1 KORINTUS 15 - Nanduk Ngget Tul Pidnak Wene

Kerisut uruk yidnak wene 15:1-11

¹ Nanggamirak wa-e. Yawo-ge an-nen yak kindigi aid wene iri-ge kit-nen wanuruk, wene iri na bem tugup lak mendak worali aid wene na-ge kinndi yeberak peyeg-o.

² Kit-nen nde aid wene na puksa tena woragola-ge, an-nen yak kindigi aid wene iri-net kinmiri yuwa-o. Nde, aid wene na bem kwara kinndi angin tubu yigit lak ala-ge, ebe kwat ma bug-o.

³ An-net wanigi wene owak ndum irit yak kindigi-o: Nde iri-ge, Mbal Pem Nagawan engga bem-nen mbarak iri na ndak ndag-et Kerisut-e nit meya yidnak nenmanggim wat yamu-o.

⁴ Wat yosola-ge, yapma pikma mberen naruk, kenan tak purak pem-e Mbal Pem Nagawan engga bem-nen mbarak iri na ndak ndag-et at uruk tak pij-o.

⁵ Uruk tak pamu-ge, Kepas na imbiri bem nam luk, imbirig-e mul ondoso nap duabelas inmbiri bem nam yij-o.

⁶ Iri rak purug-e, misik tarem-et nennggamirak enpe kwarat limaratus (500) ombol nggwe nggal inmbiri bem nam yij-o. Nde, iri kaiga nap ap kwarar-e yawo na unluk worali-t nde, ereb-e wat yiga-o.

⁷ Iri lug-e, Yakup na imbiri bem nam luk, imbirig-e, wirik inpidnak nap pidsa inmbiri bem-et nam yij-o.

⁸ Worok tak posolar-e, an nimbiri bem nam yij-o. Nde, an-e li awo ma-nen ndet yogolat tisiknak nggal-o.

⁹ Wirik inpidnak nap ereb-e kek tag-et nde, an-e teberag-o. Mbal Pem Nagawan-nen idnak lambuk tak inpidnak nap lel mberel inpigirik me, an nimin-e wirik inpidnak nab-o yurag-e meya-o.

¹⁰ Alat nde, an yawo worasu yu-ge Mbal Pem Nagawan-nen we wok ondoso bem-net worasu-o. Nde, we wok ondoso mende wok nirid iri-ge ebe lak momtak pem wok nirij-e lag-o. Are, it wirik inpidnak nap ereb-e yabu we marik nggal wanogola-t nde, an-e yabu kwarat wanusu-o. Alat nde, an-nen wanusu-ge lag-o. Mbal Pem Nagawan-nen we wok ondoso mende-ge an nimin worala-nen wanusu-o.

¹¹ Iri ala-ge, an na irit, it na irit, nit pidsa-nen aid wene mul kondogola, kit-nen kinndi angin tubu yili-o.

Nit nunluk yurak wene 15:12-34

¹² Nde, nit-nen yogolar-e: ”Kerisut iri-ge wat yidnak ennggendumu-nen uruk agaij-o” luk yili na-t nde, kit erep-nen-e ngge luk-nen: ”Wat yidnak nab-e unluk yugwi bug-o” luk yili-o?

¹³ Wat yidnak nap nde unluk yugwi buk nggal-nen-e Kerisut na uruk tak pigit lak yeleb-o.

¹⁴ Nde, Kerisut nde uruk tak pigit lak nggal-nen-e nit-nen aid wene yili yu na ebe lak mende-nen yusu-o. Nde, kit kinndi angin tubu yili na wewesa-nen yusu-o.

¹⁵ Iri-nen-o, nit-nen yogolar-e: ”Mbal Pem Nagawan-nen Kerisut uruk tak pij-o” luk yugwi na-ge Mbal Pem Nagawan imin-e nenesiget nggok yeleb-o. Wat yidnak nap ndemeret unluk yugwi buk nggal-nen-e, Mbal Pem Nagawan-nen-e Kerisut na uruk tak pigit lak yeleb-o.

¹⁶ Wat yidnak nab-e unluk tak poso buk nggal-nen-e, Kerisut na irit uruk tak pigit lak yeleb-o.

¹⁷ Nde, Kerisut nde uruk tak pigit lak-nen-e kit-nen kinndi angin tubu yili na ebe lak mende kwat yosolar-e, kit na kit meya yidnak min-et worali-o.

¹⁸ Wene iri nde ndemeret ala-ge, it Kerisut ebem wat yiga nap na lak tak inpidnak-nen yili-o.

¹⁹ Nde, nit ninndi Kerisut ebem mbung mbung tak pidnag-e yawo nunluk worali yu nak amanggim ala-ge, nggweyak ma nap ereb-e inpine-t nde, nit perak nenabuwa-o.

²⁰ Alat nde, Kerisut-e ndemeret wat yidnak nap ennggendumu-nen uruk tak pidnag-e, tel korak posolat-nen at uruk tak parik pem wat yidnak nap na irit unluk tak puwa-o.

²¹ Nde, wat yugwi elem-e ap misik-nen ndowaga kwaridnak me, iri nggal-et wat yidnak nap unluk tak poso elem na ap misik ebem-nen kwarij-o.

²² Aram imin kundik woragolar-e, ap pidsa wat yugwi-o. Nde, iri nggal-et Kerisut imin kundik woragolar-e, ap pidsa unluk tak puwa-o.

²³ Alat nde, it ondomok tak-nen nit nit men yogolar-e: tel korosolar-e, Kerisut na uruk lug-e, imbirig-e at lobok yuwa tarem-e Kerisut arengge wolma nab-e unluk ma-o.

²⁴ Iri lug-e woroksiyem wok yosolar-e, Kerisut-nen-e pemerinta nap pidsa min enne kulugwi nagawan pidsa min enmawi worak pidsa min lak tak unpuruk, at-nen tenagaidnak wi-ge Eid Mbal Pem Nagawan inggem puwa-o.

²⁵ Nde, Mbal Pem Nagawan-nen Kerisut imin sirid nap pidsa-ge at ujok ma rak enpeyekluk woralar-e, Kerisut na-ge Nagawan worasolar-e, pemerinta-nen tena woragwi mende mondok at-nen tena wolma-o.

²⁶ At imin sirid nap woroksiyem-nen lak tak puwa na-ge wat yugwi elem irir-o.

²⁷ ”Mbal Pem Nagawan-nen-e yi mende ndi mende pidsa-t at ujok ma rak puwa-o” luk yij-et nde, yi mende ndi mende Kerisut ujok ma rak puwa nap Mbal Pem Nagawan at imin lambuksa at ujok ma rak pidnag-e lag-o luk nam-et irir-o.

²⁸ Alat nde, yi mende ndi mende pidsa Kerisut ujok ma rak puwarig-e, Ambara at na-nen na ondomok tebe luk, yi mende ndi mende pidsa at ujok ma rak pid nap Mbal Pem Nagawan iri ujok ma tebe ma-o. Iri-ge, Mbal Pem Nagawan-e yi mende ndi mende oboksa bem at nak kek tak wolmakluk-nen kwaruwa-o.

²⁹ Iri nggal ala-ge, noluk-nen wat yidnak nap enmanggim ap yi ma unpurak yili-o? Nde, wat yidnak nab-e ndemeret unluk tak poso buk nde ala-ge, noluk-nen wat yidnak nap enmanggim yi ma inpili-o?

³⁰ Nde, nit min-et noluk-nen pempa pempa meya rak nunpurak nggwe nggogolat worali-o?

³¹ Nanggamirak wa-e. An-e pempa pempa wat yidnak nusu-o. Wene yu-ge ndemeret yigi-o luk nit Nenagawan Indo Yesus Kerisut ebem kit kenpem ala nalin nalen kasu bem irit yusu-o.

³² Ki nap inndi-nen peraidnak pem-net Epesus-nen ndakngge isilepma worak iri na imin yig pigi na bem-e no mende nde terak lesa wanimin-o? Nde, wat yidnak nab-e unluk tak onposo buk nde ala-ge, yu nggal yuwog-o: ”Tono-ge wat mul me, amare nog-o.”

³³ Kenambik konmbol pem lali-ge meyog-o. ”Meya kwarugwi nap inmin totno are kondogolar-e, enpage konak kwarugwi na-ge lak tak poso-o.”

³⁴ Kir-e kwara kondok luk, meya yugwi iri keya ber-o. Kit kinnggiri kabokluk an-e wene yu yak kundusu-o: Kit kennggendumu ap ereb-e Mbal Pem Nagawan enaru bug-et worali-o.

Nunluk luk, nenpe ngget wanurak wene 15:35-58

³⁵ Alat nde, ap misik-nen kin wanosolar-e: ”Wat yidnak nab-e ngge kwasa-nen unluk tak puwa-o? Nde, enpe-ge no nggal kwasa tuguruk lobok yuwa-o?” luk kin wanuwa-o.

³⁶ Wid yu-ge wa-e! Kat-nen uwi yaidnag-e, lebe luk-net ama-ge poloso-o.

³⁷ Nde, uwi iri yagosolar-e, ebe abok-nen purak mende perak nde yagoso bug-o. Are, nggandum uwi ala na, uwi nin ala na, uwi ngenwa iri na-t yagoso-o.

³⁸ Nde, Mbal Pem Nagawan-net uwi iri-ge at indi-n pidnak pem-net ebe irit wok toso-o. Yi mende ndi mende uwi na ondomok tak ebe na wok toso-o.

³⁹ Indisep worak mende enaboro misiger-e lag-o. Ap enaboro na arig-et, wam aboro na arig-et, towe aboro na arig-et, keyane aboro na arig-et-nen yusu-o.

⁴⁰ Nde, mbal pem mende enpe na worasu, nggweyak ma mende enpe na worasu-t nde, mbal pem mende enpe abinal na arig-et, nggweyak ma mende enpe abinal na arig-et-nen yusu-o.

⁴¹ Mo eyaya na nin-et, waneya eyaya na nin-et, wonaru eyaya na nin-et worasu-o. Nde, wonaru misik eyaya na arig-et, wonaru erep eyaya na arig-et nin tak nan tak-nen yusu-o.

⁴² Nde, wat yidnak nap unluk yogolat na iri nggal-et ma-o. Yapma inpili-ge piri yoso mende irit yapma inpili-o. Nde, men yogolar-e, piri yoso buk mende irit men ma-o.

⁴³ Mbilaro ngin irit yapma inpili-t nde, men yogolar-e, abinal worak irit mendak unpuwa-o. Nde, ndeyak irit yapma inpili-t nde, men yogolar-e, amawi worak irit mendak unpuwa-o.

⁴⁴ Piri yoso enpe irit yapma inpili-t nde, men yogolar-e, piri momtak puk enpe irit mendak unpuwa-o. Piri yoso enpe nde worasola-ge, piri yoso buk enpe na worasur-o.

⁴⁵ Mbal Pem Nagawan engga mbarak pem-nen yosolar-e: ”Nanduk woraso nap Aram iri-ge uruk mende worak irit kwat yij-o.” Alat nde, woroksiyem Aram iri-ge ap unluk yaga wok ondoso Indi irit kwat yij-o.

⁴⁶ Piri yoso buk mende iri-ge nandug-et lobok yij-e lag-o. Are, nggweyak ma mende na nanduk lobok yarik, imbirik-nen perak piri yoso buk mende lobok yij-o.

⁴⁷ Nanduk woraso Aram iri-ge nggweyak pem-nen ndak worak me, nggweyak ma nab-er-o. Alat nde, imbirik lobok yid Aram iri-ge aid arem-nen mbuwagaij-o.

⁴⁸ Piri yoso mende iri-ge at nggweyak pem-nen ndak wiridnak nap iri nggal-net yili-o. Alat nde, piri yoso buk mende iri-ge aid arem-nen lobok yid nap iri nggal-net yili-o.

⁴⁹ Nir-e nggweyak pem-nen ndak wiridnak nap abage worak worali na nggal, iri nggal-et aid arem-nen lobok yidnak Nap abage nggal irit mul-o.

⁵⁰ Nanggamirak wa-e. Yu nggal yosolat-nen yigi-o: Nenaboro min nenmep min worali yu bem-e Mbal Pem Nagawan-nen tenagaidnak wi winde yurag-e meya-o. Nde, piri yoso mende-nen piri yoso buk mende winde yurag-e meya-o.

⁵¹ An-nen kura wene yu nam tak paga yak kindimin yu koler-o. Nit pidsa wat mul-e lag-o. Alat nde, nit pidsa nin nggal tak nunpuwa-o.

⁵² Enlengen sambok yili nggal, worok tak posolat posid poba ene yosola-ge, ereya na-net nin nggal tak nunpuwa-o. Posid poba iri ene yosola-ge, wat yidnak nab-e piri yoso buk irit kwarak mendak onposolat, nit pidsa na nin tak nonposolat ma-o.

⁵³ Lag-e lag-o. Piri yoso mende yu-ge piri yoso buk mende yirik onposolat, nde, wat yugwi mende yu-ge wat yugwi buk mende yirik onposolat ma-o.

⁵⁴ Nde, piri yoso mende yu-ge piri yoso buk mende yirik onposolat, wat yugwi mende yu-ge wat yugwi buk mende yirik onposolug-e, Mbal Pem Nagawan engga mbarak pem-nen yidnak wene yu-ge ndak ndak tak posolar-e: ”Ombol nggwe yidnak pem-nen wat yugwi elem-e lak tak pij-o.”

⁵⁵ ”Wat yugwi elem wa-e. Kat-nen ombol nggwe yoso mende-ge ngge me-o? Wat yugwi elem wa-e. Kat-nen keyak yilik onposo mende-ge ngge me-o?”

⁵⁶ Meya yogolat woraidnak pem wat yugwi elem-nen eyak yilik onposo-o. Nde, meya yogolat woraidnak amawi rak poso-ge imiri mbarak pidnak wene-nen yusu-o.

⁵⁷ Alat nde, Nenagawan Indo Yesus Kerisut ebem-nen ombol nggwe rak nunpusu ala, Mbal Pem Nagawan wa yak tuwog-o!

⁵⁸ Iri bem-e, nanggamirak kenabuwa worak wa-e. Tugup lak luk, unuk laksa irit woragolar-e, Nagawan Indo eyabu wanili iri-ge ebe lak mende ma-ge lag-o luk kenaru me, Nagawan Indo eyabu-ge pempa kenmawi min-et wok tenak wolmer-o.