininggem-nen inmiri yosolat woragun-o. Nde, kat-nen: ’An-e ndemeret Nagawan Indo-net at ilirak tena unpuruk wolmakluk mendak nebamu-o’ luk yenggerak pugun-e yu bem-nen-o:

² Yanem an neram yu me-nen mborosoma-ge, Arakel yapma bidnak sa o Selsa Mbenyamin nap onnggweyak pem iri me ap mberen inmin lid pid yugun-o. Nde, it-nen yu nggal yak kuruwa-o: ”Kelerai wam lak yid kat-nen kore yigen ereba na-ge karik woralat, yawo-ge keij-e kelerai warn pem umud kasu bug-o. Alat nde, yawo-ge kat kebem nde umud kundugu worasolar-e: Nambara iri-ge ngge kwasa-nen kamin-o? kin wok tenak worasu-o’ luk yak kuruwa-o” yak tij-o.

³ Yak turuk, Semuel-nen tuguruk yak tosolar-e: ”Iri me-nen mburugundig-e e erembel wanugwi iri na Tabot iri me elem pem wok yosoma-ge, ap kenan-e Mbal Pem Nagawan amanggim wosa burak Mbetel mburukmu, lid pid yugun-o. Nde, ap misig-e kambing marik kenan ndogoluk, nde, ap misig-e oroti wora kenan waruk, nde, ap misig-e yimbe arem anggut engen amburu kenanggo waruk lobok yukmu eneyagun-o.

⁴ Nde, it-nen-e wa yak kutluk, oroti mberen wok kuruwa-o. Wok korogola-ge, kar-e mondok wanugun-o.

⁵ Iri lug-e, kar-e Mbal Pem Nagawan ondobo Pilisin nap o sare wutluk worali sa Nggibea iri me-t wok yugun-o. Nde, o silmu nggugwi sa pak tumende bem Mbal Pem Nagawan ene lomboksa Yugwi nap kere misik Mbal Pem Nagawan amanggim wam wosa pugwi ndobo iri na bem-nen mbuwagolat, it-nen ndawi yogolat enne rak pugwi mende poba enne rak pil pil, enne nggoksa yogolat, ndawi bem kot kil mbuwakmu, inmin lid pid yugun-o.

⁶ Nde, ereya na-net Nagawan Indo Indi kebem wok yosolar-e, kat min-et it-nen kwatli nggal kot kasolat, kene nggoksa ndawi yugun-o. Iri yosolar-e, kat kabage nin wok korosola, ap nin irit kwat yugun-o.

⁷ Nde, kat-nen yenggerak purak mende ereba na oboksa kasolug-e, Mbal Pem Nagawan-e kimin worala me, kat-nen nde kwarurak ala-ge, kwarurak nag-o

⁸ Iri lug-e, kar-e Nggilnggal mburugundik, kar-e an yik neyarok tuju bem woragun-o. Nde, Mbal Pem Nagawan amanggim wam wosa kan posolat, at imin kundurak pem wam wosa posolat kwarurak an lobok yimindik-nen-e kat-nen mondok kwarosolat wolmomtak wene-ge mirik kibimin-o” luk yak tij-o.

⁹ Yak tosoloma, Saul na Semuel eram-nen mborosoma ereya na-net Mbal Pem Nagawan-nen abage ngget irit wok tij-o. Nde, Semuel-nen yak tid ereba na-ge oboksa ndemeret iri na tarem-et kwat yij-o.

¹⁰ Nde, Saul na-ge ndegel oboso nap iri na imin-e mbirigarik, o Nggibea wok yukmu-ge, Mbal Pem Nagawan ene lomboksa yugwi nap kere misik inmin lid pid yiga-o. Iri yukmu Mbal Pem Nagawan Indi-ge Saul iri na ebem wok yosolar-e, Saul na-ge Mbal Pem Nagawan ene lomboksa yugwi nap ereba na inmin ndawi kot kasolat, ene nggoksa yij-o.

¹¹ Nde, iri yogola-ge, at Saul abage woraso enaru nap-nen at-nen kwarusu iri na karuk-nen yak kerak mbogolar-e: ”Kis ambara yu-ge yawo-ge no ebem wok yij-o? Saul tet Mbal Pem Nagawan ene lomboksa yoso nap kwat yarik, lak? luk yiga-o.

¹² Yogola karuk, ap misik iri me woraso nap misik-nen kin wok onposolar-e: ”Mbal Pem Nagawan ene lomboksa yugwi nap erep yeba-ge kit kinndi-nen-e ineidtag-e tarag-o luk perali-o?” yij-o. Iri yid iri bem-nen wene ijambo yogolar-e: ”Saul min-et Mbal Pem Nagawan ene lomboksa yoso nap kwat yij-a?” luk yugwi-o.

¹³ Saul na ene nggoksa ndawi yosolat, kot karug-e Mbal Pem Nagawan amanggim kan pugwi sa ndobo bem eid na me mbirij-o.

¹⁴ Mborosoma-ge, Saul na eid misik iri-nen Saul min ndegel oboso nap iri na min eneyaruk, kin wok onposolar-e: ”Kir-e ngge me-nen lobok yili-o?” yosoloma, Saul-nen yosolar-e; ”Nir-e kelarai wam lak yidnak ereba na kore yige-t nde, lak ala karuk, Samuel eram mbirigerig-o” luk yij-o.

¹⁵ Yosoloma, at iri na-nen kin wok obosolar-e: ”Semuel-nen-e no yak kindij-o?” luk kin wanij-o.

¹⁶ Kin wanosoloma, Saul-nen onggo yosolar-e, kelerai wam lak yid ereba na-ge kaigarik worali-o yak tid iri na-ge yosolar-et nde, Semuel-nen at nagawan tak obosolat amburu anggul pem kilik pid iri na-ge eid misik iri na yak tigit lag-o.

Saul na lena nagawan mendak ibidnak wene 10:17-27

¹⁷ Nde, Semuel-nen Isarael nap oboksa o Mispa iri me nak ndok wuruwakluk yonggo unpuruk-nen

¹⁸ it yak ondosolar-e; ”Isarael nap Enmbal Pem Nagawan Nagawan Indo-nen yij-e yu-o: ’An-nen-e kir-e Mesira nap ininggiyapma-nen wisirik kunpuruk, Mesira-nen wok kunpuruk lobok yigi-o. Iri-nen enlem nin nap ininggiyapma-nen na wisirig-et kinpigi-o.

¹⁹ An-nen-e kit yane wurugwi min andi bandi kagwi min oboksa arem-nen wisirik konposo-t nde, kit yawo-ge an-nen nagawan misik kennggendumu lenak purak nggi yak norogolat, Kenmbal Pem Nagawan an-e keya nibili-o. Iri ala ge, ob-o. Yawo-ge kit-nen idnak Nagawan Indo an neram kenlem lombok ndok werer-o’ yij-o” luk yak indij-o.

²⁰ Yosoloma, Semuel-nen-e: ”Kenlem lombok lobok yer-o” yak ondosola, lobok yogolar-e, Nagawan Indo-nen-e enlem Mbenyamin len ibij-o.

²¹ Iri ala, enlem Mbenyamin arem-nen ap suwon lombok lobok yukmu-ge, ap suwon Matiri len ibij-o. Iri ala Matiri arem-nen ap nak lobok yukmu-ge, Kis ambara Saul len obosola karug-e, Saul ogore yiga-t nde, kagit Iago.

²² Lak ala-ge, it-nen Nagawan Indo kin wanogolar-e: ”Nagawan Indo wa-e. Ap iri-ge yu me worasu, lak?” luk kin wanukmu-ge, Nagawan Indo-nen yosolar-e: ”At iri-ge silobulo ombol nggwe kurak yarik worasu irir-o” luk yak indij-o.

²³ Yosoloma, pong kil mbirigarik, Saul na Isarael nap ennggendumu waruk lobok yiga-o. Iri yogola, Saul na it ennggendumu men yidnggal-e Saul na-ge mondok mot-nen ap erep enanggul-e endakmbe kuri nak irit kaiga-o.

²⁴ Iri luk, Semuel-nen ap ereba na yak ondosolar-e: ”Nagawan Indo-nen lenak pidnak nab-e yur-o. At yu nggal-e nit oboksa nennggendumu mbi worasu bug-o” luk yosoloma-ge, ap oboksa-nen enne nggoksa leksa yogolar-e; ”Nagawan irit wolmag-o!” luk yiga-o.

²⁵ Iri rak purug-e, Semuel-nen-e nagawan iri-nen mot mot kwarosolat wolmomtak wene min at-nen kwarurak yabu min ereba na mbenasa ap ereba na mul undurug-e, wene ereba na-ge engga misik pem mbarak puruk, engga iri na-ge Mbal Pem Nagawan ama o mondok marak iri na me ndok worak pij-o. Iri rak purug-e, Semuel-nen-e: ”Yawo-ge kenmarak ndi yer-o” yak ondosola, ndi yiga-o.

²⁶ Iri yogola, Saul na ama Nggibea mborosola-ge, ap Nagawan Indo-nen enarem yabu wanosola, kwiye lak nap enmawi worak nap erep-nen inmin tak puruk mbiriga-o.

²⁷ Alat nde, meya yugwi nap erep-nen yogolar-e: ”Nit ninmiri yurak nab-e ab-e yu nggal-er-a?” yogolar-e, at te rak obogolar-e nagawan we wok undugwi mende-ge wok tigit lak yiga-t nde, ar-e aru buk nggal irit larok yij-o.