1 KORINTUS 7 - Nanduk Ngget Tul Pidnak Wene

Wok kerak mbugwi wene 7:1-16

¹ Kit-nen engga mbarak pem kin wok nibigep wene iri na yawo-nen onggo yak kendeyeg-o. Ap-nen kwe wanigit lak wolmomtag-e ob-o.

² Alat nde, mbabi yul naru, ap-nen-e enambik tak onkwe wanogolat, kweyap-nen-e enambik tak unun wanogolat mag-o.

³ Un-nen kwaroso mende-ge ogwe kwat obosolat, nde, ogwe-nen kwaroso mende-ge un kwat obosolat mag-o.

⁴ Ogwe ebe-ge at winde-ge lag-o. Are, un arengge-nen yusu-o. Nde, iri nggal-et un ebe-ge at winde-ge lag-o. Ogwe arengge-nen yusu-o.

⁵ Kir-e inmin nene yugwi iri bem-e yuk puk yurak pug-o. Nde, kit kenmberek wene mbarogolar-e: ”Tepan yogolat wolmok-nen-o” yuruk, iri kwarurak na keya buruk, tepan yurag-o. Yurug-e, kit kondomok-nen mamak purag-e meya me, Sere-nen kinndi ngaruwa naru, kenmberek lambuk yurag-o.

⁶ Yak kundusu yu-ge ”Irit kwarurag-o” luk watsa yak kundusu-ge lag-o. Are, we wal kudtak pem-nen yak kundusu-o.

⁷ Ap pidsa-nen an worasu nggal wolmomtag-e ob-et nde, Mbal Pem Nagawan-nen we wok ondoso mende-ge enarik tak wok ondoso me, nin nap-nen-e nin nggal kwarosolat, nin nap-nen-e nin nggal kwarosolat kwarugwi-o.

⁸ Nde, it terak suwe min togwe min an-nen yak endeyeg-o: Kir-e an worasu nggal wolmomtak na ob-er-o.

⁹ Alat nde, kit kondomok kinndi marak puruk wolmomtak meya ala-ge, kwe wanilik, ap wanilik, wok kerak mburag-e mondok konag-o. Nde, kit-nen ukwe ukwe yugwi mende iri-nen pak kunpurag-e meya-o.

¹⁰ It abu wok kerak mbidnak iri-ge an-nen wene yu-ge namawi min-et yak undusu-o. Nde, an-nen yusu-ge lag-o. Nagawan Indo-nen yak undusu-o: ogwe-nen un keya burag-e mondok lag-o.

¹¹ Un na keya bosola-ge, mondok pempa we terak irit wolmag-o. Are, un min lambuk yuwag-o. Nde, un-nen na ogwe mondok keya burak pug-o.

¹² Nde, it ap erep iri-ge Nagawan Indo-nen yak undusu-ge lag-o. An-net yak undusu-o: indi angin tubu yidnak nap misik ogwe-ge indi angin tubu yigit lak kwe-t nde, ap iri imin lambuksa wolmomtag-e indingen ala-ge, un-nen-e ogwe iri keya burak pug-o.

¹³ Nde, kwe-nen na at un indi angin tubu yigit lak nab-et nde, ogwe na imin lambuksa wolmomtag-e indingen ala-ge, kwe iri na-nen-e un keya burak pug-o.

¹⁴ Un indi angin tubu yigit lak iri-ge at ogwe min lambuksa woraidnak pem-e Mbal Pem Nagawan-nen-e mbek tak pidnak irit kasu-o. Nde, ogwe indi angin tubu yigit lak iri-ge at un imin lambuksa woraidnak pem-e Mbal Pem Nagawan-nen-e mbek tak pidnag-et kasu-o. Iri kwarigit lak nggal-e it inlirag-e kopkap tobok ak nde yeleb-o. Nde, yawo-nen-e ir-e mbek tak inpidnak-nen yili-o.

¹⁵ Alat nde, un ala na, ogwe ala na, at indi angin tubu yigit lak iri-nen-e at indi angin tubu yidnak iri keya burak indi wok yosola-ge, keya-t puwa-o. Iri nggal kwarak ala-ge, indi angin tubu yoso iri-ge un ala na, ogwe ala na, at iri imin kamarak ibidnag-e lag-o. Kir-e yamuksa woraboklug-e Mbal Pem Nagawan-nen yonggo kinpij-o.

¹⁶ Kun worak kwe wa-e. Kat kun iri kat-nen imiri yugun, lak? Nde, ogwe worak nap wa-e. Kat kogwe iri kat-nen imiri yugun, lak?

Wene mbo kinpidnak iri na bem-et wolmomtak wene 7:17-40

¹⁷ Ap pidsa-ge Nagawan Indo-nen it wolmomtak wok indidnak iri na bem-et woragolat, Mbal Pem Nagawan-nen wene mbo inpidnak iri na bem-et woragolat mag-o. ”Irit kwasa wolmer-o” luk an-nen-e lambuk tak inpidnak nap oboksa yak undusu-o.

¹⁸ Nde, Mbal Pem Nagawan-nen wene mbo bosola tarem, iye ambasap wabidnak worala-ge, wabidnak iri lak tak purak pug-o. Nde, Mbal Pem Nagawan-nen wene mbo bosola tarem, iye ambasap wabigit lak worala-ge, at na iye ambasap waburak pug-o.

¹⁹ Iniye ambasap wabugwi min wabugwi buk min iri-ge ija-ge lag-o. Are, Mbal Pem Nagawan-nen ”Irit kwaru-o” yidnak iri na-t yidnak yidnak kwarurak iri perak nggulog-o.

²⁰ Enambiktak-net Mbal Pem Nagawan-nen wene mbo inpidnak tarem enpage iri na bem-et wolmomtak ob-o.

²¹ Mbal Pem Nagawan-nen wene mbo kobosola, kar-e onggo lak we irit ndegel onposo nap woraigen-a? Kindisem wolmin-o. Alat nde, weserak kuburak tarem wok yosola-ge, weserak kuburak ob-er-o.

²² Ta-nen nde onggo lak we irit ap ndegel onposo nap worasoma, Nagawan Indo-nen wene mbo ibidnak ala-ge, at iri-ge Nagawan Indo-nen idnak wisirik nap-nen yusu-o. Iri nggal-et at weserak woraso nap worasoma, Kerisut-nen wene mbo ibidnak ala-ge, at iri-ge Kerisut ndegel oboso nap-nen yusu-o.

²³ Kir-e abu konnggo mbarak pidnak me, kir-e ap ndegel unpugwi nap kwat yurak pug-o.

²⁴ Nenggamirak wa-e. Mbal Pem Nagawan erengen pem-e kenambik tak wene mbo kinpid tarem woraigep iri na nggal-et wolmer-o.

²⁵ Nde, ap sujwe min ndugum min enmanggim wene-ge Nagawan Indo-nen ”Irit kwaru-o” luk yak nirigit lag-et nde, Nagawan Indo-ge an nubud kaso bem, at iri mot mot kwaroso nab-o luk neberagwi nap an nindi-nen peraidnak irit yimin-o.

²⁶ An-nen perasolar-e, yawo ya tarem-e anggun panggun worasu me, yu nggal wolmomtag-e ob-o. Ab-e worasu iri nggal-et wolmomtag-e konag-o luk perasu-o.

²⁷ Kat kogwe wanigendik worasu-a? Iri ala, kwe na keya burak pug-o. Kar-e kwe wanigit lak worasu-a? Iri ala, kwe-ge kore yurak pug-o.

²⁸ Alat nde, kat-nen kwe wanosolar-e, meya kwarusu-ge lag-o. Nde, kwe ndugum-nen ap wanosolar-e, meya kwarusu-ge lag-o. Alat nde, wok kerak mbidnak kwe min ap min-e nggweyak ma mende bem anggun panggun kali iri nggal kagup naru-nen yigi-o.

²⁹ Nanggamirak wa-e. Yu nggal yosolat-nen yigi-o: worok yurak tarem-e panggo yusu me, yawo kuri-nen-e onkwe worak nab-e onkwe lak nggal wolmag-o.

³⁰ Yip tugwi nab-e yip tugwi buk nggal mag-o. Enalen kagwi nab-e enalen kagwi buk nggal mag-o. Onggo pugwi nab-e enarengge lak nggal mag-o.

³¹ Nggweyak ma mende ombo worasu nab-e arengge lak nggal irit wolmag-o. O nggweyak yawo worasu yu-ge lak yekluk yusu-o.

³² Kir-e kunmud lak wolmomtak iri-ge nindingen-o. Nagawan Indo-nen at ebem indi yek maklug-e, ogwe lak nab-e Nagawan Indo eyabu wanurak nak nggok tak pusu-o.

³³ Alat nde, at ogwe-nen at ebem indi yek maklug-e, ogwe worak nab-e nggweyak ma mende nak nggok tak posola me,

³⁴ at indi-ge mberen yusu-o. Kwe ndugum un lak-nen-e at ebe min indi min marak worayeklug-e, Nagawan Indo eyabu nak nggok tak pusu-t nde, un worak kwe-ge un-nen at ebem indi yek maklug-e, nggweyak ma mende nak nggok tak pusu-o.

³⁵ Kit yongga kondosolat-nen yak kundusu-o. Kenare posolat-nen yusu-ge lag-o. Are, kir-e konak mot mot nak kwarogolar-e, kinndi tugup lak luk Nagawan Indo eyabu wanobokluk-nen yak kundusu-o.

³⁶ Nde, ap mbi-nen at ara ndugum iri na kwe indi worak yosola karuk, at indi-nen ap wok turak perasola-ge, irit mag-o. Ap wanurak iri-ge meya-ge lag-o.

³⁷ Alat nde, ap mbi-nen ”Irit kwarurag-o” luk enne amawi min yak tigit lak, at ondomok indi-n yebet karuk, at indi-n peraruk-nen: ”Nara ndugum-e ap wok timin pug-o” luk yusu na konag-et kwarusu-o.

³⁸ Iri kwarak me, ara ap wok tusu nab-e ob-et kwarusu-o. Nde, ara ap wok tigit lak yusu nab-e mondok konag-et kwarusu-o.

³⁹ Un uruk worasola-ge, ogwe-ge un panggarak worasu-t nde, un na wat yosola-ge, at-nen indi nin nap ebem puruk, wanurag-e op-nen yusu-o. Alat nde, Nagawan Indo ebem indi angin tubu yidnak nab-et wanurag-o.

⁴⁰ Alat nde, an-nen perasolar-e, togwe irit worasolar-e, alen min-et wolma-o luk perasu-o. Nde, an-e Mbal Pem Nagawan Indi-ge nimin worala-nen yigi kagi-o.