1 KORINTUS 3 - Nanduk Ngget Tul Pidnak Wene

Kuri wat yidnak wene 3:1-9

¹ Nanggamirak wa-e. An-nen wene yak kindigi na-ge, Konak Indi wanidnak nap inmin yugwi nggal yak kindigit lag-o. Are, kir-e Kerisut ebem-e li marik nggal-et woragola me, nggweyak ma nap enpage worak inmin yugwi nggal yak kondosolat woragi-o.

² Kit-nen norag-e awo me, an-nen-e tara nunggwi mende-ge mak kindigit lag-o. Are, kamo amburu nak nde mak kundukmu-o.

³ Kir-e nggweyak ma nap enpage worak me, yawo na irit kir-e tara nunggwi mende norag-e awo worali-o. Iri bem-nen kit kennggendumu-ge kit na kit-net kenlengen ale yogolat, kuri wat kerak mbogolat yugwi me, kir-e nggweyak ma nab-et woragolat, nggweyak ma nap-nen kwarugwi irit kwatli iri-ge kali bug-a?

⁴ Ap misik-nen yosolar-e: ”An-e Paulus mende-o” yosola, nde, at nin-nen-e: ”An-e Apolos mende-o” yosola, iri yili iri bem-nen kir-e nggweyak ma nap enpage-t worali kali bug-a?

⁵ Nde, Apolos-e no nab-o? Paulus-e no nab-o? Nit mberen iri-ge Mbal Pem Nagawan ndegel ubugwi nap-nen yili-o. Nde, Nagawan Indo-nen at eyabu nenarik tak nenpem pidnak ala, nit-nen ndowaga kinndi angin tubu yigeb-o.

⁶ An-nen uwi yaki-o. Apolos-nen yi kilij-o. Alat nde, wirik poso-ge Mbal Pem Nagawan-nen nag-o.

⁷ Yagoso nap min yi koloso nap min iri-ge nggulog-e lag-o. Ija lombog-o wirik poso Mbal Pem Nagawan iri nag-o.

⁸ Uwi yagoso nap na yi koloso nap na ndak ndak-nen yusu-o. It-nen yabu wanidnak iri ndak ndag-et Mbal Pem Nagawan-nen enarik tag-et onggo wok unduwa-o.

⁹ Nir-e Mbal Pem Nagawan imin yabu misiget erep wanili-o. Mbal Pem Nagawan eyabu min Mbal Pem Nagawan uwi worak min-e kit-nen yili-o.

O paro wene 3:10-23

¹⁰ Mbal Pem Nagawan-nen we wok ondoso elem iri wok niridnak pem-e o kona woroso aru nap-nen woroso nggal an-nen-e o paro pigi-o. Nde, o paro pigi na bem-e ap misik-nen o wurusu-o. Alat nde, o enarik tak worogolar-e, indi lid puruk-net o wuruwag-o.

¹¹ O paro-ge Yesus Kerisut ariget nak abu pidnak me, o paro nin purag-e mondok lag-o.

¹² Ap erep-nen o paro na bem worogolar-e, emas posid pem ala na, perak posid pem ala na, onggo nggok pugwi kerep konak pem ala na; erep-nen-e e bem ala na, tusuwang-ge bem ala na, engga kerengga umbuk pem ala na wuruwama-ge,

¹³ o enarik tak wiridnak iri-ge Kerisut-nen idnak Tarem-net nam tak posola, kujwa-o. Iri Tarem-e kanduk pem-nen tel korosolar-e, kanduk iri-nen ap-nen enarik tak o wiridnak mende iri-ge nam tak posolat, lombonosolat ma-o.

¹⁴ Nde, ta-nen nde o paro na bem wiridnag-e kan ninggit lak, tugup lag-et wolma bem-e at iri-ge onggo wanuwa-o.

¹⁵ Alat nde, ap-nen o wiridnak iri-ge kan nujwama-ge, onggo-ge wanigit lag-et nde, kan arem-nen nggogora mbiridnak nggal ap iri ebe nak imiri yaga wok tuwa-o.

¹⁶ Kir-e Mbal Pem Nagawan uwi worak me, Mbal Pem Nagawan Indi-ge kenarem worasu na-ge kir-e kenaru buk, lak?

¹⁷ Mbal Pem Nagawan uwi marak iri-ge kit-nen yili me, ta-nen nde Mbal Pem Nagawan uwi mijarosola-ge, at na Mbal Pem Nagawan-nen lak tak ubuwa-o.

¹⁸ Ap-nen-e at ambik ombol pem ludtag-e meya-o. Kit kenggendumu-nen ap mbi-nen perasolar-e: ”Nggweyak ma nap inndi tenggerak iri na bem-nen an-e nindi tenggerak yusu-o” luk perasu nab-e, ndemeret indi tenggerak maklug-e, wid nggal irit yurag-o.

¹⁹ Nggweyak ma nap inndi tenggerak elem yili na-ge Mbal Pem Nagawan erengen pem-e wid-nen yugwi nggal-nen yusu-o. Mbal Pem Nagawan engga mbarak pem-nen yosolar-e: ”Nagawan Indo-nen-e ap indi nggat nggat worak na ngonok tak obosolar-e, at ondomok indi nggat nggat iri na-net ngonok tak ubusu-o” luk,

²⁰ Mbal Pem Nagawan engga mbarak misik-nen yosolar-e: ”Indi tenggerak nap indi-nen yebet kaso mende-ge ebe lak mende-nen yusu-o luk Nagawan Indo-ge aru-o.”

²¹ Iri ala-ge, at-nen enpe-nen kwarugwi mende bem at indi kek tak purak pug-o. Yi mende ndi mende pidsa-ge kit winde-nen yili-o.

²² Paulus na irit, Apolos na irit, Peterus na irit, nggweyak ma yu me na irit, unluk momtak na irit, wat momtak na irit, yawo-n worasu na irit, abok-nen kwarurak na irit pik paksa kit kenarengge-nen yusu-o.

²³ Nde, kir-e Kerisut arengge-nen yili-o. Kerisut-e Mbal Pem Nagawan arengge-nen yusu-o.