1 KORINTUS 8 - Nanduk Ngget Tul Pidnak Wene

Kugiwak amanggim pidnak nunggwi mende 8:1-13

¹ Nde, yawo-ge kugiwak amanggim pidnak nunggwi mende wene yimin-o. ”Nit pidsa ninndi worag-o” yugwi iri-ge nir-e nenaru-o. Iri nggal yogolar-e, ap enambik-nen kek yili-o. Alat nde, ap enabuwa kagwi elem iri-nen-e inndi tugup lak tak onposo-o.

² Ap misik-nen perasolar-e: ”An-e yi elem ndi elem naru-o” luk perasu nab-e at-nen aru momtak mende iri-ge mondok aru buk-net nde yusu-o.

³ Alat nde, ta-nen Mbal Pem Nagawan abuwa kasu nab-e, Mbal Pem Nagawan-nen at na aru yusu-o.

⁴ Iri ala-ge, kugiwak amanggim pidnak nunggwi mende nunggwi wene-ge yu nggal-o: Kugi min Mbal Pem Nagawan misik min-e nggweyak yu me-ge mondok lag-o luk nenaru-o. Arig-et nak woraso Mbal Pem Nagawan iri nak nenaru-o.

⁵ Nde, mbal pem-nen na, nggweyak ma-nen na, Mbal Pem Nagawan nggal erembel wanugwi kugi worala-ge, iri mende Mbal Pem Nagawan nggal erembel wanugwi kugi min kugi nagawan min ndemeret kwarat worala-t nde,

⁶ nit nenmanggim-e Nineid Mbal Pem Nagawan misiget nak, yi mende ndi mende pidsa ndak wirid nap, at ariget nak worasu me, at amanggim-e nir-e worali-o. Nde, nit nenmanggim-e Nagawan Indo misiget nak, Yesus Kerisut iri-ge yi mende ndi mende pidsa ndak wirid nap at ebem-et nir-e worali-o.

⁷ Alat nde, wene yu-ge ap pidsa-nen-e enaru-ge lag-o. Ap ereb-e kugiwak pempa tena woragolar-e, yawo na nunggwi mende na nonggolar-e: ”Yu-ge ndemeret kugiwak amanggim pidnag-o” luk peragolar-e, it inndi-nen yebet kagwi-ge ndeyak me, kopkap tobok tak pili-o.

⁸ Nde, nunggwi mende iri-nen Mbal Pem Nagawan eram panggo rak nonposo bug-o. Nir-e ninggit lak ala, marak mul-e lag-o. Nde, nonggolat na terak mena nggok mul-e lag-o.

⁹ Alat nde, kit weserak kinpidnak pem kwarugup iri-nen-e ndeyak yidnak nap iri enare pugup naru, kinndi kwara wolmer-o.

¹⁰ Kat karu yidnak nap na-net nde, kugiwak uwi worak ma-nen nunggwi mende nasola keyaruk, at indi lubuk nap mbi-nen yik kiyujwanggal-e, ”An-nen na kugiwak amanggim pidnak nunggwi mende namin-o” luk arem puwa iri kali bug-a?

¹¹ Iri nggal kwarugun pem Kerisut na at na amanggim wat yidnak nap, kanggam indi lubuk nap iri-ge kat karu yidnak pem-net are pugun-o.

¹² Iri nggal kwarosolar-e, kat kanggamirak meya rak onposolar-e, it inndi lubuk yidnak iri-ge inndi kalak pusu iri-ge Kerisut-et meya rak ubusu-o.

¹³ Iri bem-e, nunggwi mende iri-nen an nanggam iri are purak ala karuk, an nanggam iri-ge are pimin naru, ino-ge abok na abok na namin pug-o.