1 SEMUEL 1 - Nanduk Ngget Tul Pidnak Wene

1 Semuel Elkana ogwela inmin-e o Silo woraiga wene 1:1-8

¹ Elem ”Eperaim nap ap misik” unu-ge Elkana woragij-o. Ndobo worak Eperaim iri me o Arama iri me-t woragij-o. Nde, Elkana iri-ge ap Sup-nen wigarak, Tou-nen ndagid, Eliu iri na ambara Yeroam iri na ambara-o.

² Nde, Elkana ogwerak mberen unnu-ge Ana min Penina min woraiga-o. Nde, Penina iri-ge elirak worag et nde, Ana iri-ge la-ge lag-o.

³ Elkana na-ge pempa olengen ndak wosa Nagawan Indo Amawi Worak iri na erembel wanosolat amanggim wam wosa purak pem Arama-nen o Silo mborosolat woraso-o. Nde, o Silo iri me-ge Nagawan Indo nen idnak tepan ombo-ge Eli ambararak Opni min Pineas min irit woraiga-o.

⁴ Pempa Elkana-nen nde wam Nagawan Indo amanggim wosa purug-e, Penina elirak inmin-e wam wosa pidnak ereba na uno-ge enambiktak inlit wosa wok ondoso-o.

⁵ Nde, Ana-ge Nagawan Indo-nen la wok tigit lak me, wam uno wok tidnag-e ebe misiget me, mariget nggal yik kasolat woragij-o. Ana iri na-ge la-ge lag-et nde, Elkana-nen-e indi kundik irit woragij-o.

⁶ Ana na-ge Nagawan Indo-nen la wok tigit lak ala karuk, at anggam kwe Penina iri-nen-e teberak obosolat, indi andi bandi rak obosolat woragij-o.

⁷ Iri nggal kwarogolar-e, pempa olengen ndak wosa Nagawan Indo ama mbutlug-e, Penina-nen-e pempa Ana-ge indi andi bandi rak obosolat worala-ge, Ana-ge pesel ibidnak pem-e emnde ninggit lak, yip nak tosolat woraso-o.

⁸ Iri yosola karuk, Elkana-nen-e pempa ogwe Ana iri na kin wok obosolar-e: ”Kar-e noluk-nen pempa yip tenak worasu-o? Kar-e noluk nen norak keya buruk kindi puru rak nak worasu-o? Kambararak sepulu ndakun-et nde, ereya-nen-e kindi yamuk tak puwa-ge lag-o. Nde, an kat kimin worasu yu-ge terak minik nggok-nen yusu-o” luk yak toso-o.

Ana min Eli min-nen kwaridnak wene 1:9-18

^9-10 Nde misik tarem-e Nagawan Indo ama o Silo iri me-nen nunggwi mende nurug-e, Ana iri na-ge nunggwi sa-nen men yij-o. Nde, iri tarem-e tepan ombo Eli na-ge at koreyak woraso ondoro iri na bem Nagawan Indo ama iri me tumende manda koreyak woragij-o. Worala-ge, Ana iri na-ge indi puru luk, yib-e kondok lud yosolat-nen Nagawan Indo eram tepan yij-o.

¹¹ Iri yosolat-nen Ana-nen urul posolar-e: ”Nagawan Indo Kamawi Worak wa-e. Ndegel koboso kwe an-e kwara yebet niyi-o. Ndegel koboso kwe an-e meme rak nuburak pug-o. An-nen nindi andi kasu-ge kat-nen ki-o. Kat-nen nde liap misik wok nurugunmu-ge, mondok abu abu wok kurumu kat kimin-et pempa wolma-o. Nde, anggulsu-ge mbarigit lak irit wolma-o” lul urul yak tij-o.

¹² Iri nggal kwasa Ana-nen Nagawan Indo emengen mbarosolat tepan mondok lit karuk mborosola-ge, Eli-nen-e Ana emnde lombot posolat woragij-o.

¹³ Nde, Ana-nen tepan yosolar-e, arem nak-nen emnde lumuk lumuk nak yosola, ene lak ala karuk, Eli-nen perasolar-e: ”Kwe yu-ge indi nden kaso yi nenggarik-nen yusu, lak?” luk peragij-o.

¹⁴ Peraruk-nen Eli-nen yak tosolar-e: ”Kar-e yu me-net nde indi nden kaso yi nuruk, kasa kasa yusu-ge meyog-o! Tugurug-e anggut engen amburu-ge mondok norak pug-o!” luk yak tij-o.

¹⁵ Yosoloma, Ana-nen onggo yak tosolar-e: ”Nab-o. An-e indi nden kaso yi ninggirik-nen nindi lak lak yusu-ge Iago. An-e anggut amburu-ge mondok ninggit lag-o. An-nen nindi puru bera worasu wene ereba na tepan yosolat Nagawan lndo yak tusu-o.

¹⁶ An-e we torak noso kwe-o luk neberasu meyog-o. An tepan yu nggal yusu yu-ge an-e mondok nindi puru kwarat yosolat-nen yusu-o” luk yak tij-o.

¹⁷ Yosoloma, Eli-nen yak tosolar-e: ”Iri ala-ge, Isarael nap-nen erembel wanugwi Mbal Pam Nagawan-nen-e kat nggi yigen irit wok kuruwag-o. Nde, kar-e kindi yamuksa mbiri-o” yak tij-o.

¹⁸ Yak tosoloma, Ana-nen onggo yak tosolar-e: ”Nab-o. Kat-nen nabuwa kanog-o” luk, Ana na-ge mberarig-e, nunggwi mende-ge kwara nasolat, indi puru yoso iri na-ge lak irit woragij-o.

Semuel ndaguruk Nagawan Indo wok tidnak wene 1:19-28

¹⁹ Nde, kub-e Elkana ogwela inmin-e kuplila men yogolar-e, Nagawan Indo erembel wanurug-e, tuguruk enma Arama mbiriga-o. Mbirigarik woragolar-e, Elkana-nen ogwe Ana iri na imin nene yosola-ge, Ana-nen tepan yid iri na Nagawan Indo-nen ene erep nggarosolar-e,

²⁰ Ana iri na-ge abila lug-e, liap misik ndagij-o. Ndaguruk unu yarosolar-e: ”La yu-ge an-nen Nagawan Indo ebem nggi yigi-o” yosolar-e, unu-ge Semuel irit yarij-o.

²¹ Woraruk olengen misik arem-e Elkana iri na ogwela inmin-nen Nagawan Indo amanggim wam wosa purak o Silo mbururak tarem panggo yosola-ge, nde, misig-e Elkana-nen Nagawan Indo amanggim purak urul pid iri na purak tarem iri na min-et panggo yij-o.

²² Alat nde, iri tarem-e Ana na-ge inmin mbirigit lag-o. Iri yosolat-nen un yak tosolar-e: ”An-e la Semuel yu kamo mbarak puruk-nen perak la yu Nagawan Indo ama pem wolmakluk abu abu pil mborosolat iri-nen perak mbirimin-o” yak tij-o.

²³ Yosoloma, Elkana-nen onggo yosolar-e: ”Iri ala-ge ob-o. Kat-nen yik kasoma nde konak ala-ge kwarurak nag-o. Kar-e yeba-t worasoma, la kamo mbarak purak tarem ndak mag-o. Nde, Nagawan Indo-nen kat-nen urul pigen iri na-ge ebe kwarak puwag-o” yak tosoloma-ge, Ana na-ge o ma iri na-t worasoma, la iri na kamo mbarak purak panggo yij-o.

²⁴ Nde, Semuel na kamo pok tak purug-e, ija-nen waruk Nagawan Indo, ama o Silo pil mbirij-o. Nde, iri tarem-e Semuel-e mondok marik komosa bem-et pil mbirij-o. Iri tarem-e Ana-nen-e sapi kusi olengen kenan woraidnak iri min nggandum mbato yigirik angin sepulu kilo min wam aboro-nen konidnak yimbe anggut engen amburu kobongsa kenanggo misik min-et waruk mbirij-o.

²⁵ Sapi iri na mbatlug-e, la Semuel iri na min-et Eli eram pil mbiriga-o.

²⁶ Eram pil mborosolat-nen Ana-nen Eli yak tosolar-e: ”Nab-o. Kar-e an yenggerak nubusu, lak? An-e Nagawan Indo eram tepan yosolat yu me mendak woragi kwe iri na-net yusu-o.

²⁷ Nagawan Indo ebem nggi yigi na-ge nene kuluruk, la wok nirij-e yur-o.

²⁸ Iri bem-e la yu-ge pempa Nagawan Indo amanggim nak lenak wolmakluk an-nen-e at eram kegera pusu-o” yak tij-o. Yak turug-e, it-nen Nagawan Indo erembel waniga-o.