1 KORINTUS 2 - Nanduk Ngget Tul Pidnak Wene

Kerisut e lang pang tak pem wiridnak wene 2:1-5

¹ Nanggamirak wa-e. An-e kendam lobok yigi-ge, nene amburu mbarak pem-nen na, nindi tenggerak pem-nen na Mbal Pem Nagawan-nen kinggiridnak wene na yak kendeyekluk lobok yigit lag-o.

² An nindi-nen perasolar-e, kit kennggendumu woralar-e, nin wene nan wene pidsa keya buruk, Yesus Kerisut min at e lang pang tak pem wiridnak wene min nak tena woramin-o luk irit peragi-o.

³ Nde, an-e kit kennggendumu woralar-e, ndeyak luk, kwiye-nen nowak lele lele min-et woragi-o.

⁴ An-nen yoso wene min an-nen tomboroso aid wene min-e ap inndi tenggerak pem inndi lunugwi wene bem-nen yigi-ge lag-o. Alat nde, Konak Indi amawi-nen mirik onposo bem-nen yak kindigi-o.

⁵ Iri bem-e, kit kinndi angin tubu yidnag-e ap inndi tenggerak elem min kundig-e lag-o. Alat nde, Mbal Pem Nagawan amawi bem parik-nen yusu-o.

Ndemeret indi tenggerak wene 2:6-16

⁶ Irit nde, nir-e indi tenggerak wene iri inndi amburu mbarak nap yak indili-t nde, nggweyak ma nap inndi tenggerak elem pem na yak indigit lag-et, o tena worali nagawan nagawan iri-ge lak tak unpuwa nap iri na inndi tenggerak elem pem na yak indili bug-o.

⁷ Alat nde, Mbal Pem Nagawan indi tenggerak elem kura bidnak kura elem iri-ge Mbal Pem Nagawan-nen o yu ndak wirigit lak ma-nen nit kek tak nenpeyekluk, lud tak pidnak wene iri na yak kindili-o.

⁸ Nde, iri-ge, indi tenggerak elem iri-ge nggweyak ma nagawan nagawan misiger-o luk tet enaru buk woraikma-o. Enaru woralep nggal-nen-e Unu Kek tak Woraso Nagawan Indo na e lang pang tak pem wirigit lak yeleb-o.

⁹ Alat nde, Mbal Pem Nagawan engga mbarak pem-nen yosolar-e: ”Ap enlengen-nen kagwi buk mende min eneyanggo-nen kulugwi buk mende min ap inndi-nen peragwi buk mende min iri perak nde Mbal Pem Nagawan-nen at abuwa kagwi nap enmanggim lid lud tak pamu-o” yij-o.

¹⁰ Alat nde, Mbal Pem Nagawan-nen-e kura bidnak wene na-ge Konak Indi bem-nen mirik ninpij-o. Nde, Konak Indi iri-ge yi mende ndi mende pidsa mbenaroso me, Mbal Pem Nagawan arem-nen yebet kaso mende na irit mbenarusu-o.

¹¹ Ta nggal-nen ap indi arem-nen peraso mende aru-o? Mondok lak irir-o. At ondomok indi-nen perak aru-o. Iri nggal, Mbal Pem Nagawan indi-n peraso-ge Konak Indi ariget nak-nen perak aru-o.

¹² Mbal Pem Nagawan-nen we wok ondoso mende nenaru moklug-e, nir-e nggweyak ma nap inndi-ge wanigit lag-o. Are, Mbal Pem Nagawan-nen wok nindidnak Konak Indi irit wanige-o.

¹³ Iri ala-ge, nit-nen mul indili wene-ge ap inndi tenggerak pem mul indili-ge lag-o. Alat nde, Konak Indi nak-nen mul ondoso wene bem-et Konak Indi-nen yoso wene-ge Konak Indi wanidnak nap irit mul indili-o.

¹⁴ Alat nde, Konak Indi wanigit lak nap-nen-e Mbal Pem Nagawan Indi-nen we wok ondoso mende wanurag-e meya-o. We wok ondoso mende-ge Konak Indi bem nak-nen enaru yugwi me, at-nen-e wid-nen yugwi nggal kwarak pidnak pem-e at ondomok indi bem-nen aru momtag-e meya-o.

¹⁵ Nde, Konak Indi wanidnak nap-nen-e yi mende ndi mende oboksa mbenaroso-t nde, ap erep-nen-e at ebem wene mbaruwa bug-o.

¹⁶ Mbal Pem Nagawan engga mbarak pem-nen yosolar-e: ”Nagawan Indo indi iri-ge ta aru-nen at mul turag-o?” luk yij-et nde, Kerisut indi-ge nit nenarem worasu-o.