1 PETERUS 3 - Nanduk Ngget Tul Pidnak WeneUn min ogwe kwarogolat momtak wene 3:1-7 1-2 Kununtak worak kwami wa-e. Iri nggal-et kir-e kununtak enne nak kologolat wolmer-o. Iri kwarogola-ge, it erep-nen-e Mbal Pem Nagawan-nen yidnak yidnak wene bem inndi angin tubu yigit lak mbi woragola-ge, kit-nen konak kwarogola karuk, inndi angin tubu yuwa-o. It-nen yik kiniyujwa nggal, kenpage marak, mot mot nak kwarugwi me, kit-nen wene mbi yak undugup pug-o. 3 Kit-nen-e kwe erare op nggal teyeg-o luk, kenaboro ombol nggwe nak konogolar-e, kenanggulsu lara simo berek yaga pogolat, tangge konak yorogolat, sum na konak nak yorogolat wolmomtak pug-o. 4 Are, kinndi kigirik wolmomtak iri-ge kinndi arem nak-nen mburuwag-o. Nde iri-ge pem-et wolmomtak indi yamanak, yamuksa woragwi indi iri-ge Mbal Pem Nagawan erengen pem-e onggo nggulok mende-nen yusu-o. 5 Iri nggal-et nandug-e Mbal Pem Nagawan indi aye kagwi kwami, inndi-ge Mbal Pem Nagawan ebem mbung mbung tak woragwi kwami-nen-e it na it-net enpage kigiridnak nggal-e it ununtak-nen yidnak yidnak nak kwariga-o. 6 Iri nggal-et Sara-nen na Abaram-nen yidnak yidnak kwarosolat, at imin-e ”Nagawan wa-e” luk yak toso-o. Nde, kit-nen-e konak nak kwarogolat, yi aye ndi aye kagwi buk ala-ge, kir-e Sara iligwami-nen yili-o. 7 Konkwe la worak nap wa-e. Iri nggal-et kit na konkwe la inmin woragolar-e, kwami yu-ge ndeyak-net yili-o enperaruk, Mbal Pem Nagawan-nen we wok ondoso unlug-et woralik nalik momtak elem iri-ge konkwe la inmin-et lambuksa winde rak kunpuwa me, kwara enabuwa kagolat wolmer-o. Iri kwarugup ala-ge, kit-nen tepan yugub-e abi sud mud yuwa bug-o. Lud tak nak kwaridnak pem andi bandi kagwi wene 3:8-22 8 Yu yosolat-nen yigi-o: Kit pidsa-ge kinndi misiget, yebet kagwi na misiget wolmer-o. Kit na kit-net nabuwa kabuwa yogolat, kunmud pegerak mbogolat, kennggam min kinndi teberak pem-et woragup na-e. 9 Mbal Pem Nagawan-nen wene mbo kinpid iri-ge, at-nen idnak imbiringgat mende wok kendeyekluk wene mbo kinpidnak me, ap-nen meya rak konpogola, onggo it meya rak unpurak pug-o. Ap-nen meya wene yak kondogola, onggo meya wene yak undurak pug-o. Are, inmbiringgat tak enper-o. 10 Mbal Pem Nagawan engga bem-nen yosolar-e: ”Ta-nen nde nalen min-et neyaruk woralat, konag-et worayeg-o peraidnak nap-nen-e meya wene min enesiget wene min yimin naru, emnde nggitlik puruk wolmag-o. 11 Meya mende keya buruk, konak nak kwarosolat wolmag-o. Lambuksa wolmomtak elem kore yosolat, amawi kunduwag-o. 12 Nagawan Indo erengen-e lud tak nak kwarugwi nap enpem kundugu woralar-e, eyanggo na it-nen tepan yidnak ambigit palak worasu-o. Alat nde, Nagawan Indo-ge meya nak kwarugwi nab-e erengen labi mbal unpusu-o” luk yij-o. 13 Kit-nen konak nak kwarurak kinndi worala-ge, ta-nen meya rak kunpuwa-o? 14 Alat nde, kir-e konak nak kwaridnak pem andi bandi kagub-et nde, kir-e imbiringgat-nen yili-o! Nde, kit-nen-e ap enaye kagolat, kinndi kabak yogolat yurak pug-o. 15 Are, kit kinndi arem-nen-e Kerisut na kek tak pogolat, kit-nen idnak Nagawan Indo rak pogolat wolmer-o. Ap-nen-e: ”Kir-e no bem kinndi mbung mbung tak worali-o?” luk kin wok konpogola, wene na onggo yak undurak pem kir-e lid lud tak puruk wolmer-o. 16 Alat nde, kinndi yanggonak, teberak pem-net kit kinndi mbek tak woragolat-nen wene onggo yurag-o. Iri kwarogola-ge, kir-e Kerisut ebem woragolat-nen konak nak kwarugwi me, kit konpok pili nap na innggiri ma-o. 17 Mbal Pem Nagawan indi-n pidnak pem kit-nen konak nak kwarogola-nen andi bandi kagup iri-ge ob-o. Nde, kit-nen meya yidnak pem andi bandi kudtak iri-ge meya-o. 18 Nde, Kerisut na irit, ap-nen meya yidnak pem mondok misik tarem-et ap pidsa enmanggim wat yij-o. Lud tak nak kwaroso nab-e lud tak nak kwarugwi buk nap enmanggim wat yosolar-e, Mbal Pem Nagawan eram lit nunpuruk mbereyekluk wat yamu-o. Nde, ki nap enpage worak iri na wiriga-t nde, indi irit uruk tak pij-o. 19 At abage iri nggal kwarak-net at na mberarig-e, wat yidnak nap inndi o kubu we woraidnak pidsa aid wene yak indil waring kagaij-o. 20 Inndi aid wene yak indid iri-ge Nu woragaid tarem-nen Mbal Pem Nagawan-nen yidnak yidnak kwarigit lak yiga inndi-o. Nde, Nu-nen e koma na worosola, Mbal Pem Nagawan-e indi luruk puruk woragaij-o. Yi kobong yil lagaij-et nde, e koma na arem-e enpe wonarak delapan nak inmiri yij-o. 21 Nde, yi lagaid iri-ge yawo yi ma konpogola kinmiri yusu iri ut mimirik-nen yusu-o. Yi ma kinpili yu-ge kenaboro kusimin mat makluk-nen yi ma kinpili-ge lag-o. Are, kinndi konak mbek tak pem Mbal Pem Nagawan imin kondogolat urul yak tigep iri bem-nen kinmiri yusu iri-ge Yesus Kerisut uruk agaid na bem-net kinmiri yusu-o. 22 Yesus Kerisut iri-ge aid arem lagarik, yawo-ge Mbal Pem Nagawan inggi kigit nggwe koreyak woralar-e, aid nap min aid arem pemerinta min amawi worak mende pidsa-ge at nak-nen tena worasu-o. |
@LAI 1992, 1994
Indonesian Bible Society