1 KORINTUS 16 - Nanduk Ngget Tul Pidnak Wene

Lambuk tak inpidnak nap Yerusalem woragwi yongga indidnak wene 16:1-4

¹ Yawo-ge korak inpidnak nap enmanggim tol ndok wururak wene yak kendeyeg-o. Lambuk tak inpidnak nap Nggalatia woragwi nap yak indigi nggal, kit na iri nggal-et kwaru-o.

² An lobok yosola tarem nak-nen tol ndok wuru-ge lag-o. Are, pempa pempa Hari Minggu tarem ndok worogolar-e, kit kenarik tak-net kontol wanugwi ndak ndak tol ereb-e menggesa ndok worogolat wolmer-o.

³ Nde, an lobok yimindik-nen-e kit kinndi-n pidnak nap engga mbara wok unduruk, kit-nen ndok wiridnak tol iri-ge Yerusalem waruk mburuwakluk wirik inpimin-o.

⁴ Nde, an-et mbururak ala-ge, an totno mburul-o.

Paulus-nen nurak peraidnak wene 16:5-9

⁵ Nde, an-e Makeronia nandug-et mbururak peragirik me, an-e Makeronia wi nggwe-nen-e kit kendam lobok yimin-o.

⁶ Lobok yimindig-e, kit kinmin siyag-et nggal woramin, lak, are, o toro wok yosola tarem na kinmin woramin, lak, lombot nak pimin-o. Iri lug-e, an mborosola-ge, kit-nen ndimirik nubugub-o.

⁷ An-e we yik nak keneyaruk mbururag-e nimbir-o. Alat nde, Nagawan Indo-nen ”Iri min-o” yak norosola-ge, kit kinmin siyak kwarat wolmomtag-e nindingen-o.

⁸ Alat nde, Pentakosta tarem wok maklug-e, an-e Epesus yu me woramin-o.

⁹ Nit nenne eyak wurugwi nab-e kwarat worali-t nde, yu me-ge yabu nggok mondok ija wanurak tu kuwarak worasu-o.

Paulus-nen yak indidnak wene 16:10-18

¹⁰ Timotius nde kit kendam wok yosola-ge, an-nen Nagawan Indo eyabu wanusu nggal, at na iri nggal wanoso me, kit kinmin kwiye lak wolmakluk, wa yak ter-o.

¹¹ Ap mbi-nen kerengen unggut nggwe nak yik kudtak pug-o. Are, an neram ijok lem lobok yosola, at indi yek tag-et lobok yuwaklug-e, kir-e ndimirik eber-o. At iri na-ge nennggamirak inmin lobok yuwa-o luk an-e yik karok worasu-o.

¹² Nde, nenap Apolos iri perak nde, nenap tak erep inmin luk kit kendam wok makluk pempa emengen mbarosolat woragi-t nde, at indi pigit lak me, yawo-net kendam lobok yurag-e meya agaij-o. Alat nde, at-nen lobok yurak tarem wok yosola perak lobok yuwa-o.

¹³ Kenpage kwil kwalsa wolmer-o. Kinndi angin tubu yidnak pem tugup lak woragolat, kwiye lag-et woragolar-e kenarong min wolmer-o.

¹⁴ Yi kwatlik ndi kwatlik kwarogolar-e, ap enabuwa min-et kwarer-o.

¹⁵ Nenggamirak wa-e. Wene misik kenpem peyeg-o. Sepanus ogwela inmin-e kir-e kenaru-o. O Nggerika-nen it nanduk-net aid wene wanigarik, korak inpidnak nab-e it-net kwara ndegel onpogolat worali-o.

¹⁶ Iri nggal kwarugwi nap min it totno yabu wanogolat, ap ndegel onpogolat yugwi nap min-e kit-nen na it-nen yidnak yidnak kwarogolat wolmer-o luk an-e kenmengen mbarusu-o.

¹⁷ Sepanus min Porotunatus min Akaikus min lobok yidnak pem nalen kwarat kasu-o. Kit kondolmasa it-nen yongga niriga-o.

¹⁸ It-nen-e an min kit min ninndi alen tak piga-o. Iri nggal kwarugwi nab-e kek tak enper-o.

Wa yak indidnak wene 16:19-24

¹⁹ Lambuk tak inpidnak nap o Asia woragwi oboksa-nen-e ”Wiwa-o” yak kindiga-o. Akwila min Periska min lambuk tak inpidnak nap it enma ndok wurugwi nap min-nen-e Nagawan Indo unu bem kwarat ”Wiwa-o” luk yak kindiga-o.

²⁰ Kennggamirak yu me woragwi pida-nen ”Wiwa-o” luk yak kindiga-o. Kit na kit-net kona manuksa wa yak kerak mber-o.

²¹ An nambik ninggi-nen wene yu mbarosolat-nen Paulus an-net ”Wiwa-o” luk yak kundusu-o.

²² Nagawan Indo abuwa kaso buk nap perak nde, imbiri lamut mag-o! Maranata! yogolar-e: ”Nenagawan Indo wa-e. Lobok yi-o!”

²³ Nagawan Indo Yesus-nen we wok ondoso elem-e kit kinmin wolmag-o.

²⁴ Kerisut Yesus ebem an-e kit pidsa kenabuwa kaso nindi-ge kinmin wolmag-o.